Natudia Hamauridia Toho Karadia

“World Summit for Children dekenai ita hebou badina do ita gaukara hebou bona tanobada taudia iboudiai do ita noidia​—natudia ta ta iboudiai be vaira negana namona do idia henidia totona.”​—United Nations Conference, 1990.

SEPTEMBER 29 bona 30, 1990 ai, presiden bona praiminista tano 70 bona ma haida amo idia hebou, tanobada ena natudia edia noho dikana idia herevalaia totona.

Unai hebou ai unai bese idauidau taudia ese natudia edia hisihisi bada idia herevalaia momo; tanobada hegegemadai idia hunia gauna unai. United States ena gwaukau tauna Peter Teeley ia gwau: “Bema mai toutou baimumu 40,000 be dina ta ta iboudiai idia mase, taunimanima momo do idia badu dikadika. To natudia 40,000 idia mase, bona unai idia laloa taudia be momo lasi.”

Idia hebou gavamani tau badadia iboudiai idia laloa kara haida do idia karaia haraga be namo. Idia “gwauhamata inai do idia tahua guna: natudia kara maoromaoro henia daladia, hamauria daladia, bona naria daladia.” Vadaeni, edena dala idauidau idia gwauraia hedinarai?

Matamata Taudia 50 Milion be Reana Do Idia Mase

Idia ura bada gauna be lagani 1990 ia lao 1999 lalonai natudia 50 milion bona ma haida do idia mase dalana do idia koua. Idia momo hamauridia daladia be inai:

• Bema ogogami tanodia ai idia noho hahine iboudiai edia lalodia idia anidia hua 4 ia lao 6 lalonai edia beibi do idia rata henidia totona, vadaeni lagani ta ta iboudiai natudia milion ta do idia hamauridia.

• Bema oral rehydration therapy (ORT) be natudia dekenai idia henia, kukuri ranu amo idia mase natudia edia namba be nega rua amo do ia diho, lagani ta ta iboudiai unai gorere ese natudia milion hani ia hamasedia.a

• Bema gabu momo dekenai idia kododia bona dava maragi muramuradia idia gaukaralaia, gorere haida, hegeregere misels, tetenas, bona nimonia ese ma natudia milion momo do idia hamasedia lasi.

Unai ibounai do idia karaia diba, a? Davana be reana do ia daekau lao, ela bona lagani 10 murinai, lagani tamona ena gaukara davana be K2.5 bilion. Tanobada ibounai dekenai idia negea monina ita laloa neganai, unai be sisina sibona. Lagani ta ta iboudiai America ena kuku karaia kampani be edia kuku heagilaia herevadia halasia totona idia negea monina ena bada be unai hegeregerena. Dina ta ta iboudiai tanobada besedia be K2.5 bilion idia negea kava tuari kohu dekenai. Unai moni be edia mauri ia dika natudia edia gorere koua dalana dekenai idia henia be namo, ani? United Nations ena Declaration on the Rights of the Child ia gwau “taunimanima ese natudia idia henia diba gau namo hereadia idia henidia be namo.”

Momokani, “natudia ta ta iboudiai be vaira negana namona do idia henidia” karana ena anina be edia mauri do idia hadaudaua sibona lasi. Center to Prevent Childhood Malnutrition ena presiden, Sandra Huffman, be Time magasin lalonai ia gwau “ORT muramurana ese kukuri ranu ia koua lasi, to unai mase dalana amo natudia ia hamauridia sibona.” Ma ia gwau, ‘Hari, namona be unai gorere koua dalana ita tahua bada, namo lasi unai mase koua dalana sibona ita laloa.’

Natudia milion momo idia hamauridia bona edia mauri daladia idia hanamodia totona, gaukara badadia haida idia hamatamaia. (Maua itaia rau 6 ai.) Idia iboudiai hagugurua be auka.

Ranu Goeva be Kahirakahira

Guna, Felicia Onu be dina ta ta iboudiai hora ima ia haorea ena ruma bese edia ranu utua gaukarana ai. Nega momo ruma ai ia abia lao ranuna ia miro. (Unai bamona ranu lalonai lagani ta ta iboudiai gaigai maragi gorerena ia havaraia bona unai amo momo be kukuri ranu idia abia.) To lagani 1984 ai, Nigeria ena ist kahanai Ugwulangwu hanua dekenai, ranu guri ta idia geia bona imana amo idia gaukaralaia pamu idia atoa.

