“Dagedage Dikadika Sisiadia”?

PIT-BULL sisia ese Canada, England bona United States dekenai taunimanima idia koridia ena sivarai be vanegai lagani lalonai idia herevalaia momo. United States ena Centers for Disease Control (gorere idia koua dalana idia stadilaia oreana) ia hamomokania lagani 1979 ia lao bona 1988 lalonai, United States dekenai, sisia ese idia koridia bona idia mase taudia 157 amo taunimanima 42 be pit-bull sisia ese idia koridia. Britain dekenai niuspepa taudia ese unai dagedage sisia pit-bull terriers idia boiridia “Dagedage Dikadika Sisiadia.” Equinox magasin ese unai sisia ia gwauraia “ala-ala masini namo hereana.”

Sisia idia heai gadara be taravatu makohia gadara ta, to idia gwau unai gadara lalonai pit bull be “ala-ala sisia iboudiai edia biaguna,” unai idia hereva badina be ia goada, ia marere haraga haraga, gau ta ia koria neganai ia ruhaia lasi bona ia dagedage dikadika. Toronto, Canada dekenai niuspepa ta ladana The Globe and Mail, ia gwau ‘pit bull sisia be idia karadia ma sisia haida alaia mase totona.’

Niuspepa ta ladana The Toronto Star, be inai bamona ia gwau: “Ena aukina amo gau ta ia koria neganai ia koria noho karana ese dika bada ia havaraia diba animal haida dekenai bona taunimanima dekenai danu, maragidia ese dika bada idia davaria badina sisia idia koua diba lasi.” Mai gari bada sivarai ta be pit bull sisia ese kekeni maragi ta ena mauri lagani be 9 be ena vairana dekenai ia koria bona ia hadikaia rohoroho, unai dainai hora 5 lalonai doketa ese ena vairana idia turia bona idia hanamoa. Ma ta ena mauri lagani 13 danu be hospital dekenai heduru ia abia badina pit bull sisia ese ena vairana, ena kemena bona doruna, aena, kamika, bona kununa dekenai ia koria dainai. Kekeni ta ena mauri lagani 21, ia ura ena turana ena pit bull sisia ia kisi henia, to sisia ese ena vairana ia koria, vadaeni doketa ese ena vairana dekenai turia 70 idia atoa. England dekenai, tau ta ena lagani 54 be “Dagedage Dikadika Sisiadia” rua ese idia koria dikadika bona ena udu-baubau idia koria oho.

Toronto ena Public Health Department lalonai, animal naria depatmen ena bosi, Jim Bandow ia gwau: “Pit bull sisia be bomu ta bamona. Oi diba lasi edena negai do ia pou.”

Taravatu idia karaia taudia ese unai hekwakwanai idia hanamoa totona idia ese taravatu idia karaia bona idia ura taunimanima ese do idia badinadia. Edmonton, Canada dekenai pit-bull sisia edia biagudia ese insurens K410,000 bamona idia abia edia sisia totona badina bema edia sisia ese ta ia koria, unai kampani ese ia koria tauna dekenai davana idia henia diba, unai idia gwauraia liability insurance, bona sisia ena laisens danu idia hoia davana be K82.00 bamona. Winnipeg, Canada dekenai, pit bull sisia matamatadia be taoni lalonai do idia vareai diba lasi, bona biagudia ese edia sisia be varo amo do idia dogoatao bona edia uduna dekenai gau ta (muzzle) idia atoa idia koria diba lasi totona. Britain ena Palamen ese taravatu ta ia karaia, ataiai taravatu hegeregerena pit bull sisia edia biagudia totona. Unai taravatu idia makohia neganai idia fainia bona kota dekenai eiava dibura dekenai do idia atodia diba danu.

Idau negai Israel bese taudia ese edia dagedage animal idia naridia namonamo, Dirava ena Taravatu hegeregerena. Bema dagedage animal ta idia rakatania bona ia heau loaloa, bona gau ta ia hadikaia, ena biaguna ese davana ia karaia. Bema unai animal ese taunimanima ta ia alaia, biaguna idia hamasea diba. (Esodo 21:29) Dirava ena Taravatu lalonai ia torea gauna ita laloa be namo, bona aonega dalana be Keristen taudia ese edia dagedage sisia idia naria namonamo eiava edia lalona idia hadaia unai bamona sisia idia abia lasi totona.