Mobael Fon Ese Oi Ia Biagua. A? Emu Lalohadai

Taunimanima be hanaihanai sikuli, moni gaukara, eiava ma gau haida totona diba idia tahua noho. Mobael fon ese idia ia durua bada. Hari be guna bamona lasi, ena be emu ruma eiava sea oi rakatania lasi, to infomeisen idauidau oi davaria haraga diba.

To, nega daudau lalonai mobael fon idia gaukaralaia taudia idia davaria . . .

buka ta idia duahia to idia lalopararalaia lasi.
gau tamona idia karaia namonamo diba lasi.
sibodia idia noho negana idia moalelaia lasi.

INAI OI DIBA BE NAMO

Kekeni ta be nega tamona ai gau momo ia karaia noho. Mobael ai teks mesiji ia torea, ena turana ida vidio kol amo ia herevahereva, bona kompiuta bona buka ta amo ena stadi ia karaia.

DUAHIDUAHI

Mobael fon idia gaukaralaia momo taudia be mai haheauka ida buka ibounai idia duahia lasi, to idia itaia haraga bona point badadia sibona idia duahia.

Duahiduahi haraga karana be mai ena namo bema henanadai ta ena haere oi ura davaria haraga. To, gau ta ena anina oi lalopararalaia totona, unai ese emu laloa dobu karana ia hadikaia diba.

INAI OI LALOA: Atikol latana oi duahia namonamo diba, a? Edena dala ai unai ese oi ia durua gau ta oi dibaia haraga totona? —⁠AONEGA HEREVADIA 18:15.

GAU TAMONA KARAIA

Haida idia laloa mobael fon idia gaukaralaia neganai, gau rua idia karaia diba—⁠hegeregere idia stadi bona nega tamona ai turadia dekenai teks mesiji idia siaia diba. To, gau rua be nega tamona idia karaia namonamo diba lasi, badina edia harana ia laloa maoromaoro lasi.

Gau tamona sibona oi laloa bona oi karaia noho be auka, to unai ese oi do ia durua. Grace ia gwau: “Lau dibaia gauna be gau momo do lau laloa lasi, to gau tamona sibona lau lalohadailaia be namo. Unai bamona oi karaia neganai, kerere momo oi dadaraia bona do oi lalohekwarahi lasi.”

INAI OI LALOA: Gau momo oi karaia neganai, oi duahia gauna oi lalopararalaia bona oi laloatao be auka, a? —⁠AONEGA HEREVADIA 17:24.

SIBONA OI NOHO NEGANA

Haida idia ura lasi rege lasi gabuna ai sibona idia noho, unai dainai mobael fon idia gaukaralaia. Olivia ia gwau: “Bema miniti 15 lalonai lau helai kava, egu hemami ia dika bona lau ura egu fon o tablet lau sekea o TV lau kehoa.”

To, sibona ita noho be nega namona ita laloa dobu totona. Natudia bona taunimanima badadia be gau haida idia dibaia totona, sibona idia noho bona idia laloa dobu be mai anina bada.

INAI OI LALOA: Sibona oi noho negana oi gaukaralaia diba gau ta oi laloa dobu totona, a? —⁠1 TIMOTEO 4:15.

INAI OI KARAIA DIBA

SIBONA OI SEKEA

Edena dala ai mobael fon oi gaukaralaia diba emu laloa dobu karana oi hanamoa totona? Edena dala ai fon ese emu harana ena laloa namonamo dalana ia hakererea diba?

HAKAUA HEREVANA: “Aonega bona laloa namonamo karana oi gimaia.”—⁠AONEGA HEREVADIA 3:21.

SIBONA OI NANADAIA . . .

Mobael fon ai paragraf latana lau duahia neganai, lau hekwarahi lau lalopararalaia totona, a? Bema oibe, dahaka ese hanaihanai egu lalona ia veria?
Dahaka lau karaia diba egu lalona idia veria gaudia lau koua totona?

Tohoa: Gau ginigunana be metairametaira paragraf ta ta oi duahia guna, bena gabeai atikol ibounai oi duahia haraga diba. Oi duahia badabada, unai amo hereva ena anina do oi laloa namonamo.

Nega lau atoa lau duahia herevana lau laloa dobu totona, a?

Tohoa: Emu stadi ena dokona ai, miniti 10 lalonai oi dibaia gaudia oi laloa lou.

Edena nega ai gau momo be nega tamona lau karaia toho?
Dahaka lau haidaua be namo, unai amo gau tamona sibona lau karaia guna bona gabeai gau ma ta lau karaia?

Tohoa: Emu stadi gabuna ai, emu lalona idia veria gaudia oi kokia, unai amo oi stadilaia gauna sibona do oi laloa noho.

HAKAUA HEREVANA: “Aonega bona laloparara oi abia noho.”—⁠AONEGA HEREVADIA 4:5.