Tanobada Besedia Haida—Edia Mauri Be Dika

NOGA! TORETORE TAUNA BRAZIL AI ESE IA TOREA

LAGANI 1977 ai, Somalia dekenai, Ali Maow Maalin be smolpokesi gorerena ia abia neganai, idia abia lao hospital dekenai bona niuspepa ese idia sivarailaia. Ena gorere idia hanamoa murinai, WHO (World Health Organization) be lagani 1980 ai idia gwau, smolpokesi​—lagani handred momo lalodiai taunimanima milioni momo ia hadikaia gorerena unai​—be tanobada kopina amo idia haorea vaitani. Idia gwau Ali be unai gorere abia tauna ginigabena.

Lagani 1992 lalonai, WHO ese idia halasia sivaraidia namodia ma haida be inai: Lagani 1980 bona 1989 padadiai, ogogami tanodia ai ma taunimanima momo ese inuinu ranuna namona idia abia bona toileti namodia idia gaukaralaia. Bona ogogami herea tanodia dekenai ma taunimanima momo be kliniki idia abia edia hanua dekenai. Unai dainai, unai lagani lalodiai gabu haida dekenai maragidia edia mase edia momo be ia diho.

Hagaria Sivaraidia

To gau dikadia danu idia vara, bona idia bada idia lao. Hagaria sivaraidia haida mani oi laloa.

HIV/AIDS​—Tanobada hegegemadai, taunimanima 17,000,000 mai kahana be HIV jems idia abia vadaeni, AIDS gorerena idia havaraia gaudia unai. Vanegai, lagani tamona lalonai, 3,000,000 bamona ese idia abia, unai be 8,000 dina ta ta ai. Memero kekeni milioni ta mai kahana ese HIV idia abia vadaeni. Do idia mase neganai, reana unai ese memero kekeni hamauridia gaukaradia edia anina do ia haorea. Bona Asia bona ma gabu momo dekenai, unai gorere be hari ia daihanai haraga matamaia mo. Aids and Development ia gwau, HIV idia abia taudia 100 100 amo 80 bona ma haida be ogogami tanodia dekenai idia noho.

TB​—Ena be idia hanai lagani 20 bamona lalodiai TB idia laloa momo lasi, to hari ia ese tanobada ia hadikaia lou. Lagani ta ta iboudiai taunimanima milioni toi bamona ia hamasedia, unai amo daihanai goreredia iboudiai ia hereaia. Unai mase kahirakahira iboudiai be ogogami tanodia ai idia vara. To gau dika rohorohona be inai: TB jems be HIV jems ida idia gaukara hebou neganai, dika bada herea idia havaraia. Doketa idia gwau lagani 2000 do ia ginidae neganai, lagani ta ta ai, HIV jems idia abia taudia milioni ta be TB dainai do idia mase.

Kensa​—Hari inai negai, ogogami tanodia ai, kensa idia abia taudia edia momo ese taga tanodia edia ia hanaia.

Kudou Goreredia​—WHO ena Doketa Ivan Gyarfas be ia gwau: “Kudou goreredia ese tanobada ibounai do idia hadikaia negana be kahirakahira.” Bisinesi momo besedia mo lasi, to ma bese momo danu ia hadikaia. Latin America ai, idia dainai do idia mase taudia edia momo ese daihanai goreredia dainai do idia mase taudia edia momo be nega rua o toi do ia hanaia. Nega daudau lasi, ogogami tanodia ai kudou goreredia idauidau ese do idia hamasedia taudia edia momo do ia bada herea.

Siahu Tanodia Goreredia​—WHO idia gwau: “Toana be siahu tanodia goreredia idia vara rohoroho; kolera be ia hanai lao America dekenai . . . , ielo fiva bona dengi fiva ese momo herea idia hadikaia, bona maleria ena dika be ia bada ia lao.” Time magasin ia gwau: “Ogogami herea tanodia ai, daihanai goreredia koua gaukarana be ia moru vadaeni.” Ena be guna idia laloa lagani 40 bamona gunanai maleria be kahirakahira idia haorea vadaeni, to hari inai negai lagani ta ta iboudiai taunimanima milioni rua bamona be maleria dainai idia mase.

Kukuri Ranu Goreredia​—Ogogami tanodia ai memero kekeni idia hadikaia sivaraina be dika rohoroho. Dina ta ta iboudiai 40,000 bamona idia mase, unai gorere dainai o edia aniani be hegeregere lasi dainai; unai gorere mo dainai, sekeni 8 8 lalodiai ta ta idia mase.

Ogogami Dainai Gorere Idia Vara

Unai gorere sivaraidia ese ita be dahaka idia hadibaia? Diba momo tauna ta ia gwau: ‘Hari inai negai ogogami besedia idia hadikaia gaudia ruaosi be inai: idia vara matamata goreredia metaudia bona siahu tanodia goreredia gunadia danu.’ Unai dainai dahaka ia vara? Buka ta ladana Achieving Health for All by the Year 2000 be ia gwau, “tano idauidau edia padadia” ia hedinarai goevagoeva dainai idia laloa momo. Africa bona Asia tanodia 40 ai, gorere koudia gaukarana be “ia bada ia lao lasi, tanobada orena hegeregerena.” Unai kerere be ia bada ia lao noho.

Ena be unai kerere ena badina be momo, to World Health magasin ia gwau, ena badina badana ta “be ogogami.” (Aonega Herevadia 10:15 itaia.) Taunimanima momo be idia ogogami dainai, edia ruma, edia toileti, edia ranu, bona edia noho gabudia be namo momokani lasi bona hegeregere lasi. Unai ese edia mauri naria dalana ia hadikaia sibona lasi, to gorere ia havaradia danu. Edia aniani be hegeregere lasi dainai, edia tauanina idia manoka bena unai dainai idia gorere loulou. Unai ibounai ese ia hahedinaraia ogogami ese edia mauri ia hadikaia, vonovono ese au idia hadikaia hegeregerena.

Mase goreredia ese ruma idia hamirodia, tauanina idia hadikadia, bona memero kekeni idia hamasedia negadiai, ogogami taudia dekenai ia vara badabada. Haheitalai haida mani oi laloa. South Africa ena ogogami gabudia ai, TB be nega momo ia vara, unai bese ena taga gabudia ai ia vara negadia edia momo be nega 100 ia hanaia. Brazil ena ogogami gabudia ai, nimonia bona influensa dainai idia mase taudia edia momo ese taga gabudia ai unai gorere dainai idia mase taudia edia momo be nega 6 ia hanaia. Bona India ena ogogami taudia edia beibi masedia edia momo ese unai bese ena moni momo taudia edia be nega 10 ia hanaia. Momokani, unai ese ia hahedinaraia goevagoeva ogogami ese mauri ia hadikaia diba!

Unai dainai, tanobada hegegemadai, sikwota setelmen ai idia noho taudia bilioni ta mai kahana edia lalona idia metau. Ogogami ena badina idauidau be idia koua diba lasi, bona ena anina dikana ese edia mauri ia biagua. Bema oi be ogogami ena anina dikana oi hisihisilaia noho, reana oi danu oi laloa emu mauri hanamoa dalana be lasi. To, herevana oi ogogami eiava lasi, oi bona emu natuna be do umui gorere lasi totona emui mauri do umui naria daladia be idia noho. Unai dala be dahaka dahaka? Hereva gabena ese idia haida ia gwauraia.