“Oi Gwau Lasi Dala be Lasi!”

KOHELETE 9:11 ia gwau: ‘Nega bona kara be idia vara kava sibona, ita ibounai dekenai.’ November 1986 ai, unai ia vara aiemai ruma bese dekenai. Unai neganai, aiemai natudia toiosi ta, Tiarah, be ia gorere matamaia neganai, iena lagani be toi mai kahana. Ai laloa unai be kuru bona huahua gorerena sibona. Ai laohaia maragidia edia doketa dekenai, bena ia siaia doketa idauna ta dekenai. Unai doketa ia gwau, iena gorere be udu kurukuru bona ena kemena lalonai kwama sisina ia noho danu, to unai be gorere badana lasi. Pepa ia torea, huahua muramurana bona antibaiotik muramurana do ai hoia Tiarah ena.

To Tiarah ena gorere ia bada ia lao. Fiva ia abia, ena tauanina ena siahu ia daekau 41° C. dekenai, bona ia mumuta, ia kukuri ranu, bona ena kemena ia hisihisi. Doketa ese ia siaia x-ray abia totona, bona antibaiotik muramurana sisina momo ia henia. Tiarah ena x-ray idia abia neganai, sisita ese ai ia boiria mai. Doketa idia laloa niumounia gorerena ia abia. Iena fiva ia bada ia lao, ia daekau 43° C. dekenai. Unai ese ena rara ia hadikaia, ia diho 2.0 dekenai. December 16 ai, hospital ai idia atoa.

Ai be Iehova ena Witness taudia, bona Baibel ena hereva, “rara umui ania lasi” herevana, be ai badinaia. (Kara 15:29) To unai neganai unai ai laloa momo lasi, badina be Tiarah ena doketa be rara diba momo tauna, bona ia diba ai ese rara do ai abia dae lasi. Tiarah be hospital ai idia atoa gwauraia neganai, ai hamaoroa lou rara be taravatu ai dekenai. Ia gwau: “Oibe, oibe, emui lalohadai lau diba, to lau laloa do idia ura lasi rara do idia henia.”

Hospital taudia ese Tiarah ena x-ray idia abia, iena kudouna bona ena rarana idia tohoa, bena daiutu ta dekenai idia laohaia. Ai be ia ida ai noho ela bona ia mahuta. Dabai, doketa ese lau ia hamaoroa, Tiarah ese niumounia gorerena dikana ia abia, unai dainai dina 10 o 15 bamona hospital ai do ia noho. Doketa idia laloa momo, badina iena tauanina ena siahu be 43° C. bamona nega ibounai. Iena x-ray bona ena kudouna bona ena rarana edia ripoti idia itaia lou neganai, edia lalona idia hadaia hetoho ma haida do idia karaia. Unai hetoho ese idia hahedinaraia iena gorere be niumounia lasi, to gau ta be ena baragina ai ia tubu.

Idia Ura Rara Idia Henia

Idia tohoa ia be mai ena TB gorerena eiava, to unai gorere be lasi, bona hetoho ma momo idia karaia. X-ray idauidau momo, sonogram, bona CAT skan idia abia. X-ray ginigabedia ese idia hahedinaraia ena baragina idibana be mai ena gorere bada. Unai dainai ena baragina laurina sibona amo ia hahodi diba, to unai baragi ena goada ia ore gwauraia. Tiarah be hospital ai ia vareai neganai, emai lalohadai be pepa dekenai ai torea bena ai sainia, ai gwau gwaumaoro ai henidia lasi rara be Tiarah do idia henia, bona bema rara ia abia lasi dainai do ia mase, do ai samanidia lasi. To ena mauri ia dika dainai, idia laloa emai lalohadai do ai haidaua.

Aiemai lalohadai ai haidaua lasi neganai, hospital haheaua taudia ese ai idia hamaoroa ai be tama sina dikadia, unai dainai kota amo gwaumaoro do idia abia, rara be Tiarah do idia henia bona emai natudia oredia ruaosi aiemai amo do idia kokidia totona. Idia gwau, kota ena gwaumaoro pepana do idia naria, bena do idia abia neganai Tiarah ena baragina mai ena gorere do idia kokia. Nega momo ai hamaorodia vadaeni hegeregerena, ai hamaorodia lou, doketa edia heduru ai dadaraia lasi, bona ena be rara ai abia dae lasi, to rara durua muramuradia idaudia ai abidia dae diba.

