Kibi—Tuari Gabuna amo Ia Lao Miusiki Rumana Dekenai

PAVAPAVA Abaisa ena nega lalonai, Iuda tuari taudia 400,000 be idia dagedage henidia tuari taudia 800,000 ese, hehuni dalana amo, idia koua hegege. Toana be idia heau mauri diba lasi. Vadaeni, kibi edia rege idia kamonai! Iuda taudia edia lalona ia hagoadaia momokani dainai, mai regerege bada ida tuari boiboina idia karaia, bena tuari totona idia heau lao. Ena be edia inai taudia be momo herea, Iuda taudia ese idia halusidia.​—2 Sivarai 13:​1-20.

Unai kibi idia kamonaia ese edia kudou ia hamareredia momokani! Ia dainai, Iuda taudia ese Iehova ena gwauhamata idia laloa lou: “Bema umui dekenai idia tuari henia taudia ese emui tano dekenai umui idia hadikaia, bona umui idia tuari henia neganai, kibi do umui hiriria kwadogi, to mai regena bada. Unai neganai lau, Lohiabada, emui Dirava, ese umui do lau laloa, bona umui do lau hamauria, umui idia hadikaia taudia dekena amo.” (Numera 10:9) Iuda taudia be kibi idia hiriridia ese edia abidadama Iehova dekenai ia hahedinaraia, bona unai abidadama ena ahuna idia abia.

Unai Baibel sivaraina gunanai, kibi idia noho. Auri amo idia havaraia kibi idia gaukaralaidia Aigupito lalonai, lagani 2,000 B.C.E. bamona ai. Gunaguna kibidia bona hari ita diba kibidia edia idau be bada. Lagani momo lalonai edena bamona unai miusiki havaraia gauna idia haidaua noho, mani oi laloa.

Kibi Gunadia

English gado ai, unai hereva, “trumpet,” be France gado gunana herevana, trompe, anina be elefante ena udu baubauna, amo idia abia. Reana, kibi gunadia edia toana be elefante ena udu baubauna ena toana bamona. Helene toretore tauna Aeschylus (525-​456 B.C.E.) ese kibi ena rege ia gwauraia “hamakohia gauna.” Tuari, mase, aria, spot gadara, bona ma taunimanima momo idia noho negadia sibona lalonai idia gaukaralaia diba.

Ena be Israela ena kibi idia gaukaralaia tuari lalonai, to dubu helagana lalonai miusiki totona idia gaukaralaia danu. Diba momo taudia ese siliva idia gaukaralaia bona kibi namo herea idia karadia. Dubu helagana lalonai, kibi taudia edia gadara hebou dalana dainai, idia gwauraidia “tau tamona bamona, regerege tamona idia havaraia [dala goevadaena ai, Today’s English Version].”​—2 Sivarai 5:13.

Unai dainai, Israela ena kibi edia toana eiava edia regena be dika lasi. To, edia dekena besedia edia kibi bamona, tiuni haida sibona idia havaraia diba. Ma lagani handred haida do idia hanai ela bona kibi idia hanamoa.

Harihari Kibidia Havaraia Dalana

Kibi ena karaia dalana idia haidaua ma tiuni haida ia havaraia totona. Guna, idia halataia. Idia laloa kibi latana ena tiuni idauidau be do idia momo. Lagani 500-1300 C.E. ihuanai idia karaia kibi ta (ladana be buisine) ena lata be 1.8 mita! Mani oi laloa, unai idia gadaralaia be auka herea. Unai dainai, lagani 1400 C.E. gunanai, kibi idia hanamoa totona idia haidaua, ena toana be “S” bamona. Lagani handred ta murinai, ena toana be “O” latana ta bamona, mai ena rigidia toi, laini tamona lalonai.

Kibi matamatana be tiuni ma haida ia havaraia diba, to ataiai regedia sibona. Unai tiuni havaraia be auka. To haida be unai bamona miusiki idia torea matamaia clarino totona. Unai nega ena miusiki torea tauna ta mai ena ladana bada be Johann Sebastian Bach (1685-1750).