Hari, ia be mita handred haida sibona ia raka lao ranu goeva ia abia totona. Ena natudia idia goada idia lao, bona ena hekwarahi ia maragi ia lao. Lagani 1980 ia lao 1989 ai, Felicia bamona taunimanima bilion ta bona haida dekenai ranu goeva abia dalana idia kehoa. To hahine bona natudia milion momo be dina ta ta iboudiai hora momo lalodiai baketi idia do huaia loaloa; unai baketi ta ena ranu ena bada be West kahana ai mei ruma ai idia negea ranuna ena bada ese ia hanaia.

Edukeisini ai Namo Bona Dika

Maximino be lagani 11 merona ta mai aonega, Colombia ena daudau gabuna ta ai ia noho. Ena be dina ta ta iboudiai hora momo lalodiai iena tamana ia durua edia uma naria gaukarana ai, to sikuli dekenai ia kwalimu. Ia be Escuela Nueva, Sikuli Matamata ia lao henai, bona unai sikuli dalana be inai bamona: bema haida be dina haida idia lao diba lasi, idia reaia herevadia be gabeai idia hadibadia. Uma aniani gogoa negana ai unai be mai anina bada. Maximino ena sikuli dekenai tisa be momo lasi. Buka edia namba be hegeregere lasi. Natudia idia hagoadadia, ta ta ese ia lalo-pararalaia lasi herevadia dekenai do idia heduru heheni, bona sikuli naria gaukaradia momo be idia sibodia idia karaia. Unai dala matamatana​—ogogami gabudia taudia durudia dalana​—be ma tano haida ai idia tohoa matamaia.

Idau gabu daudauna ai, Asia ena siti badana ta ai, lagani 11 aonega kekenina ta ladana Melinda ia noho. Sikuli be vanegai ia rakatania, dina ta ta iboudiai hora 12 lalodiai siti ena momoru negea gabu badadia amo auri bona plastik gaudia ia gogoa totona. Melinda ia gwau, ‘Lau ura egu tamana lau durua bena dina ta ta iboudiai ai aniani diba. Bema lau durua lasi, sedira aniani do ai hoia diba lasi.’ Gau momo ia davaria dinadia ai, ia be 35 toea sibona ia abia mai diba ruma dekenai.

Gorere Koua Gaukara Natudia

India ena siti Bombay ena kahana ai be ruma dikadia gabuna ladana Malvani, bona nega daudau lalonai gorere be unuseniai ia noho. To hari unai gabu ai idia noho taudia edia noho ia namo ia lao, badina be gorere koua gaukara idia karaia goadagoada taudia, Neetu bona Aziz hegeregeredia, edia heduru dainai. Ruma bese idia vadivadi henidia, natu maragidia idia sekedia, hekodo idia abia eiava lasi, bona kukuri ranu, kuhikuhi, eiava rara bada lasi dainai idia gorere. Neetu bona Aziz edia lagani be 11 sibona. Natu badadia be lagani ima idia abia lasi natudia edia tauanina ena goada naria dalana totona idia heduru. Neetu bona Aziz edia gaukara dainai​—bona idia bamona natudia momo edia gaukara dainai​—Malvani ena matamata taudia kahirakahira iboudiai be hekodo idia abia, tama sina momo be ORT muramurana henia dalana idia diba, bona goeva karadia idia namo idia lao.

Tanobada hegegemadai, natu maragidia be idia vara momo goreredia idia abia lasi totona, kodoa gaukarana be idia habadaia momokani. (Rau 8 ena laulau itaia.) Bangladesh ai beibi iboudiai amo 70 pesen bona ma haida idia kododia vadaeni, bona China ai 95 pesen bona ma haida ia kododia vadaeni. Gorere koua gaukarana diba momo taudia idia laloa bema ogogami tanodia iboudiai dekenai 90 pesen idia kododia diba, edia tauanina do idia hegeregere gorere do idia koua. Idia momo be hekodo idia abia neganai, gorere be ta ta dekenai do idia hanai haraga lasi.

Ogogami, Tuari, Bona AIDS

To madi, ena be gorere koua gaukarana bona edukeisini dekenai gaukara ia namo ia lao, to ma hekwakwanai haida idia do noho, bona kokidia be auka. Idia hekwarahilaia bada gaudia amo, toi be ogogami, tuari, bona AIDS.

