Baibel Ena Haere

Heudahanai—Gwauatao Eiava Gwauatao Lasi?

IESU ia gwau: “Idia hadikaia umui taudia edia dika do umui gwauatao. Unai neganai umui emui gubai ia noho Tamana ese umui emui dika do ia gwauatao.” (Mareko 11:25) Bema Keristani hahinena ta ena adavana ese heudahanai amo edia headava ia hadikaia, Iesu ena hereva dainai henanadai aukadia haida idia vara: Namona be unai hahine ese ena adavana ena dika do ia gwauatao bona do ia badinaia noho, eiava?a Bema edia headava ia hadokoa gwauraia, Dirava ese do ia dadaraia, a? Mani Baibel ena haere do ita tahua.

Nega Iboudiai Dika Oi Gwauatao be Namo, A?

Iesu ena hereva, “idia hadikaia umui taudia edia dika do umui gwauatao,” anina be, nega iboudiai​—ta ena adavana ia heudahanai neganai danu​—namona be iena dika ia gwauatao, a? Iesu ena hereva do ita lalo-pararalaia totona, dika gwauatao karana ia gwauraia herevadia ma haida do ita laloa be namo.

Hegeregere, Iesu ena hereva Luka 17:​3, 4 ai ese dika gwauatao karana ena badina badana be ita ia hadibaia: “Oiemu tadikaka ese oi bema ia hadikaia, do oi sisiba henia, vadaeni iena lalona bema ia giroa neganai, be iena dika do oi gwauatao. Dina tamona dekenai nega 7 bema ia hadikaia oi dekenai, vadaeni nega 7 bema ia giroa mai oi dekenai, do ia gwau, ‘Lau be, egu lalona lau giroa inai,’ vadaeni iena dika do oi gwauatao.” Momokani, ta ese kara dikana badana ta ia karaia murinai bema ia helalo-kerehai momokani, ia kara dika henia tauna ese ena dika ia gwauatao toho be namo. Iehova ena lalohadai be unai bamona; iseda dika do ia gwauatao totona, namona be ita helalo-kerehai momokani.​—Luka 3:3; Kara 2:38; 8:22.

To unai ese danu ia hahedinaraia, bema heudahanai tauna be ena dika amo ia helalo-kerehai lasi, reana ena adavana do ia laloa ena dika do ia gwauatao lasi be namo.​—1 Ioane 1:​8, 9 itaia.

Dika Gwauatao Karana Dainai Dahaka Ia Vara?

To, bema heudahanai tauna ia helalo-kerehai, be edena bamona? Helalo-kerehai ia noho neganai, dika gwauatao karana ena badina ia noho. To, kerere tauna ena dika gwauatao karana ena anina be ena dala kererena ena anina dikana ibounai amo ia roho mauri, a? Iehova ese dika ia gwauatao sivaraidia haida mani ita laloa.

Hasinadoa taudia 10 ese Kanana tanona sivaraina dikana idia gwauraia murinai, Israela taudia idia gwau-edeede neganai, Mose ese Iehova ia noia, ia gwau: “Mani edia dika do oi gwauatao.” Iehova ia haere, ia gwau: “Oiemu noinoi hegeregerena, edia dika lau gwauatao vadaeni.” Anina be unai kerere taudia edia kara ena davana taina ia henidia lasi, a? Iehova be ma ia gwau: “Lauegu hereva idia kamonai henia lasi. . . . Idia ta lasi ese edia sene taudia dekenai lau gwauhamata tanona do idia itaia.” (Numera 14:​19-23) Iehova ese ena hereva ia hamomokania; unai uru taudia, idia bada vadaeni taudia, iboudiai ese Gwauhamata Tanona idia itaia lasi​—Iosua bona Kaleba sibodia mo ese.​—Numera 26:​64, 65.

