Duahia Taudia Edia Henanadai

Abidadama Keristani hahinena be iena adavana ese ia hamatamaia headava hadokoa karana do ia koua noho, eiava?

Tau bona hahine idia headava matamaia neganai, Dirava be ia gwau unai tau bona hahine be do idia “noho” hebou. (Genese 2:​18-​24) Taunimanima be goevadae lasi taudia ai idia lao, unai dainai headava momo lalodiai hekwakwanai idia vara, to Dirava ena ura be headava taudia do idia noho hebou be namo. Aposetolo Paulo ia gwau: “Headava taudia totona inai taravatu lau gwauraia, hahine ese tau do ia rakatania lasi. Inai be lauegu taravatu lasi, to Lohiabada ena. To bema ia rakatania, ia be headava lasi do ia noho, o do ia giroa lou iena adavana dekenai. Tau danu ese iena adavana do ia rakatania lasi.”​​—⁠1 Korinto 7:​10, 11.

Unai hereva ese ia hahedinaraia nega haida goevadae lasi taudia huanai ta ia ura ena adavana ia rakatania. Hegeregere, Paulo ia gwau bema idia ta ia siri, namona be idia ruaosi be “headava lasi do [idia] noho.” Dahaka dainai? Momokani, ta ia siri, to Dirava ena matana dekenai idia ruaosi be do tamona. Paulo ese unai ia gwauraia diba badina Iesu ese Keristani headava dalana ia hahedinaraia, ia gwau: “Bema iena adavana ia heudahanai [Greek, por·neiʹa] lasi, to tau ta ese iena adavana ia rakatania, vadaeni hahine ta ma ia adavaia, unai tau be heudahanai tauna.” (Mataio 19:⁠9) Oibe, Baibel lalonai headava hadokoa ena badina tamona be “heudahanai,” unai be matabodaga karana. Paulo ese ia herevalaia gauna lalonai, idia ta ia matabodaga lasi, unai dainai tau eiava hahine ia siri neganai, Dirava dekenai, unai headava be ia doko lasi.

Paulo ese Keristani tauna korikorina ena abidadama lasi adavana ena kara ia herevalaia. Paulo ese ia gwauraia herevana mani ita laloa: “Bema abidadama lasi tauna o abidadama lasi hahine ese iena adavana, Keristani tauna o hahine ia ura rakatania neganai, iena dala koua lasi. Inai bamona ia vara neganai, Keristani tauna o hahine ese unai abidadama lasi tau o hahine idia rakatania dala do idia koua lasi, dibura lalonai idia koua bamona. Lasi momokani. Badina Dirava ese umui ia boiria, maino lalonai do umui noho totona.” (1 Korinto 7:​12-16) Abidadama hahinena be dahaka do ia karaia diba bema iena abidadama lasi adavana ese ia rakatania, bona kota amo headava hadokoa dalana ia tahua danu?

Reana unai hahine do ia ura tau be ia danu ia do noho. Reana tau ia do lalokau henia noho, edia hemami bona edia mahuta hebou urana ia do mamia noho, bona ia diba ia bona natudia be tauanina dalanai heduru idia abia be namo. Reana hahine ia laloa danu, iena adavana be gabeai abidadama tauna ai do ia lao diba bona do ia mauri. To, bema ia be dala ia karaia headava do ia hadokoa (Baibel ena hereva ia utua dalana amo), Paulo ia gwau bamona, hahine ese ‘iena dala do ia koua lasi.’ Abidadama tauna dekenai danu be unai bamona, bema Dirava ena lalohadai headava dekenai ia laloa lasi bona ia siri totona ia hereva goada.

To, unai bamona kara ia vara neganai, hahine be reana ia bona iena natudia naria dalana do ia tahua. Edena dala ai? Gavamani vairanai iena lalokau natudia naria noho ena maoro do ia hamomokania, unai amo idia dekenai sinana ena lalokau ia hahedinaraia noho, kara maorodia ia hadibadia, bona Baibel ena hakaua hereva namodia amo edia lalona dekenai abidadama do ia atoa. (2 Timoteo 3:15) Headava hadokoa karana ese iena maoro haida do ia hadikaia diba. Unai dainai, ia be reana dala do ia karaia, loea ta ese siahu taudia vairanai iena kahana ia herevalaia totona, unai amo iena maoro natudia naria totona do ia haboioa lasi bona ia hamomokania iena adavana ese ruma bese ia rakatania murinai durua do ia henia ena maduna ia abia. Ma gabu haida dekenai, headava hadokoa karana ia hepapahuahulaia hahinena be gavamani ena taravatu pepa haida ia sainia diba, unuseniai idia hamomokania ena natudia naridia ena maoro ia dogoatao bona moni dalanai heduru do idia abia, to pepa ia gwau lasi tau ena headava hadokoa karana ia abia dae. Gabu ma haida dekenai, pepa edia hereva ese idia hahedinaraia ia ese headava hadokoa karana ia abia dae; unai dainai, bema iena adavana be heudahanai karana dainai ia kerere, hahine ese unai pepa ia sainia ena anina be ia ese ena adavana ia dadaraia.

