Hoa Karadia Karaia Taudia Lasi Bona Dirava Taudia Lasi

MERCY UWASI ESE SIVARAI IA GWAURAIA, NIGERIA AMO

LAU davaria hisihisina be March 1992 ai, West Africa ena siahu adorahi kahana dekenai lau abia matamaia. Lau be egu ruma bese taudia ida ai lao emai uma dekenai maniota ai geidia totona. Unuseniai, egu bogana dekenai gau ta ese ia araia bamona hisihisi mamina lau abia matamaia. Ruma dekenai ai giroa lou neganai, unai hisihisi be ia bada herea momokani, lahi bamona. Lau mumuta; lau hahodi be ia auka. Ena be hisihisi be ia bada dainai lau gini eiava lau raka be ia auka, to egu sinana ese lau ia atoa taxi dekenai, bona ai heau haraga, kahirakahira ia noho hospital dekenai lau idia abia lao.

Unai neganai hospital dekenai ia gaukara doketa tauna be guna Baibel ena helaro lau haroro henia tauna. Doketa tauna ese egu bogana ia daua toho; ia gudu. Ia henanadai, ia gwau egu rara ia diho eiava, bona egu sinana ia gwau oibe badina hua gorerena lau abia.

Unai doketa ia gwau: ‘Oiemu natuna kekeni be mai bogana bona ena hua be ima. Rara ia diho badina bogana lalonai ia noho natuna ia hamasea toho.’

Sinagu ia gwau: “Doketa, Lasi! Ia be unai bamona kekeni lasi.”

Doketa ia gwau: “Unai bamona oi hereva lasi. Hari inai negai kekeni momo ese edia tamadia bona sinadia idia koidia. Ia rogorogo vadaeni.”

Bena lau hereva. Lau gwau lau be Iehova ena Witness kekenina ta bona Keristen ruma besena lalonai lau tubu daekau bona Baibel dekena amo lau idia hadibaia dainai egu lalona ena mamina ese lau ia koua dainai sihari kava karana ta do lau karaia diba lasi.

Doketa ia haere neganai sinagu dekenai ia gwau: “Kekeni sinana e, tomadiho herevana ita kikilaia lasi to lau ura oi laloa maoromaoro. Oi lau hamaoroa inai kekeni be hua ima ia rogorogo vadaeni.”

Sinagu be lau dekenai ia gwau: ‘Oi toreisi, hospital ma ta dekenai do ita lao.’ Unai ruma ai rakatania neganai, rei dekenai lau helai bona lau tai badina hisihisi be ia bada herea momokani. Sinagu ese karaharaga lau ia abia lao ruma dekenai, bona doketa ena hereva be egu tamana dekenai ia herevalaia.

Idia laloa namona be ena durua kohu momo ena hospital badana ta dekenai lau idia abia lao, ia be doketa hadibaia hospital unai. Unuseniai ai lao noho neganai, Iehova dekenai lau guriguri lau ia hamauria totona, bona taunimanima ese iena ladana helagana do idia gwauraia dika lasi totona, do idia gwau lasi lau rogorogo bona natuna lau hamasea toho dainai lau mase. Lau gwau bema lau mase, Iehova ena Witness taudia ese unai doketa dekenai idia lao haroro neganai, do ia gwau: ‘Umui emui kekeni ta be ia rogorogo bona guna iniseniai ia mai, ani?’ Danu, bema mai egu dala lau ura unai doketa dekenai do lau giroa lou lau haroro henia lou totona lau gurigurilaia.

“Ia be Do Rami-Hebou Kekenina Ta!”

Hospital gunana dekenai ia vara hepapahuahuna be hospital badana dekenai ia vara danu; doketa taudia idia laloa lau rogorogo. Hisihisi bada herea lau ania. Lau taitai noho. Doketa ta ese lau ia hereva auka henia, ia gwau: “Umui kekeni taudia be vaia emui kara. Umui rogorogo, bena murinai umui boiboi.”

Doketa taudia ese gorere tahua karadia haida idia karaia. Bena unai idia karaia lalonai mai badu danu lau idia henanadai henia. Idia gwau: “Oi headava?”

Lau gwau: “Lasi.”

“Oiemu lagani be hida?”

“Egu lagani be 18.”

“Tatau hida danu umui mahuta hebou?”

“Ta lasi.”

Murinai doketa badana ia boiboi, ia gwau: “Dahaka oi hereva? Oi gwau oiemu lagani be 18 bona tau ta umui mahuta hebou lasi, a?” Hospital ginigunana dekenai lau hereva hegeregerena lau hereva lou, idia dekenai lau badinaia Keristen karana lau gwauraia hedinarai. Bena lau ia nanadaia lau be Iehova ena Witness kekenina ta eiava. Lau gwau, oibe. Murinai, lau dekenai henanadai ma ta ia henia lasi.

