Moale Karadia Lalohadailaidia Maoromaoro

“GAUKARA momo sibona bona gadara lasi ese tau ta ena lalona ia hametaua.” Hari, unai hereva be ia momokani, to nega haida ita laloa momo lasi. Oibe, “gaukara momo sibona bona gadara lasi” ese taunimanima edia lalona ia hametaua bona ma gau ta idia laloa lasi.

Japan dekenai hekwakwanai ia vara, Japan taudia be gaukara hanaihanai taudia. Gaukara biagudia idia ura gaukara taudia be hanuaboi iboudiai bona Saturday bona Sunday iboudiai danu ovataim gaukara idia karaia. Canada ena nius magasin Maclean’s ia gwau, lagani tamona lalonai, Japan lalonai gaukara tauna ta be hora 2,088 ia gaukara, to Canada lalonai, gaukara tauna be hora 1,654 ia gaukara. To, unai magasin ma ia gwau: “Japan kampani edia hekwakwanai be idau: edia gaukara taudia be karoshi idia davaria, unai ena anina be idia gaukara hanaihanai bona idia laga-ani lasi dainai idia mase. Niuspepa haida ese idia hahedinaraia edia mauri lagani 40 taudia be dina 100 idia gaukara bona idia laga-ani lasi dainai, kudou ena gorere amo idia mase.” Taunimanima be Saturday bona Sunday dekenai do idia laga-ani totona, Japan ena leiba gaukara ia naria oreana be mai miusik danu sivarai ta idia halasia idia ia durudia totona bena idia lalo-parara idia laga-ani be gau badana. Tano ma haida lalodiai taunimanima edia lalona idia veria pura ibounai ta do idia gaukara totona!

Moale Karadia Edia Namo

Diba momo taudia idia gwau, gaukara hanaihanai karana be gorere ta bamona, ia be gau namona lasi. Taunimanima ta be ia natuna maragi neganai sibona ia gadara be hegeregere lasi; taunimanima badadia danu idia gadara be gau badana. Dahaka dainai? Taunimanima be laga-ani eiava moale karadia amo dahaka namo idia davaria? Buka ta ia gwau: “Sibona ena kara ia hahedinaraia, hebamo ia abia, ena lalona bona tauanina idia gaukara hebou bona tauanina ia goada, gaukara lasi kara idauna, laga-ani bona lalo-maino, matamata karana ta ia karaia toho bona taunimanima idaudia ia davaria, hetura karana ia habadaia diba, ruma bese ena lalo-tamona ia hagoadaia, tubutubu gaudia bona animal ia moalelaidia diba, . . . bona ena mamina ia namo. Laga-ani lalonai taunimanima be unai namo gaudia idia davaria diba.”

Hekwakwanai idia vara edia badina idia stadilaia taudia be buka momo idia torea laga-ani bona gadara karadia idia kikilaia totona, bona idia iboudiai idia lalo-tamona, idia gwau taunimanima ta ta iboudiai idia laga-ani be taunimanima edia noho dalana ia durua bada. Momokani, taunimanima idia durua gaudia ia diba momo tauna be taunimanima Havaraia Diravana.

Reana haida idia laloa kerere, idia laloa Baibel be moale bona laga-ani karadia ia gwauraia dika. Baibel ia gwau Iehova be moale Diravana bona ia ura iena hesiai taudia idia moale danu. (Salamo 144:15b; 1 Timoteo 1:11) Kohelete 3:​1-4 ia gwau “gau iboudiai be mai edia nega korikori . . . kiri be mai ena nega” bona “mavaru be mai ena nega.” Heberu gado ai unai hereva “kiri” ena anina be “gadara.” Baibel ese ita ia hadibaia “tau ta ena dala namo herea be inai: Ia aniani, ia inuinu bona iena gaukara ia moalelaia.”​—⁠Kohelete 2:24.

Hari inai negai, taunimanima momo idia laga-ani neganai, idia ura idia helai bona haida edia aonega karana idia moalelaia. To unai be kara matamatana ta lasi. Baibel ese ia hahedinaraia lagani tausen momo lalodiai taunimanima be mavaru, ane abia, miusik gadaralaia, eiava spot gadara karaia taudia idia raraidia neganai idia moale.

Ita laga-ani neganai, moale karana ta be ita ia hagoadaia diba. Spot ia diba momo tauna, mavaru ia karaia namonamo hahine, lalona veria muvini piksa namona, eiava miusik ia ore neganai ena rege namona ita laloa noho neganai, daika ia moale lasi? Bona iseda lalona veria bukana ta ita duahia danu.

Unai bamona moale karana be ita dekenai lalo-maino do ia henia, to unai mo sibona lasi. Reana ita do ia hagoadaia, iseda lalona do ia hamoalea, iseda kudouna do ia hamarerea, unai dainai ita kiri​—⁠bona ita dekenai lalo-parara do ia henia diba. Hegeregere, buka dekena amo, taunimanima edia kara do ita diba.

