Disasta Idia Vara Neganai​—Oi Mauri Totona Do Oi Karaia Diba Gaudia

Nius ai nega momo tano mareremarere . . . lai gubana . . . terorist karana . . . sikuli ai ipidi amo taunimanima dagedage henia karana idia herevalaia. Oibe, nius ai disasta ena sivarai ita duahia, to ta ena mauri ai unai ia vara neganai ena hemami be ia idau. Dahaka do oi karaia disasta ia do vara lasi neganai, disasta ia vara lalonai, bona disasta ia ore murinai?

DISASTA IA DO VARA LASI NEGANAI​—OI HEGAEGAE GUNA!

TAUNIMANIMA ibounai dekenai disasta ia vara. Hegaegae namonamo karana be mai anina bada ita mauri totona. To, dahaka gaudia do ita hegaegaelaia?

• Lalohadai maorona abia. Namona be ita abia dae disasta ese oi bona emu lalokau taudia dekenai dika ia havaraia diba. Unai dainai ita hegaegae be namo.

• Edena disasta be emu gabu ai idia vara oi dibaia. Do oi heau mauri gabuna oi diba be namo. Oi sekea bema emu ruma be ia goada bona do ia seif bema unuseniai umui noho diba. Lahi ia havaraia diba gaudia oi kokia. Hegeregere, nemo muramura (mosquito coils), kuku, kendol, masisi, lamepa, kerosini o unai bamona gaudia ma haida. Bona oi nanadu neganai kisini oi rakatania lasi.

• Do oi abia baege oi hegaegaelaia. Paua, ranu, fon, bona trenspot be do idia gaukara namonamo lasi. Bema mai emu motuka, petrol ia noho be namo, bona hanaihanai aniani, ranu bona heduru gaudia ma haida be emu ruma ai idia noho be namo—Maua ladana “Disasta Totona Oi Hegaegae Vadaeni, A?” itaia.

  

• Emu turadia edia fon namba oi torea.

• Dika umui hanaia totona palani umui karaia bona umui praktis. Namona be ofesi bildin ena raka-lasi dalana oi diba bona emu natudia be sikuli ai idia noho bona disasta ia vara neganai, do umui karaia gaudia umui herevalaia. Do umui hedavari gabuna umui abia hidi, hegeregere sikuli ena gabu ta eiava maketi gabuna ta dekenai. Gavamani taudia idia gwau disasta ia do vara lasi neganai, namona be emu famili ida unai hedavari gabuna dekenai lao dalana umui praktis.

• Ma haida durua totona palani karaia, buruka bona gorere taudia danu.

DISASTA IA VARA LALONAI​—KARA TA KARAIA HARAGA

Matamanai ita gwauraia tauna Joshua ia gwau, “lahi ia araia matamaia neganai, taunimanima momo be idia gari lasi​—kara ta idia karaia haraga lasi. Haida be edia kompiuta idia koua eiava edia ranu botolo idia hahonua noho. Bona tau ma ta ia gwau, ‘Reana ita naria be namo.’” Ena be haida idia metairametaira to Joshua ia boiboi: “Namona be hari inai gabu ita rakatania haraga!” Bona ena gaukara turadia haida be unai idia laloa bada lasi, to vadavada amo ia murinai idia raka diho lao. Joshua ia boiboi bona ia gwau: “Bema ta ia moru, ia abia isi bona raka noho. Ita ibounai be do ita mauri!”

• Lahi ese bildin ia araia neganai. Floa dekenai hekure diho bona kahirakahira iduara dekenai lao haraga. Kwalahu dainai gabu itaia totona be do ia auka bona nega momo lahi ena kwalahu hahodi vareai karana ese mase ia havaraia. Emu kohu oi laloa lasi. Badina sekeni haida sibona lalonai oi mauri diba eiava do oi mase diba.

• Tano mareremarere ia vara neganai. Ruma ena kahana ia goada gabunai oi vareai eiava teibolo goadana henunai oi komu. Tano mareremarere do ia vara lou dainai, bildin oi rakatania haraga be namo. Taunimanima hamauria totona idia mai taudia be reana do idia ginidae haraga lasi, unai dainai bema hegeregere haida oi durua idia mauri totona.

• Sunami ia vara neganai. Bema kone dekenai karaharaga ranu ia diho momokani, namona be unai gabu oi rakatania haraga bona ororo gabuna dekenai oi daekau lao. Badina hurehure badadia be unai murinai do idia mai.

• Ia giroagiroa lai dikana (tornado) bona lai gubana (hurricane) idia vara neganai. Heau mauri diba gabuna dekenai oi lao haraga.