Vanegai laganidia lalodiai tanobada ena ogogami taudia edia ogogami ia dika ia lao. Idia hanai laganidia 10 lalonai Africa bona Latin America edia ogogami gabudia ai idia abia monina be 10 pesen amo ia diho vadaeni. Unai tano ai idia noho tama sina edia moni ia hegeregere lasi edia natudia be aniani namona do idia henidia​—unai gabu ai ruma besedia edia moni ibounai amo 75 pesen idia henia aniani sibona hoia totona.

Kliniki dekenai Grace idia hamaoroa, idia gwau, ‘Emu natudia be uma aniani bona biku do oi henidia.’ To Grace be East Africa ai ia noho, ia be natudia ten edia sinana, ena moni be lasi aniani hoia totona, bona ena ruma bese ena tano maragina ai ranu ia hegeregere lasi unai aniani ia hadodia totona. Edia dala tamona be koni bona bini sibona idia ania bona nega haida idia hitolo. Bema hari idia vara gaudia be do idia vara noho, sedira Grace ena ruma bese taudia bona idia bamona taudia milion momo edia noho be do idia hanamoa diba lasi.

Ena be Grace ena natudia idia ogogami to edia noho ena namo ese Southeast Asia ena lagani 8 merona ta Kim Seng ena noho ena namo ia hereaia; madi iena tamana be tuari lalonai ia mase bena unai murinai iena sinana be hitolo dainai ia mase. Kim Seng danu be hitolo dainai kahirakahira ia mase, to gabeai, heau mauri taudia edia kamepa ta dekenai heduru sisina ia davaria. Tanobada hegegemadai unai bamona kamepa lalodiai natudia milion ima idia noho dika; idia momo be unai bamona hekwarahi idia hisihisilaia.

Lagani 1900 neganai, tuari lalonai idia mase taudia 5 pesen sibona be tuari taudia lasi. Hari unai namba ia bada daekau 80 pesen dekenai, bona tuari ai idia hamasedia taudia momo be hahine eiava natudia. Bero idia davaria lasi taudia danu be do edia lalona ai idia hisihisi. Africa tanona ta ai heau mauri kekenina ta ia gwau, “Egu sinana idia hamasea dalana lau laloaboio diba lasi. Idia dogoatao bona idia hadikaia. Gabeai idia kwatua bena idia gwadaia. . . . Nega haida lau nihilaia.”

Tano momo lalodiai tuari idia vara loulou dainai, toana be tuari ese kerere lasi natudia do ia hahisidia noho. Ma danu, bese idauidau idia badu heheni neganai, unai ese tuari ai idia vareai lasi natudia danu ia hadikadia. Tuari oreadia ese moni bada herea idia gaukaralaia; unai moni be gavamani ese edukeisini bona noho gabudia hagoevadia gaukaradia, bona gorere koua karadia dekenai bema idia gaukaralaia be namo. Kohu momo besedia be tuari totona idia negea monina ese ogogami besedia be lagani ta lalonai idia abia monina ibounai ia hanaia. Tanobada ena ogogami herea tanodia 46 danu ese tuari oreadia bona gaudia dekenai idia negea monina ena bada be gorere koua gaukarana bona edukeisini dekenai idia negea monina ibounai ena bada hegeregerena.

Ogogami bona tuari sibona lasi, to ma gau ta ese tanobada ena natudia ia hamasedia toho. Lagani 1980 ia lao 1989 lalonai, misels, tetenas, bona kukuri ranu koua gaukarana ai idia kwalimu noho lalonai, gorere dika rohorohona matamatana ta ia vara: AIDS. World Health Organization idia gwau lagani 2000 C.E. ia do mai lasi neganai, natudia milion 10 be unai gorere do idia abia guna. Idia momo be lagani rua do idia abia lasi neganai do idia mase, bona idia haida sibona be lagani ima do idia abia. Haiti dekenai natudia naria doketa ta, Dr. Reginald Boulos, be mai lalohisihisi danu ia gwau: “Bema gau ta be ita karaia haraga lasi, idia hanai lagani 10 lalodiai natudia idia mauri totona ita karaia karadia namodia iboudiai edia anina be do ia boio AIDS dainai.”