Moale Karadia Edia Dika

To, hari inai negai moale karadia ita laloa maoromaoro totona, gau badana be ita lalo-parara edia namo bona edia dika danu idia noho. Moale karadia edia dika idauidau idia kikilaia momo, bona idia haida idia namo, haida idia dika. Namona be edia namo ita kikilaia guna.

Ita be dibura negadia lalonai ita noho, Baibel ese ia gwauraia, “nega dokonai metau dikadia momo do idia vara.” (2 Timoteo 3:⁠1) Vadaeni, moale karadia lalonai hari inai negai idia vara kara dikadia idia hahedinaraia be hoa gauna ta lasi. Dagedage karadia, sihari kava karadia, bona ma dika karadia​—⁠hegeregere idau bese dadaraia karana​—⁠iboudiai be taunimanima idia ura henia moale karadia lalonai idia noho, bona unai kara ese moale karana ia hadikaia. Unai be moale karana namona lasi.

Muvini Piksa: Hollywood ai, idia henia hanamoa gauna ena ladana be Oscar, bona lagani 1992 ai taunimanima toi edia ladana idia henia ta ese “actor hereadaena” dagina do ia abia totona, unai taudia toi be piksa lalonai idia kava bona mai edia dagedage ala-ala taudia idia haheitalaia, bona piksa dekenai taunimanima ia hamasea kava karana be ia hedinarai momo. Sivarai ta ia gwau, piksa lalonai tau ta ese hahine ia hadikaia lalonai ena vairana ia koria bona ena hidio kahana ta ia kokia oho. Taunimanima idia ura bada muvini piksa ta, ladana Basic Instinct, be unai lagani ena piksa badana ta, ia dekena amo moni bada idia davaria. Unai piksa ia kehoa neganai tau be varo amo idia guia bona hahine be ia danu ia sihari kava lalonai, hahine be kaia amo unai tau ia gwadaia loulou, bona ena rara be ia dekenai ia kamokau.

Miusik: Hari, rap bona heavy metal miusik ruaosi edia hereva dikadia dainai taunimanima edia maumau ia bada ia lao. Hahine hadikaia bona dagedage henia karadia, idau bese taudia bona polisi dagedage henia bona inai henia karadia, bona Satana tomadiho henia herevadia be rap bona heavy metal rekod dekenai idia davaria. Gabu haida dekenai taravatu idia atoa, unai bamona sivarai idia gwauraia rekod edia kumia gauna dekenai ena dika hadibaia herevana idia torea hedinarai. To idia gwau rap miusik torea tauna Ice-T ia gwau ena miusik dekenai hereva dikadia ia atoa badina ia ura unai sisiba herevana be ena rekod dekenai idia atoa; ia gwau unai sisiba ia noho neganai taunimanima edia lalona ia veria idia abia totona. Rock miusik dekenai ia kwalimu tauna Prince ena ane lalonai kakana bona taihuna sihari henia karana ena namo ia anelaia. Nega momo, miusik video amo lalona veria sihari kava karadia idia hahedinaraia. Taunimanima momo idia ura henia miusik ia anelaia ladana bada hahine Madonna ena video Justify My Love lalonai, hisihisi henia eiava abia karana moalelaia bona tatau be tatau danu idia mahuta hebou karana ia hahedinaraia dainai taunimanima idia ura henia bada. Danu MTV, unai be United States ena TV siteisini ta, idia gwau Madonna ena video do idia hahedinaraia lasi.

Buka: Vanegai, buka matamata haida edia hereva idia tahua taudia edia hereva ita laloa. American Psycho bukana ese taunimanima momo ia hamasedia tauna ena kara ia kikilaia, ia hamasedia taudia ida kara bodaga idauidau, edia tauanina ia ania danu, ena sivarai ia kikilaia. Vox bukana lalonai, idia hediba heheni lasi tau bona hahine be telefon amo hereva bodaga idia herevalai heheni mahuta hebou karana ena mamina idia abia totona. Raptor bukana lalonai, lagani 500 ia lao 599 lalonai idia noho tau rua edia sivarai ia kikilaia, idia be nega tamona tatau bona hahine edia tauanina idia abia idia vara neganai. Lalokau sivaraidia idia kikilaia buka momo edia hereva be heudahanai bona sihari kava karadia idia gwauraia namo. Guna, komik buka be idia namo, natudia idia duahia totona, to hari, nega momo idia be mahuta hebou, dagedage, bona lauma dikadia hereva henia karadia idia hahedinaraia.

Spot Gadara: Taunimanimna momo idia ura boksini gadara idia koua toho. Ena be idia diba ta ese ma ta ia paisia bena knockout ia henia neganai, unai bamona botaia ia abia tauna ena harana ia hadikaia sisina bona idia hanamoa diba lasi, to moni bada do idia davaria diba bona raraia taudia be milion momo dainai, paisi taudia edia lalona idia ania noho ma ta do idia botaia ela bona ia mase.

