Tanobada Ena Hairai Moale Karadia
HOLLYWOOD! Unai hereva Hollywood oi kamonai neganai reana muvini piksa gabudia bona moale karadia idauidau oi laloa. Nega haida unai gabu idia gwauraia moale idauidau karaia gabuna bona muvini piksa idauidau karaia gabuna. Ma gabu ta lasi be unai Los Angeles, California ena gabu bamona, unuseniai moale karadia idauidau idia karaia. Tanobada hegegemadai ia be momokani tanobada ena moale karadia idauidau bona hairai gaudia idauidau amo ia honu. Toretore tauna ta ia gwau: “Hollywood be muvini piksa idauidau idia karaia gabuna bona tanobada ibounai dekenai idia abia dae ia be muvini piksa karaia gabuna badana.”
Moale Karana be Bisinesi Badana
To Hollywood ena kara be bisinesi badana momokani. Time magasin ese ia hahedinaraia, guna roketi idauidau bona satellite masini idauidau hoihoilaia amo moni bada idia abia, to hari United States dekenai moale karadia idauidau kampani amo moni bada herea idia abia. Lagani ta ta iboudiai moale karana hoihoilaia bisinesi amo moni kina handred bilion tamona idia davaria, bona unai moni ena kahana ta—20 pesen bamona—be idau tano haida amo idia abia.
Tanobada idaudia amo United States taudia ese buka idauidau hoihoilaia karana amo moni 35 pesen bamona idia davaria, ane idia rekodilaia amo moni 50 pesen, muvini piksa bona video kaset amo moni 55 pesen, bona TV amo moni 75 pesen ia lao 85 pesen idia davaria.
Unai moni bada idia abia dainai, Hollywood ese moale karadia idauidau idia karaia tanobada taudia totona. Ita gwau lasi tanobada taudia ibounai ese unai moale karadia idauidau idia moalelaia—idau tanodia haida dekenai idia maumau badina edia memero kekeni be edia kara bona kastom idia rakatania, bona idia ese America taudia edia kara idia tohotohoa. To unai moale karadia be United States sibona dekena amo idia mai lasi. Tano momo dekenai moale idauidau havaraia bisinesi idia haginidia—hegeregere, muvini piksa, televisen, kaset bona teipi, buka, spot gadara bona ma gau haida danu idia karaia.
Moale Karana—Hari Ia Auka Lasi
Tanobada taudia be daika ese ia hamoaledia be herevana, ia hedinarai goevagoeva hari inai negai unai kara be idau momokani. Hegeregere: Bema oi be lagani 100 gunanai oi noho neganai, drama bamona moale karana idia hahedinaraia goevagoeva diba taudia be nega hida do oi raraia diba, a? Hari inai negai moale karadia momo ita raraia diba, to gunaguna, ena be taga bada tanona dekenai oi noho, to reana moale karadia momo oi itaia lasi. Hegeregere opera eiava symphony concert ena miusik oi kamonai henia totona, oi hekwarahi unai gabuna dekenai oi lao totona. To hari ita hekwarahi lasi, stereo maragidia amo miusik idauidau ita kamonai henia diba, eiava ruma dekenai ita helai bona televisen ita kehoa bena moale karadia idauidau ita raraia diba.
Ruma momo dekenai televisen, video kaset rekoda, CD [compact disc player] eiava kaset rekoda ta, bona paua gaudia ma haida danu idia noho. Natu haida be idia tubu daekau lalonai, edia ruma dekenai televisen momo idia noho. Hanua momo be mai edia televisen gabudia, bona hanuaboi dekenai taunimanima be unuseniai idia lao unai piksa idia raraia totona. Taunimanima be televisen raraia karana idia manadalaia.
Unai kara be ia kerere, a? Hari idia halasia moale karadia idauidau be mai edia dika, a? Eiava hari moale karadia idauidau momo be taga bada toana sibona? Namona be inai tanobada ena hairai moale karadia idauidau be laloa maoromaoro karana amo ita lalodia.