Stadi 1

Baibel​—⁠Iseda Buka Badana

¹ Haroro Sikuli lalonai, Baibel be iseda stadi buka badana. Lagani 1513 B.C.E. ai, Mose ese Baibel ena hereva ginigunana ia torea matamaia, bona lagani 98 C.E. lalonai aposetolo Ioane ese Baibel ena hereva ginigabena ia torea. Hari inai negai, Baibel milioni momo idia karaia, gado idauidau 1,800 bona ma haida dekenai.

² Baibel ena hereva be Heberu, Aramaic bona Greek gadodia dekenai idia torea guna, buka maragidia 66 lalodiai. Unai buka gunadia be lokua gaudia, bona edia hereva be karoa bona siri amo idia hapararaia lasi, to gabeai idia hapararaia siri ta ta dekenai, bena unai murinai karoa ta ta dekenai.

³ “Buka Helaga ibounai be Dirava ena lauma amo ia vara.” (2 Tim. 3⁠:​16, NW; 2 Pet. 3⁠:​15, 16) Dirava ena lauma ese torea taudia ia hadibadia dahaka dahaka do idia torea, unai dainai idia kerere diba lasi. (2 Pet. 1⁠:21) Dirava ese hereva eiava toa eiava nihi ia henidia, bena unai toretore taudia ta ta be sibodia edia toretore daladia amo idia torea, unai dainai Baibel dekenai toretore daladia idauidau ita davaridia.

⁴ Dirava ese Mose ia haginia Israel ia hakaua totona, bona siahu bada herea ia henia. Ia hagania Baibel ena kahana ginigunana do ia torea. Mose ia mase murinai, Iosua, Samuela, Gad, bona Natana ese Baibel ena kahana haida idia torea. Unai murinai King Davida bona Solomona ese haida idia torea, bena peroveta taudia, Iona ela bona Malaki, ese. Idia be Iehova ena ladana ai idia hereva, edia peroveta herevadia edia anina idia vara momokani, bona taunimanima idia hakaudia Dirava dekenai.​—⁠Deut. 13⁠:​1-3.

⁵ Ita diba Heberu Revarevadia (Taravatu Gunana) be idia maoro, badina Iesu Keriso ese ia hamomokanidia, bona Keristani Greek Revarevadia (Taravatu Matamatana) idia torea taudia danu ese idia hamomokanidia. Ita diba Keristani Greek Revarevadia idia maoro, badina lauma helaga ena siahu amo idia torea. Edia hereva be Iesu ena hahediba herevadia hegeregeredia.

⁶ Baibel ese tanobada havaraia negana ia gwauraia. Guba lalonai idia herevalaia gaudia danu ita ia hadibalaia. Dirava ena ladana Iehova, bona ena lalokau, aonega, hahemaoro maoromaoro, hebogahisi bona haheauka ia gwauraia.

⁷ Baibel ese ita ia hadibaia, dahaka be hari inai negai do ia vara bona hari idia noho gavamanidia dekenai dahaka do ia vara. Mauri ena badina ia hahedinaraia, bona Dirava ena sisiba ia gwauraia.​—⁠Ioa. 17⁠:⁠17.