Baibel Ena Haere

Baibel ese Taunimanima Edia Lalohadai Ia Biagua Auka Toho, A?

LAHI ia bada daekau, Germany tatau badadia ese mai dava bada bukadia idia gabua noho neganai. Nazi Germany ai ia vara gauna, a? Oibe, to lagani 1199 ai unai bamona ia vara danu, Roman Katolik bisop badana ta ese oda ia karaia Germany gado Baibel ibounai idia gabua totona.

Momokani, buka gabua karana​—taunimanima edia lalohadai bona hereva biagudia auka toho karana ena toana korikorina​—be nega idauidau bona tano idauidau momo lalodiai ia vara. Nega momo, tomadiho hakaua taudia ese idia hamatamaia, badina dagi lasi taudia be sibodia edia lalohadai hegeregerena ai dahaka do idia karaia garina idia gari.

Hari momo idia laloa Baibel ese taunimanima edia henanadai ia taravatua bona edia lalohadai ia biagua auka. To unai be momokani, a? Baibel ese taunimanima edia lalohadai biagua auka karana ia abia isi, a?

‘Iehova Oi Ura Henia mai Emu Lalona Ibounai Ida’

Baibel ese laloa gaukaralaia karana ia gwauraia dika lasi. Io, Iesu ese ita ta ta ia hagoadaia, ‘Iehova ita ura henia mai iseda lalona ibounai ida.’ (Mareko 12:30) Iena hereva amo ia hahedinaraia unai nega ena sivarai idauidau (Luka 13:1-5), mauri gaudia (Mataio 6:26, 28; Mareko 7:​18, 19), biru gaukara (Mataio 13:​31, 32), bona taunimanima edia kara (Mataio 5:​28; 6:​22-24) ia lalohadailaidia badabada. Dirava ena Hereva ena hakaua herevadia bona ia idia hakala henia taudia edia noho bona laloa dalana ia lalo-pararalaia bona ia mailaidia hebou totona ia laloa namonamo, iena parabole ese idia hahedinaraia.

Paulo ese Keristani taudia ibounai ia noinoi henia, Dirava idia hesiai henia mai edia “lalohadai siahuna” ida. (Roma 12:​1, NW) Tesalonika taudia ia hagoadaia ‘peroveta herevadia koikoi dekenai do idia laloa daradara lasi, bona do idia laloa kerere lasi.’ (2 Tesalonika 2:2) Helene bona Kerete taudia edia ane bona toretore (Kara 17:​28; Tito 1:12) bona edia tuari kohu bona tuari karaia daladia (Efeso 6:​14-17; 2 Korinto 2:​14-16) ia diba sisina. Gabu ta ta ena kastom karadia ia laloa danu.​—Kara 17:​22, 23.

Ena be Iesu bona Paulo be gau idauidau momo idia lalohadailaia, to idia laloa lasi idia sibodia ese dahaka be namo bona dika idia gwauraia diba. Iesu be Baibel ia dadaraia lasi sibona ena lalohadai abia isi totona, bona nega momo Baibel ena hereva ia halasia. Dirava ena ura ia karaia lasi bona ena mase boubou gauna bamona ia reaia totona Petero ese Iesu ena lalona ia haidaua toho neganai, kara haraga Iesu be haere aukana ia henia dainai ita diba unai laloa dalana ia ura lasi vaitani. (Mataio 16:​22, 23) Danu, Paulo ese Korinto taudia ia hamaoroa: “Umui dekenai lau lao neganai, hereva namo herea o taunimanima edia aonega bada herevadia lau gwauraia lasi, to Dirava ese ia gwauhamatalaia gauna sibona lau herevalaia.” (1 Korinto 2:1; The Jerusalem Bible) Iesu bamona, iena laloa dalana ena badina be Baibel.​—Kara 17:2

Baibel ese ita ia hagoadaia eda lalona ena goada ibounai ita gaukaralaia, to ita biagua danu be namo. Iehova ena lalohadai bamona ita laloa noho totona, lalohadai biagua gaukarana be Keristani taudia ta ta sibona ena maduna, ia be kongregesen ena maduna lasi. Unai hegeregerena, taunimanima ibounai vairanai Efeso taudia haida ese edia meamea karadia idia dadaraia bona Keristani taudia ai idia lao neganai, Paulo be maduna ia abia lasi edia bukadia gabua totona, to “guna meamea idia karaia taudia ese edia buka idia haboua bona taunimanima vairanai lahi badana dekenai idia gabudia.” (Kara 19: 19, JB) Dahaka dainai unai Keristani taudia idia laloa sibodia edia buka idia gabua be namo?