To, spot gadara ma haida lalodiai, idia mase taudia be momo. Nega momo spot gadara idia karaia taudia eiava spot idia raraia taudia be idia heatu heheni. Idia heatu ena badina be bese abia isi dainai eiava “tim ta” idia abia isi dainai, tanobada ibounai dekenai, steidiam haida lalonai idia noho taudia handred momo idia mase. German magasin Die Zeit ia gwau, boromakau tau ida heatu karana be “idau nega amo ia mai hari idia karaia bona ia be spot gadara dikana ta,” bona vanegai Spain bona France taudia idia ura henia. Boromakau tau be lagani 21 matador tauna ladana José Cubero ena kudouna ia gwadaia, bena unai tau ia mase murinai, taunimanima be idia atoa mase mauana lalonai bona Madrid ena boromakau tau gadara tanona dekenai idia huaia hagegea, bona taunimanima 15,000 be mai moale danu idia boiboi bada. Spain ena televisen dekenai ia gadara lalonai ia mase laulauna be idia hahedinaraia loulou.

Momokani, nega ta ta sibona unai bamona ia vara, bona ita gwau lasi gadara iboudiai be idia dika. To, spot gadara ita laloa maoromaoro neganai, ita lalo-parara taunimanima idia ura henia bada spot gadara haida lalodiai unai bamona dika idia vara diba. Dahaka dainai? Gunaguna, taunimanima idia laloa spot gadara haida be namo lasi, to harihari taunimanima idia laloa unai spot gadara be idia namo, bona gau ta idia hadikaia lasi bamona, ani? Sisina sisina taunimanima be spot gadara dikadia idia abia dae. Oi be edena spot gadara do oi manadalaia?

Edia Momo be Hekwakwanai Gauna

Bisinesi idia havaraia moale karadia idauidau be momo herea. Hegeregere, United States lalonai, lagani 1991 ai, buka idauidau 110,000 bona ma haida idia halasidia. Dina ta ta iboudiai bema buka ta oi duahia ore diba, lagani tamona lalonai idia halasia bukadia iboudiai oi duahidia ena nega be lagani 300 bona ma haida! Lagani ta ta iboudiai, United States ai, idia karaia muvini piksa idauidau be 400 bona ma haida, bona idau tanodia be unai piksa idia hoidia bona sibodia edia muvini piksa idia karaia danu. Lagani ta ta iboudiai, India bisinesi taudia be piksa handred momo idia karaia Hindu gado ai. Bona lagani ta ta iboudiai, miusik rekod, compact disk, bona kaset teipi idauidau momo idia karaia, ani? Televisen danu.

Televisen siteisini be momo​—⁠cable siteisini, satellite amo idau tano edia televisen siteisini, bona oiemu hanua ena siteisini. Unai ena anina be hora 24 lalodiai moale kara idauidau oi raraia diba. Spot, miusik, drama, hevaseha, science fiction, herevahereva, bona muvini piksa oi itaia diba televisen oi gigia kehoa neganai. Bema VCR rekoda oi abia, muvini piksa tausen momo oi raraia diba, bona gau idauidau hadibaia video be momo, miusik video, bona tubutubu gaudia bona animal, histori, bona saiens video idia noho danu.

To unai moale karadia idauidau ita raraia ena nega be edena bamona ita davaria? Saiens ena diba dainai moale karana ta be karaharaga ita raraia diba​—⁠mani oi laloa, bema Mozart ia torea symphony miusik ta be bateri ena stereo reidio dekenai ia kamonai, bema hoa bada herea! To, saiens ese iseda nega ia halataia diba lasi unai gaudia iboudiai do ita moalelaidia totona. Oibe, saiens ena diba ia bada tano haida lalodiai, laga-ani totona taunimanima edia nega be ia maragi ia lao, ia bada ia lao lasi.

Bema ita koua lasi, moale karana be iseda laga-ani negana ibounai do ia haorea diba. Bona laloaboio lasi, moale karadia be idauidau. Ita momo be ruma murimurinai tauanina hagoadaia karana ta ita karaia be namo, namo lasi hanaihanai ruma dekenai ita helai bona ma haida ese ita idia hamoalea. Ita raka diba, turana ida ita herevahereva diba, gadara namodia ita karaia diba.

Bema moale karadia be iseda laga-ani negadia ibounai ia haorea be kerere, vadaeni anina bada gaudia, hegeregere, iseda maduna ita ia Havaraia Diravana dekenai, ruma bese dekenai, moni gaukara dekenai, bona turadia dekenai ia hadikaia, unai be kerere bada herea momokani! Vadaeni, moale karadia ita lalohadailaia maoromaoro be gau badana! Edena bamona ita diba moale karana ta be ita dekenai ia dika, eiava ita karaia ena bada be maoro lasi?

[Pictures on page 7]

Moale karadia haida be iseda kudouna idia hamarerea bona unai amo lalo-parara ita abia diba