Unai hegeregerena, King Davida be Bataseba ida idia kara dika dainai peroveta tauna Natana ese ia gwau henia neganai, Davida ia helalo-kerehai, ia gwau: “Lohiabada dekenai lau kara dika vadaeni.” Bena Natana ese ia hamaoroa, ia gwau: “Lohiabada ese oiemu dika ia gwauatao vadaeni.” (2 Samuela 12:13) To, ena be Iehova ese Davida ena dika ia gwauatao, to Davida be ena mauri orena lalonai ena kara dikana ena anina dikana ia hisihisilaia.​—2 Samuela 12:​9-14; ma danu 2 Samuela, karoa 24 itaia.

Unai sivarai, Dirava ese dika ia gwauatao sivaraidia, ese ita idia hadibaia gauna badana be inai: Iseda kara dika ena anina ita abia. (Galatia 6:​7, 8) Ena be Dirava ese helalo-kerehai tauna ena dika ia gwauatao, to reana ena dala dikana ena huahua amo ia hamauria lasi. Unai ena anina be, ena be hahine ese ena adavana, heudahanai tauna, ena dika ia gwauatao murinai ia lalo-dika henia lasi​—to ena lalona ia hadaia diba do ia dihotania, a?

Dika Gwauatao Bona Headava Hadokoa

Iesu ena haroro ai, headava hadokoa karana be nega toi ia herevalaia. (Mataio 5:32; 19:​3-9; Luka 16:18) To unai nega ta ai ia ese dika gwauatao karana ia herevalaia lasi. Hegeregere, Mataio 19:​9 ai ia gwau: “Bema iena adavana ia heudahanai lasi, to tau ta ese iena adavana ia rakatania, vadaeni hahine ta ma ia adavaia, unai tau be heudahanai tauna.” Iesu ia gwau “bema iena adavana ia heudahanai lasi,” unai amo ia hahedinaraia, ena adavana ia heudahanai tauna o hahinena be Baibel ese gwaumaoro ia henia, edia headava do ia hadokoa. To Iesu ia gwau lasi namona be unai bamona do ia karaia. To ia hahedinaraia goevagoeva unai bamona do ia karaia diba.

Headava be taunimanima rua kwatua hebou varona. (Roma 7:2) Idia ta ia heudahanai neganai, unai varo ia motu diba. Unai neganai kerere tauna ena adavana ese gau rua ia lalohadailaia be namo. Ginigunana be, ena dika do ia gwauatao eiava? Ita itaia vadaeni hegeregerena, gau badana be heudahanai tauna ia helalo-kerehai momokani eiava. Bema ia helalo-kerehai, reana gabeai ena adavana ese ena dika do ia gwauatao​—reana unai ena anina tamona be sibona ena badu do ia negea.

Ia lalohadailaia be namo gauna iharuana be, headava do ia hadokoa eiava? Bema ena adavana ena dika ia gwauatao vadaeni, dahaka dainai unai ia laloa be namo?b Reana ia gari, ena adavana ese ia bona edia natudia do ia hadikaia, badina be guna unai bamona ia karaia. Eiava, reana ia gari, ia ena amo pokese gorerena do ia abia garina. Eiava iena heudahanai karana dainai ia abidadama henia lou diba lasi. Unai bamona negadiai, ena be reana ta ese ena adavana, heudahanai tauna, ena dika ia gwauatao (anina be badu ia negea), to ena lalona ia hadaia edia headava do ia hadokoa, badina be ia ura lasi ia dekenai do ia noho. Bema ena badu ia negea, reana unai dainai ena mauri do ia namo, bona gabeai bema ena adavana do ia hereva henia be namo, do ia gwau dika henia lasi.

Ta ena adavana bema ia heudahanai, namona be ia sibona ese unai ena anina ibounai ia laloa namonamo bona ia gurigurilaia, bena ena lalona ia hadaia, edia headava do ia hadokoa eiava lasi. (Salamo 55:22) Namo lasi ma haida ese idia hagania o idia doria, inai bamona o unai bamona do ia kara totona. (Galatia 6:5 itaia.) Mani oi laloa, Iesu ia gwau lasi iena adavana ia heudahanai tauna be edena bamona do ia kara be namo. Unai dainai ia hedinarai goevagoeva, Baibel ena hereva hegeregerena edia headava idia hadokoa taudia be Iehova ese ia badu henidia lasi.

[Footnotes]

[Picture Credit Line on page 22]

Life