To emai hereva idia abia dae lasi. Ai idia doria toho, emai lalohadai do ai haidaua totona. Idia ese Tiarah ena uodi ai idia gaukara taudia iboudiai​—⁠doketa, sisita, bona ruma hagoevaia taudia​—⁠idia hamaorodia emai natuna be edena bamona ai kara henia. Bena unai taudia be ai dekenai idia mai, ai idia nanadaia, dahaka dainai aiemai natuna ena mase ai koua toho lasi. Lauegu tau bona lau danu ese doketa ai hamaorodia, doketa idauna ta, rara do ia henia lasi tauna, bona hospital idauna ta danu be do ai tahudia. Ai idia hamaoroa, ia gorere bada dainai dala be lasi do idia abia lao hospital idauna ta dekenai. Lau hamaorodia, lau gwau: “Umui gwau lasi dala be lasi!”

Ena be Do Ia Mase Reana, to Rara Ia Ura Lasi

Doketa edia hereva bona Iehova ena ura danu be Tiarah lau hamaorolaia. Lau hamaoroa emai lalona ai hadaia, doketa ta, rara do ia henia lasi tauna, bona hospital idauna ta do ai tahudia. Ena be Tiarah be kekeni maragina, to lau gwauraia gaudia ia lalo-pararalaidia. Ena be ia gorere bada, to ia ura Iehova do ia kamonai henia. Ena be reana do ia mase, to rara ia ura lasi. Unai bamona ia hereva neganai lau tai. Unai neganai lau lalo-parara, memero kekeni idia maragi herea neganai, edia tamadia sinadia ese Baibel ena hereva idia hadibalaidia be gau badana. Ena be Tiarah ena lagani be toi mai kahana mo, to hereva haragadia amo ai ia hamaoroa, ia ura Iehova do ia badinaia, herevana do ia mase.​—⁠Efeso 6:4; 2 Timoteo 3:15.

Dala ai tahua, hospital taudia ese kota ena gwaumaoro idia do abia lasi neganai Tiarah be hospital amo do ai kokia totona. Egu tau ese kongregesen ena elda tauna ta ia hereva henia. Unai elda tauna ese doketa idauna ta ia hereva henia, bona unai doketa ia gwau Tiarah do ia durua toho. Unai dainai helaro ai abia.

Tiarah be hospital ai ia vareai bena kerukeru adorahi amo lau be nega ibounai ia dekenai lau noho, unai dainai lauegu goada ibounai ia ore. Lauegu adavana lalokauna be unai ia diba dainai, lau ia hamaoroa, ruma dekenai do lau giroa lou bena unai hanuaboi ai ia be Tiarah dekenai do ia noho. Lau lao ruma, to lau mahuta diba lasi. Ruma lau hagoevaia, egu tamana sinana lau rini henidia, bona egu turadia haida, Witness taudia unai, lau hereva henidia danu. Lau mahuta haraga diba lasi, to gabeai lau mahuta neganai telefon ia boiboi. Lau ura lasi lau abia, egu tau ese lau ia rini henia bona Tiarah ena mase lau ia hadibaia gwauraia garina.

Lau naria sisina bena telefon lau abia. Doketa, elda tauna ese ia hereva henia tauna unai, ese lau ia hamaoroa doketa ma ta ia davaria, ena lalona ia hegeregere aiemai ura rara dekenai do ia matauraia, bona ena be Tiarah ia gorere bada to iena hospital dekenai do ia laohaia. Dala ia lailaia vadaeni Tiarah be aiemai hospital amo do idia kahua nege! Mai egu tai ida lau tanikiu henia. Lau hereva henia murinai, lau tui diho, Iehova lau tanikiu henia.

Tiarah be dina 10 hospital ginigunana ai ia noho, bena hospital idauna ta ai idia abia vareai New York City ai. Unai hospital ai memero kekeni mai edia baragi goreredia idia hanamodia toho. Tiarah ia ginidae neganai, ia idia naria noho. X-ray idauidau idia abia, CAT skan, bona sonogram danu, bona ena kudouna bona ena rarana idia tohoa. Hospital ginigunana ena ripoti danu idia tahua namonamo. Unai ibounai idia sekea murinai, iena doketa matamatana, baragi ena doketa, ia gwau rara do idia henia be kerere, badina iena tauanina ese do ia dadaraia.

