Duahia Taudia Amo

Pit Bull Sisiadia  Guna lau ese pit bull sisia lau abia, bona ia dagedage lasi, ia manau momokani, lau abia sisia ma haida be unai bamona lasi. Unai dainai umui torea sivaraina ena ladana “ ‘Dagedage Dikadika Sisiadia’?” dainai lau lalohisihisi. (Issue Number 1, 1993) Unai hereva kwarana ese pit bull be Satana bona dika gaudia ida ia hahegeregerea. Hari, taunimanima be pit bull sisia idia abia neganai taunimanima haida do idia lalohisihisi diba. To, momokani, taunimanima be unai bamona sisia idia abia neganai idia naria namonamo be gau badana. Namona be do idia abia sisia ena kara bona ena tamana sinana edia kara do idia tahua guna. Danu, guna unai sisia idia naria namonamo eiava lasi karana do idia tahua. Bema idia naria namonamo, reana ia be manau sisiana.

L. H., United States

Unai sivarai ladana be British niuspepa amo, nega momo “pit bull” sisia be unai bamona idia gwauraia badina ena kara ia haidaua diba dainai. Ai gwau lasi unai sisia be Satana bamona; bona ai gwau lasi taunimanima idia abidia be namo lasi. To dika ia vara diba dainai, ai ese “pit bull” idia abia taudia ai hamaorodia edia sisia do idia koudia namonamo.​—⁠ED.

Ruma Taravatuna  Lau ura umui lau tanikiu henia “Matamata Taudia Idia Henanadai . . . Dahaka Dainai Ruma Dekenai Lau Giroa Ena Nega Taravatuna be Auka Herea?” ena sivarai dainai. (Issue Number 1, 1993) Kahirakahira lauegu mauri lagani be 17, bona egu sinana be lau dekenai taravatu ia gwauraia, ia gwau hanuaboi 11 okoloko ruma dekenai lau giroa, lau laloa unai be taravatu auka hereana. Hanuaboi haida nega lau laloaboio dainai ruma dekenai lau ginidae leiti, unai dainai egu sinana ia lalohisihisi bada! Umui torea sivaraina ese ia hahedinaraia, nega korikori lalonai ruma dekenai ai ginidae lasi neganai, emai tamana bona sinana idia lalo-hekwarahi, idia laloa dika ai davaria. Hari lau lalo-parara lau sibogu egu ura lau tahua bona egu sinana bona tamana edia lalona lau hahisia kava be namo lasi.

O. C., United States

Kuku Ania  Kuku ania sivaraidia rua be “Matamata Taudia Idia Henanadai . . . ” lalonai lau duahia vadaeni (Issue Number 2 bona 3, 1992), bona edia hereva be momokani. Lauegu lagani be 13 neganai kuku lau ania matamaia, egu sikuli turadia ese egu lalona idia ania unai lau karaia totona. To egu lagani idia 15 neganai lau be Keristen tauna ta ai lau lao bona kuku ania karana lau rakatania, unai neganai egu “turadia” ese lau idia rakatania. Gabeai moni gaukara gabunai lau ida idia gaukara taudia ese lau idia doria toho kuku lau ania totona. Hari, lau namo badina egu gaukara biaguna be Keristen tauna, bona hodahoda be kuku ania karana amo ia miro lasi​—⁠tauanina bona lauma dalanai lau ia hadikaia lasi.

B. S., Germany

Kofi  Umui torea sivaraina “Kofi Idia Daradaralaia” (Issue Number 2, 1992) lalonai, umui gwau ti, cocoa, bona cola inuinu gaudia lalonai caffeine ia noho. Reana unai be momokani ti bona cola dekenai, to cocoa dekenai ia noho lasi. Cocoa dekenai theobromine ia noho, unai be caffeine bamona lasi. Reana cocoa ese tauanina ia hagoadaia, to unai be suga dainai.

E. B., Israel

“Theobromine” be “chemical” ta bona ia be “caffeine” bamona. “The Encyclopedia Americana” ia gwau “cocoa” huahua lalonai ‘ “theobromine” 3 pesen bona “caffeine” sisina ia noho danu.’ “Compton’s Encyclopedia” ia gwau “[‘Sokelete’] lalonai ‘theobromine’ sisina ia noho bona taunimanima haida edia tauanina dekenai ia be ‘caffeine’ hegeregerena.”​—⁠ED.