Inai hereva kwadogina amo, ita itaia gaukara namodia haida idia karaia, to ‘natudia ta ta iboudiai vaira negana namona henidia’ be do hekwarahi bada herea. Helaro ia noho dina ta do ia ginidae bena ita ura gauna do ia vara momokani, a?

[Footnotes]

[Box on page 6]

Lagani 1990 ela Bona 1999—Natudia Idia Hamauridia Toho

World Summit for Children ai idia hebou besedia ese gwauhamata namodia haida idia karaia. Idia ura lagani 2000 C.E. ia mai neganai inai gaudia do idia davaridia.

Kodoa. Kodoa karadia amo, lagani ta ta iboudiai natudia milion toi idia hamauridia to ma milion rua be idia mase. Bema tanobada lalonai natudia iboudiai edia amo 90 pesen idia kododia, idia vara momo goreredia idia abia lasi totona, idia momo do idia mase lasi.

Edukeisini. Lagani 1980 ia lao 1989 ai, tanobada ena ogogami momokani tanodia ai sikuli ai idia lao natudia edia namba ia diho. Idia tahua gauna be unai kara idia haidaua bona idia ura lagani 2000 C.E. ia mai neganai, natudia ta ta iboudiai be mai edia dala idia lao sikuli dekenai.

Aniani namona ai idia dabu. United Nations Children’s Fund gaukara taudia idia laloa bema “palani maorodia idia badinaia, . . . tanobada be hari ia hegeregere memero kekeni iboudiai do idia ubudia bona aniani namona ai idia dabu momokani taudia edia hekwakwanai do idia hanaia.” Hebou taudia idia gwau lagani 1990 ia lao 1999 ai, aniani namona ai idia dabu natudia edia namba be nega rua amo do idia hamaragia toho. Unai bamona do idia karaia diba neganai, unai ese natudia 100 milion be hitolo amo do ia hamauridia.

Ranu goevana bona mei rumadia namodia karaia. Lagani 1987 neganai, Brundtland Report ia gwau: “Ogogami tanodia ai, ranu tap momo be kahirakahira idia noho neganai, unai ese ia hahedinaraia hanua taudia idia gorere momo lasi, to edia hospital bedi be hida ese unai ia hahedinaraia namonamo lasi.” Hari, taunimanima bilion bona ma haida be ranu goeva idia abia diba lasi, bona bilion rua bamona be kukuri negea dalana namona lasi. Idia ura tanobada ibounai dekenai taunimanima be ranu goeva do idia abia bona dala goevana ai taunimanima edia kukuri do idia abia oho diba.

Naria karana. Idia hanai lagani 10 lalodiai, tuari dainai natudia milion ima bona ma haida ese bero bona mase idia davaria. Ma milion ima be ruma lasi. Unai heau mauri natudia, bona dala ai idia noho natudia bona gaukara natudia milion momo, be do idia naridia haraga be namo. Convention on the Rights of the Child pepana​—hari, bese handred bona ma haida ese idia sainia vadaeni​—be dagedage bona kerere karadia amo unai natudia iboudiai ia naridia toho.

[Chart on page 7]

(For fully formatted text, see publication)

NATUDIA IDIA MASE ENA BADINA BADADIA

(Lagani Ima Idia Abia Lasi Natudia)

LAGANI TA TA AI MILION MOMO IDIA MASE (1990 ai idia gwauraidia):

0.51 MILION Huahua Dikana

0.79 MILION Beibi Ena Tetenas

1.0 MILION Malaria

1.52 MILION Misels

2.2 MILION Laga-Tuna

4.0 MILION Kukuri Ranu

4.2 MILION Badina Ma Haida

Source: WHO and UNICEF

[Chart on page 8]

(For fully formatted text, see publication)

LAGANI 1980-1988 AI, OGOGAMI TANODIA AI NATUDIA KODODIA KARANA IA BADA IA LAO

Idia kodoa vadaeni lagani tamona idia do abia lasi natudia edia namba.

LAGANI

1980 1988

DPT3* 24% 66%

POLIO 20% 66%

TB GORERENA 29% 72%

MISELS 15% 59%

* DPT3: Hekodo ta DIPTERIA, HUAHUA DIKANA, bona TETENAS totona.

SOURCE: WHO and UNICEF (1980 ena namba lalonai China idia duahia lasi)

[Picture Credit Line on page 4]

Photo: Godo-Foto