Dika Koua Dalana Ginigunana

Mani inai haheitalai oi laloa. Nega momo, tuari lalonai dika idia koua totona, idia vairanai haba idauidau haida do idia haginia. Jeneral namona ta lasi do ia laloa unai bamona haba ta be anina lasi bona mai heai lasi ida do ia rakatania. Keristani tauna ese kara dika ia heai henia lalonai danu, dika koua habadia haida idia noho.

Iamesi 1:​14, 15 ia gwau, “Dibagani ena badina korikori be, tau ta sibona ena ura dainai, kara dika ta ese ia veria noho, bona ia koia noho. Vadaeni iena ura dikadia be idia rogorogo bamona, unai murinai kara dika ia havaraia.” Kara dika lao henia matamaia dalana ginigunana be emu lalona dekenai ura dikana oi ubua. Unai dainai, dika koua haba ginigunana be unai ura oi ubua lasi​—emu lalohadai oi biagua.

Lalohadai ese kara idia havaraia dainai, Baibel be ita ia sisiba henia: “Nega ibounai guba gaudia do umui laloa, tanobada gaudia do umui laloa lasi.” (Kolose 3:2) Keristani taudia be lebulebu, meamea, eiava hereva momokani negea karadia lalohadailaia karana idia dadaraia neganai, edia lalona idia hadaia lasi badina unai lalohadai ese Baibel ena hereva momokanidia idia hereaia diba garina idia gari dainai. Idia karaia badina idia ura kara dika dalana dekenai ia veridia mai gaudia ibounai idia reaia.

‘Gau ta Lasi Ita Hunia Diba’

Iseda lalohadai ita biagudia ena badina badana ma ta be Iehova ita lalokau henia, bona iseda lalohadai ibounai ia diba be ita laloa bada. Iehova be iseda lalohadai hehunidia ia laloa be Salamo 44:21 ese ia hahedinaraia: “Aiemai laloa gaudia, hunia gaudia ibounai [ia] diba noho.” Paulo ia gwau iseda lalohadai dainai hahemaoro do ita abia. Ia gwau: “Dirava ese ia karaia gaudia ibounai nega ibounai ia itaia noho. Idia be hanaihanai iena matana edia vairanai idia noho. Bona Dirava ese danu iseda kara do ia kota henia.”​—Heberu 4:13; Salamo 10:4; Aonega Herevadia 6:​16, 18.

Iobu ia diba idia lalohadailaia gaudia dainai taunimanima be mai edia maduna Dirava dekenai. “Iobu . . . ese boubou ia henidia . . . ; badina, Iobu ia gwau, ‘reana egu natudia be edia kudou lalonai idia kara dika bona Dirava idia hereva dika henia.’ ” (Iobu 1:5, NW) Iehova ena matana lalonai, mai ura bada ida dala kererena lalohadailaia sibona karana be kara dika ta bamona.​—Esodo 20:17 itaia.

Ura Kwalimu Korikorina Laloa Dalana Dekenai

Baibel ese Keristani taudia ia hagoadaia edia tahua gauna be “edia laloa [idia] guia noho, Keriso do idia kamonai henia totona.” (2 Korinto 10:5) Tomadiho biagua taudia edia taravatu dainai lasi, to badina ta ta sibona ena ura ia biagua Iehova ia lalokau henia bona lalo-pararalaia bona Iena hakaua herevadia ia diba dainai, unai bamona do ia vara. Unai tahua gauna idia abia ena anina be edia laloa dalana dekenai ura kwalimu korikorina idia abia vadaeni; Dirava ena taravatu sibona ia hanaia diba lasi, bona moale habadaia gauna ta be inai: Do ita diba, iseda lalona dekenai danu, Iehova ita hamoalea noho.

[Picture Credit Line on page 14]

Bildersaal deutscher Geschichte bukana amo