Unai gabu taudia momo bona kongregesen taudia be sivarai ibounai do idia diba lasi, hegeregere headava idia hadokoa ena badina be Baibel ena hereva hegeregerena eiava lasi. Unai dainai unai ia do vara lasi lalonai, dala namona be hahine ese sivarai momokanina be kongregesen ena gunalaia tauna bona elda ma ta do ia hadibaia (revareva amo be namo). Unai dala amo bema henanadai haida be unai neganai eiava gabeai idia vara, hereva momokani ia hahedinaraia diba.

Iesu ena hereva ita laloa lou, ia gwau: “Bema iena adavana ia heudahanai lasi, to tau ta ese iena adavana ia rakatania, vadaeni hahine ta ma ia adavaia, unai tau be heudahanai tauna.” Bema tau be matabodaga karana dainai ia kerere to ia ura lasi iena adavana ia rakatania, unai hahine (Iesu ena haheitalai hegeregerena, ia kerere lasi hahinena) ese dala ta do ia abia hidi, iena kerere do ia gwauatao bona do idia mahuta hebou noho diba eiava do ia dadaraia. Bema ena adavana ena kerere ia gwauatao bona ia ida ia do noho neganai, unai be miro karana dikana lasi.​​—⁠Hosea 1:​1-3; 3:​1-3.

Bema ia heudahanai tauna be headava hadokoa dalana ia tahua, hahine be reana ia ura iena dika do ia gwauatao noho bona ena ura be tau ia giroa mai. Ia sibona ena lalona ena hemami bona ena noho hegeregerena do ia abia hidi bema tau ena headava hadokoa karana do ia hepapahuahulaia eiava lasi. Gabu haida dekenai, headava hadokoa karana ia hepapahuahulaia hahinena be pepa haida ia sainia diba, unuseniai idia hamomokania ena natudia naria ena maoro ia dogoatao bona moni dalanai heduru do idia abia, to pepa ia gwau lasi tau ena headava hadokoa karana ia abia dae. Unai pepa ia sainia amo ia hahedinaraia lasi iena adavana ia dadaraia. To, gabu ma haida dekenai, headava hadokoa karana ia hepapahuahulaia hahinena do idia noia pepa haida do ia sainia, bona unuseniai idia hahedinaraia ia be unai headava hadokoa karana ia abia dae. Unai bamona headava hadokoa pepadia ia sainia ese ia hahedinaraia iena kerere adavana ia dadaraia.

Unai gauna dekenai daradara ia vara lasi totona, namona be hahine ese ia badinaia daladia bona ia karaia ena badina be revareva amo kongregesen elda taudia ia hadibadia. Do ia hahedinaraia diba, ia ese ena tau ia hamaoroa vadaeni ia ura bada iena dika ia gwauatao bona ia ura ia be iena adavana. Unai ese do ia hahedinaraia unai headava hadokoa karana be ia ura henia lasi; ia ese ena adavana ia dadaraia lasi, to ia hegaegae iena dika do ia gwauatao totona. Ia ura bada ena tau ena dika ia gwauatao bona edia headava ia do noho herevadia ia torea hedinarai murinai, moni daladia bona/eiava natuna naria ena maoro hamaoromaoroa totona pepa ia sainia karana ese ia hahedinaraia lasi ia be ena tau ia dadaraia.a

Hahine be, headava hadokoa karana murinai danu, ia hahedinaraia goevagoeva ia ura ena adavana ena kerere ia gwauatao neganai, ia eiava iena adavana ese ma ta do idia adavaia lasi. Bema hahine, ia kerere lasi bona ena gwauatao karana tau ese ia dadaraia hahinena, be gabeai ena lalona ia hadaia tau do ia dadaraia badina ena heudahanai karana dainai, unai neganai gau ta ese idia ruaosi do ia guia lasi. Iesu ese ia hahedinaraia ia kerere lasi hahinena o tauna be mai ena maoro unai bamona dala ia abia hidi.​​—⁠Mataio 5:​32; 19:9; Luka 16:18.

[Footnote]