Gabeai, kibi dekenai, idia giroa baubau bamona gaudia ma haida idia gwauraia crooks idia atoa. Lalohadai be auka lasi: Ma baubau gaudia be hodahoda gabuna ena lata ia habadaia, unai amo tiuni idauidau ma haida idia karaia diba. Crooks be kibi ena tiuni idia hadihoa F amo ia diho lao ela bona B flat dekenai.

Unai dainai, Wolfgang Amadeus Mozart (1756-1791) ena nega ai, ataiai regena ia havaraia clarino idia gadara lasi. Clarinet be mai hekwarahi lasi ida ataiai regedia ia havaraia diba, bona kibi ese ihuanai regedia ia havaraia.

Unai kibi matamatana be namo herea. To gadaralaia be auka sisina, badina imadia ruaosi amo crooks idia haidaua toho. Unai dainai, ma gau haida idia haidaua be namo.

Kibi mai Ena Ki Haida

Lagani 1760 ai bamona, Russia ena miusiki havaraia tauna ladana Kolbel be diba matamata ia abia. Kibi ena uduna kahirakahira dekenai matu ia karaia, bona ki ta mai ena dabua taina amo unai matu ia koua eiava kehoa. Ki ia kehoa neganai, kibi ena tiuni ia abia isi sisina miusiki nouti ta ta dekenai. Lagani 1801 lalonai, Vienna amo ia mai kibi gadaralaia tauna ta, ladana Anton Weidinger, ese Kolbel ena kibi ia hanamoa, bona kibi ta ia karaia mai ena ki ima. Vadaeni, unai kibi idia hiriria neganai ena rege ia diho bona ia daekau momokani, bona idia dogoatao be auka lasi.

To Weidinger ena kibi danu be mai ena hekwakwanai badana ta. Ki idia kehoa neganai, kibi regena idia haidaua bona ena goada idia hamanokaia. Unai dainai, kibi mai ena ki idia rakatania, bona ia idau vaitani lalohadai matamatana idia abia kibi havaraia totona.

“Valve” Kibina Ginigunana

Lagani 1815 lalonai, Silesia tauna, Heinrich Stölzel ese gwaumaoro ia hoia kibi mai ena piston eiava valve ia havaraia totona. Idia karaia namonamo matudia amo, valve ta ta ese hoda ena heau dalana ia haidaua bena ia lao crook idauidau lalonai. Unai amo, crook idauidau mai edia lata idauidau be nega tamona ai idia gaukaralaia diba. Danu, valve be mai edia spring dainai, idia haidaua haraga diba.

Guna, unai kibi ena rege be maoromaoro momokani lasi. To, lagani haida lalodiai idia hanamoa, bona valve kibina be hari idia gaukaralaia.

Miusiki Idauidau Ia Havaraia Diba

Kibi be mai ena gabu miusiki idauidau momo lalodiai. Ena rege be gado regena bona ma miusiki havaraia gaudia idauidau ida idia gadaralaia namonamo hebou diba. Ena rege goadana be namo hebou badadia hamatamaia bona ami taudia idia raka hebou totona. Danu, ena rege namona be concerti, operas bona jazz totona ia hegeregere. Ane amo sivarai idia anelaia bona kibi sibona idia gadaralaia neganai danu ia namo herea.

Oibe, kibi havaraia dalana ena sivarai be lata. Hari, ia be tuari taudia ese idia gaukaralaia gauna sibona lasi. Kibi amo, kibi gadara tauna ese miusiki namo herea ia havaraia diba​—ia manada momokani neganai. Herevana edena bamona miusiki oi ura, reana kibi ena rege oi moalelaia. Iseda Havaraia Tauna ita tanikiu henia be namo, badina diba ia henidia dainai taunimanima be miusiki havaraia gaudia, kibi bamona, idia karaia diba!

[Picture Credit Line on page 17]

Kibi mai Ena Ki bona Slaid Kibina: Encyclopædia Britannica/11th Edition (1911)