Egu gorere idia tahua karana amo ia hedinarai lau rogorogo lasi. Sinagu ese doketa ta ena hereva doketa haida dekenai ia kamonai. Unai doketa ia gwau: “Ia be do rami-hebou kekenina ta!” Doketa taudia be sori herevana idia gwauraia, idia gwau: “Ai lalohadai kerere be mai ena badina. Dina ta ta iboudiai idia rogorogo kekenidia ai itadia.” To, unai be lauegu hekwakwanai ginigunana sibona.

‘Rara Do Oi Abia’

Egu gorere be ultrasound masini amo idia tahua bona ia hedinarai egu Fallopian tube dekenai gau ta ia tubu bada. Ena bada be grapefruit maragina ena bada hegeregerena. Lau idia ivaia be gau badana.

Gari lasi dekenai lau hamaorodia rara henia hanai karana do lau abia lasi, to ranu ma haida lau dekenai do idia henia hanai diba. Idia hereva goadagoada, idia gwau rara lau abia be gau badana.

Stiuden doketa ta ese lau ia hevaseha henia, ia gwau: “Guna oiemu orea tauna ta be oi hegeregerena ia hereva. To ena gorere ia bada ia lao neganai, ia gwau rara ia dekenai ai henia hanai diba.”

Lau haere, lau gwau: ‘To lau be idau, badina lau gwau oibe do ia oibe, bona lau gwau lasi do ia lasi. Lauegu abidadama karana do lau hadikaia lasi.’

Gabeai, doketa taudia toi be lau hekure patana dekenai idia mai bona dahaka dainai rara henia hanai karana lau dadaraia idia henanadailaia. Lau hahedinaraia Baibel ia gwau Keristen taudia be “rara . . . idia rakatania.”​—Kara 15:20.

Mai edia goada danu idia gwau: ‘To uduna amo do oi inua lasi, emu varovaro ta amo do oi abia.’

Lau gwau, herevana ta be uduna amo eiava varovaro amo idia henia hanai, to unai be kara tamona.

Saturday, March 14 ai, hisihisi lau davaria matamaia negana ena pura ta murinai, ivaia gaukara ia karaia doketa badana ese lau ia sekea. Ia ese lau do ia ivaia. Unai neganai egu kemena danu ia gudu.

Lau dekenai ia gwau, “Rara henia hanai karana oi dekenai do ai karaia oi idia hadibaia vadaeni, a?

Lau haere, lau gwau: “Doketa e, lau idia hadibaia, to rara do lau abia diba lasi.”

Ma ia hereva, ia gwau ‘Gau ta oi lau hadibaia inai, rara do oi abia. Bema rara oi abia lasi, do oi mase. Monday dekenai, do lau mai neganai, bema oi totona rara idia hegaegaelaia lasi, oi do lau ivaia lasi. Rara lasi neganai, ivaia karana lasi.”

Egu mahuta patana dekenai buka ta ia itaia bona ia gwau, “Inai be oiemu Baibel?” Lau gwau, lasi; unai be egu Tau Hereadaena bukana.a Ia gwau namona be unai buka lau gaukaralaia lau guriguri do lau mase lasi totona. Lau hamaoroa buka amo guriguri ai duahidia lasi. Hekwakwanai ai davaria neganai, emai kudouna dekena amo Iehova ai guriguri henia.

Murina dina rua lalodiai, doketa bona sisita lau dekenai idia mai loulou bona lau idia doria toho rara henia hanai karana do lau abia totona. Idia gwau lau be do matamata dainai lau mase be namo lasi. Idia gwau: “Rara oi abia bona oi mauri.”

“Iehova be Egu Kahana Dekenai Ia Gini”

Unai lalo-hekwarahi negadia lalodiai, lau ese Salamo 118 lau duahia, ena hereva haida be inai: “Egu hisihisi lalona amo Iehova lau boiboi henia, bena Iehova ese lau ia haere henia bona lau ia ruhaia. Iehova be egu kahana dekenai ia gini; do lau gari lasi. Tanobada tauna ese dahaka kara dikana be lau dekenai ia karaia diba?”​—Salamo 118:​5, 6.

Unai siri lau lalohadailaidia namonamo murinai, egu abidadama Iehova dekenai ia goada. Unai dina ena daba kahanai egu tamana bona sinana be hospital dekenai idia mai. Lau ese unai salamo idia dekenai lau hahedinaraia, bona edia abidadama ia hagoadaia danu.

Unai nega lalonai, rara lau dadaraia dainai Sinagu bona Tamagu ese lau idia hagoadaia noho, to unai sibona lasi, lau totona idia guriguri danu. Egu kongregesen taudia ese lau totona idia guriguri bona Baibel dekena amo lau idia hagoadaia noho.