Ena be Rara Ia Abia Lasi to Ia Namo Lou Vaitani

Tiarah be unai hospital ai ia noho neganai idia naria namo herea. Iena gorere dainai hekwakwanai idia vara negadiai, ai dekenai idia herevalaidia bona do idia karaia karadia na ai idia hamaorolaia guna. Idia hamahutaia momokani lasi, to ena tauanina ena kahana idia hamasea, bena nila amo ranu sisina be ena baragina ena kahana amo idia veria. Unai ranu dekenai antibaiotik muramuradia idauidau idia atoa, bena idia davaria huahua gorerena ia hanamoa antibaiotik muramurana ese iena gorere ia hanamoa diba. Unai muramura idia henia loulou, bona ia be dina 10 plastik kalagana maragina ta lalonai ia hekure neganai oksigen idia henia. Metaira-metaira ia namo ia lao.

Doketa ese iena CAT skan bona x-ray idia itaia namonamo neganai, idia davaria iena baragina idibana ena henuna kahana be mai ena toto. Ena be antibaiotik muramurana ese ena baragina ena kahanai ia noho ranuna ia hamaragia, to unai toto ia hanamoa lasi. Toto ese ranu ia habadaia dainai, doketa idia laloa toto do idia utua oho be namo reana. To, unai antibaiotik muramurana bona muramura idauna idia henia noho. Danu, aion muramurana momo idia henia bona dina toi lalodiai ena varovaro amo mo idia ubua, bena unai murinai aniani korikorina sisina-sisina idia henia. Iena rara ia bada ia lao, ena maka ia daekau 5.0 dekenai bena 7.0 dekenai. Rara ena doketa bona baragi ena doketa idia hoa, badina Tiarah ia namo ia lao haraga noho. Baragi ena doketa ia gwau: “Emui Dirava ese ia durua noho.”

Antibaiotik muramurana ese toto ia hanamoa lasi dainai, doketa ese toto ena rara idia tohoa. Idia davaria antibaiotik idauna ta ese unai toto ia hanamoa diba. Unai toto havaraia gauna bona huahua gorerena havaraia gauna be tamona, unai dainai doketa ia laloa, nega ta Tiarah ia aniani neganai unai gau be ena aniani dekenai ia kamokau bena ia hadonoa neganai aniani sisina ia diho kerere, bena unai gau ida ena baragina ai ia vareai. Antibaiotik muramuradia ese unai gorere idia hadarerea toho, to unai ese unai gorere havaraia gauna maragi-maragina ia hamagua bamona, bena toto dikana ai ia lao. Doketa ia gwau, unai be idau vaitani dainai ena sivarai ibounai do ia siaia, doketa taudia edia magasin ta lalonai do idia torea totona.

Tiarah be hospital ai ia noho hua tamona, bena idia hadokoa. Unai murinai, pura ta ta iboudiai ia lao spesel doketa dekenai, antibaiotik bona aion muramuradia abidia totona, ela bona hua toi idia ore. To nega ta doketa ese idia ivaia lasi. Hari iena gorere ia ore vaitani, bona ena baragina ai dika ta be lasi.

Hari inai negai Tiarah be pablisa ta Iehova ena Witness taudia edia Keristen ekalesiana lalonai. February 14, 1991 ai, iena hereva ginigunana ia henia, kongregesen ena Haroro School ai. Lau mai egu tau ida ese Iehova ai tanikiu henia, badina be ia ese ai ia hanamoa, iena hahegani hegeregerena rara ai dadaraia dainai. Namona be ita iboudiai ese Iehova ita hanamoa noho, badina unai hahenamo ia abia be maoro. Ma danu, namona be oi laloatao, bema doketa ia gwau, bema rara oi abia lasi mauri dalana be lasi, oi hamaoroa, oi gwau: “Oi gwau lasi dala be lasi!”​—⁠Nina Hooks, Brooklyn, New York ai ese inai sivarai ia torea.