• Abata ia vara neganai. Abata ese ia hadikaia bildin lalonai oi noho lasi. Emu motuka be abata ranu dekenai oi taria lao lasi. Nega haida unai ranu henunai toileti paipa badadia bona dika havaraia gaudia haida idia noho, bona disasta ese ia hadikaia gaudia, guri badadia, bona paoa lain idia moru.

• Inai oi diba, a? Motuka be ia aru noho abata ranu ese ia abia lao diba, bema ranu ena dobu be mita 0.6. Nega momo taunimanima be ia aru goada noho abata ranu dekenai edia motuka idia taria lao dainai momo idia mase.

• Bema gavamani taudia ese gabu ita rakatania totona idia hereva, unai hadibaia hereva ita badinaia haraga be namo! Emu turadia oi hadibaia oi be edena gabu ai oi noho, namo lasi oi idia tahua dainai edia mauri idia haboioa.

  

• Inai oi diba, a? Teks mesiji siaia be dala namona, to fon ai hereva be do ia auka.

• Bema gavamani taudia idia gwau ruma dekenai eiava heau mauri gabuna ta lalonai do ita noho, namona be lalonai sibona ita noho. Bema murimuri ai kemikol, baiolojikol, o niuklia disasta ia vara, namona be ruma lalonai oi noho, fen, iduara bona windou ibounai oi koua. Niuklia disasta ia vara neganai, bildin ena lalonai momokani dekenai umui vareai, unai amo dika umui davaria lasi. Emui gabu ena TV eiava reidio ai nius oi kamonai henia. Ruma lalonai umui noho ela bona gavamani taudia ese hadibaia hereva idia henia.

DISASTA IA ORE MURINAI​—SIBONA OI GIMAIA!

Gorere eiava dika oi davaria lasi totona, inai dala haida oi badinaia:

• Emu turadia ida oi noho, bema hegeregere, to sibona oi noho lasi.

• Emu noho gabuna ia goeva be namo.

• Hagoevaia gaukara karaia totona. Bema hegeregere, gloves, kwarana gauna, mask oi atoa, bona tamaka maorona oi karaia. Paoa lain bona lahi idia havaraia diba gaudia dekenai oi naria namonamo.

• Emu dina ta ta ena gaukara oi karaia. Emu natudia be oi amo do idia diba gau ibounai do idia namo. Emu natudia ida edia sikuli leseni umui karaia, idia ida gadara, bona ruma bese tomadiho umui karaia. Nius dikadia momo umui itaia lasi, bona ena be oi lalohekwarahi to emu famili edia hemami oi hadikaia lasi. Heduru oi abia dae, bona ma haida oi durua.

  

• Oi abia dae disasta ese gau momo ia hadikaia diba. Gavamani bona heduru idia henia oreadia edia gaukara be taunimanima dekenai mauri durua gaudia idia henia, to oi haboioa gaudia ibounai do idia henia lasi. Iseda mauri durua gaudia be ranu goeva, aniani, dabua bona noho gabuna.​—1 Timoteo 6:​7, 8.

• Emu hemami oi herevalaia bona heduru oi abia dae. Nega momo disasta idia vara murinai, lalohekwarahi, lalometau, bona hemami idauidau do oi abia, oi laloa namonamo lasi, gaukara bona mahuta danu be do ia dika. Emu tura namodia dekenai unai oi herevalaia.

Joshua be ena gaukara gabuna ai idia vara lahi badana amo ia mauri, to ena gaukara turadia momo idia mase. Ia ese Keristani elda taudia bona doketa dekenai heduru ia abia. Joshua ia gwau: “Lau idia hamaoroa lau mamia lalohisihisi be lau hanaia diba, vaia unai bamona gaudia idia vara. Hua siks murinai, egu laloa momo karana ia ore matamaia. To gau ma haida be idia ore haraga lasi.”

Disasta ese iseda laloa maoromaoro karana ia hadikaia diba. Unai dainai haida idia laloa, unai be Dirava ena kerere. Taunimanima momo, Joshua danu be ia “mauri to ia lalohisihisi noho.” Ia gwau: “Lau laloa bema unai nega ai taunimanima momo lau hamauria be namo. To, lau dibaia Baibel ena hahediba herevadia ese lau ia hagoadaia, badina kahirakahira Dirava ese tanobada ai hahemaoro maorona do ia karaia bona ia ese kerere ibounai do ia hamaoromaoroa. Bona hari, egu dina ta ta maurina lau moalelaia, bona lau karaia diba gaudia sibona lau laloa, unai ese egu helt ia durua danu.”​—Apokalupo 21:4, 5.a