“Ai be Hoa Karaia Taudia Lasi”

Monday, March 16 ai, lau idia ivaia gwauraia dabana unai, doketa ta ese lauegu daiutuna dekenai ia mai bona ia itaia egu imana dekenai Medical Directive kadi lau dogoatao, unai kadi ese rara henia hanai karana dekenai lauegu ura ia gwauraia hedinarai. Ia gwau, “Edena bamona? Oi hereva hegeregerena do oi karaia, a?”

Lau gwau: “Oibe, rara do lau abia lasi.”

Ia gwau: ‘Vadaeni, oi do ai ivaia karana do ai koua. Oi do idia ivaia lasi.’

Bena doketa be egu daiutuna amo egu sinana ia telefon henia. Sinagu ia gwau: “Ia bada vadaeni, sibona ena dala ia abia hidi diba. Ia totona dala do lau abia hidi diba lasi. Ia gwau Baibel amo diba ia abia vadaeni bona ena lalona ena mamina dainai rara ia abia diba lasi.”

Unai hereva ia kamonai neganai egu gorere idia gwauraia pepadia ia negedia pata ta dekenai bona mai ena badu ida egu daiutu amo ia raka oho. Hora ima lalodiai hereva ma ta ai kamonai lasi. Hisihisi bada lau ania noho bona lau aniani diba lasi. Bona unai gabu dekenai hospital ma ta be lasi.

Vadaeni, lau hoa, huaia gauna ta idia mailaia ivaia gabuna dekenai lau idia abia lao totona. Egu imana dekenai “No Blood” kadi lau dogoatao. Ivaia daiutuna dekenai lau idia abia lao neganai edia gaukara gaudia bona rara pusedia danu lau itadia. Lau taitai bada herea, lau gwau lau ura lasi rara lau abia. Sisita ta ia gwau namona be unai kadi be reirei dekenai do lau hamorua. Ia gwau ivaia daiutuna lalonai do lau abia lao diba lasi. Lau hamaoroa bema unai kadi lau abia vareai diba lasi, ivaia daiutuna dekenai do lau vareai lasi, badina lau ura ivaia doketa badana dekenai lau hahedinaraia. Vadaeni sisita ese mai badu danu lau dekena amo kadi ia veria bona ivaia daiutuna dekenai ia laohaia bona ivaia doketa tauna dekenai ia hahedinaraia. Karaharaga ivaia doketa badana bona doketa ma ima mai edia gaukara dabua danu idia raka lasi bona lau dekenai idia mai.

Ivaia doketa badana be ia badu dikadika. Sinagu ia boiria mai, egu bogana ia duduia, bona sinagu dekenai ia gwau: “Kekeni sinana e. Ai diba lasi iena bogana lalonai dahaka do ai davaria. Bema ai ivaia bada, rara bada herea do ia haboioa. Oi ura ena rara do ia ore ela bona ia mase, a?”

Sinagu ia haere henia, ia gwau: “Doketa e, Lau diba Iehova ese kekeni do ia durua. Bona oi do ia durua danu. Gaukara oi karaia namonamo, bona Iehova ese gaukara orena do ia karaia.”

Bena doketa ia gwau: “Ai be hoa karaia taudia eiava tubutubu gaudia amo muramura karaia taudia lasi. Ai diba gaudia amo ai gaukara. Bema rara lau gaukaralaia lasi inai ivaia gaukarana do lau karaia diba lasi.”

Egu sinana be ia dekenai ma ia noinoi unai gaukara do ia karaia totona. Gabeai, ia gwau do ia ivaia to rara do ia gaukaralaia lasi. Lau ia nanadaia lau gari eiava. Lau haere, lau gwau: “Mase garina lau gari lasi. Lau diba Iehova be egu kahana dekenai ia gini.”

“Emu Dirava Oi Hesiai Henia Noho”

Lau idia ivaia ena nega be hora tamona ia abia lasi. Lau idia ivaia bona hekwarahi lasi dekenai egu lalona dekenai ia tubu gauna idia kokia dainai, hospital taudia idia hoa.

Gabeai, doketa ta ese egu sinana ia hamaoroa stiuden doketa be hanuaboi dekenai, edia mahuta daiutudia lalodiai, lauegu sivarai idia kikilaia. Harihari, lau eiava Sinagu be unai hospital dekenai ai lao neganai, ai idia matauraia.

Lau idia ivaia murinai dina rua neganai, ivaia tauna be lauegu wodi dekenai ia vareai, lau namo eiava lau ia nanadaia, bena murinai ia gwau: “Namona be oiemu Dirava oi hesiai henia noho. Ia ese oi ia durua bada.”

[Footnotes]