Doketa Ena Gwauhamata
LAGANI 7 gunanai, lagani 10 mero Dai Suzuki ia mase aksiden dekenai. Niuspepa torea taudia ese Dai ena tama bona sina dekenai kerere idia atoa, badina idia ese Baibel ena taravatu idia badinaia dainai gwaumaoro idia henia lasi edia natuna be rara idia henia totona. Dai ena tama bona sina be Iehova ena Witness taudia. Polisi taudia ese Dai ena mase dalana idia tahua namonamo neganai, idia davaria Dai ena tama bona sina edia kerere be lasi.
Iehova ena Witness taudia Japan ai bona ma gabu idauidau ai ese doketa taudia edia gaukara idia abia dae bada bona idia ura idia ida idia gaukara hebou namonamo. Doketa ese idia henia muramura bona gorere hanamoa daladia idia badinaia, rara sibona idia dadaraia. Bema doketa idia gaukaralaia dalana be Baibel ena taravatu ia utua, idia ese Dirava sibona idia kamonai henia. (Kara 4:19) Baibel ia gwau: “Rara umui ania lasi.”—Kara 15:29.
Dirava ena hereva idia badinaia maoromaoro, Iehova ena Witness taudia be rara idia abia lasi to muramura bona gorere hanamoa daladia idaudia idia ura abia. Doketa taudia idia hekwarahi bada rara henia lasi dalana amo gorere taudia idia hanamodia toho totona. To hari, doketa bona hosipele momo be dala idia kehoa Iehova ena Witness taudia durudia totona. Haheitalai ta be Japan dekenai, niuspepa ta ladana Mainichi Shimbun, ia gwau, hari “hosipele haida be rara idia gaukaralaia lasi taunimanima idia ivaia neganai, bona rara bada ia diho garina kara haida idia karaia diba.”
Niuspepa ia gwau, Ageo Kosei Hosipele dekenai Iehova ena Witness taudia 14 be lagani 1989 ia lao January 1992 ai, rara henia lasi dekenai idia ivaia bona idia namo. Unai hosipele edia gaukara ta be Witness gorere tauna ida do idia helai hebou ia haboioa rara ena bada bona rara henia lasi dalana amo idia ivaia karana ena dika idia hahedinaraia namonamo. Gorere tauna amo gwaumaoro pepana idia abia murinai, doketa ese idia ivaia neganai rara idia henia lasi.
Hosipele haida ese Witness gorere taudia idia abidia dae lasi, to dahaka dainai unai hosipele ese Witness taudia edia ura idia matauraia bona idia abidia dae? Niuspepa ladana Mainichi Shimbun ese unai hosipele naria doketa Toshihiko Ogane ena hereva ia torea, ia gwau: “Doketa ta ese gwauhamata ia karaia neganai iena maduna be gorere tauna ena ura ia badinaia bona gorere tauna ia durua totona. Gorere tauna bona doketa idia herevahereva namonamo be gau badana.”
Unai niuspepa ma ia gwau: “Iehova ena Witness taudia ese taoni ibounai 53 lalonai hosipele ida idia herevahereva komiti idia karaia edia taunimanima durudia totona. Unai komiti edia gaukara be hosipele taudia ida rara henia lasi dalana amo idia ivaia karana idia herevalaia.” Unai idia karaia dainai, iunivesiti hosipele momo bona ma hosipele badadia haida be Witness idia durudia.
Hari, doketa taudia 1,800 Japan dekenai bona ma 24,000 tanobada ibounai ai idia ura rara idia henia lasi Witness taudia dekenai. Hosipele danu idia herevahereva hebou komiti idauidau 800 bona ma haida be doketa momo idia hereva henidia vadaeni, bona unai doketa idia laloa “doketa ena gwauhamata” dainai gorere tauna ena ura idia matauraia be namo.