Stadi 13

Gado Regena Ena Bada Bona Laga-Ani Sisina

¹ Bema hebou taudia be emu gadona ena regena idia kamonai diba lasi, emu hereva namodia idia boio bamona. To bema emu gadona ena regena ia bada herea, reana do idia badulaia sisina dainai emu hereva namodia do idia laloa namonamo lasi. Kingdom Hall lalonai haere oi henia neganai, namona be emu gadona ena regena be hegeregere hebou taudia iboudiai do idia kamonai. Ruma-ta-ruma-ta haroro gaukarana ita karaia neganai, bema taia kudima sisina taudia ita davaridia, eiava ruma ena lalona amo regerege bada ia lasi, eiava dala dekenai regerege bada ia vara, namona be iseda gadona ena regena ita habadaia.

² Gado regena ena bada ia maoro, idia kamonai namonamo totona. Sibona dekenai inai bamona oi nanadaia: Egu gadona ena regena ena bada be hegeregere dainai, murinai helai taudia idia kamonai, eiava? Unai bamona lau hereva neganai, vairanai helai taudia dekenai egu gadona ena regena be bada herea momokani, eiava?

³ Gabu bona nega idauidau ai, gado regena ia hegeregere. Kingdom Hall edia bada be idauidau bona hebou taudia edia momo be idauidau; unai hegeregeredia emu gadona ena regena ena bada oi haidaua be namo. Kingdom Hall lalonai oi haroro neganai, oi hereva badabada diba, to ruma ta ena daiutu lalonai oi hereva neganai, namona be emu gadona ena regena oi hamaragia sisina. Bema Kingdom Hall lalonai hebou taudia be momo lasi bona iboudiai be vaira kahanai idia helai, oi hereva badabada lasi.

⁴ To bema rege bada be Kingdom Hall murimurinai eiava lalonai ia vara, oiemu gadona ena regena oi habadaia be namo, hebou taudia ese emu hereva ena badina o point badana ta do idia reaia garina.

⁵ Kingdom Hall momo dekenai maikrofon idia noho. Bema hereva henia tauna ese maikrofon ia gaukaralaia namonamo lasi dainai, ena gadona ena regena ia bada momokani eiava ia maragi momokani, reana Sikuli naria tauna ese do ia sisiba henia be namo.

⁶ Hereva ia henia tauna be edena bamona ia diba ena gadona ena regena ena bada ia hegeregere eiava lasi? Namona be murinai helai taudia edia vairadia edia toana ia itaia, unai amo do ia diba idia kamonai namonamo diba eiava lasi. Eiava, hereva henia taudia ma haida edia haroro dalana ia tahua. Idia hereva neganai bema iboudiai ese edia hereva idia kamonai namonamo diba, edia gadona ena regena ena bada ia tohotohoa be namo.

⁷ Gado regena be haroro herevana ena mamina dekenai ia hegeregere. Bema hereva henia tauna be Baibel amo samani herevadia aukadia ia duahia hedinarai, ia hereva badabada be namo, to bema lalokau sisibalaia herevadia ia duahia hedinarai, namona be ia hereva badabada momokani lasi.

⁸ Emu gadona ena regena ena bada do ia maoro totona, emu hereva ena anina oi laloa, bona oi henia ena badina oi laloa danu. Bema oi ura hereva idia kamonai taudia edia lalona oi haidaua, oi hereva badabada lasi. To bema oi ura oi hagoadadia gaukara badana ta do idia karaia totona, oi hereva badabada be namo reana.

⁹ Laga-ani sisina. Hereva oi henia noho lalonai, gabu korikoridia dekenai oi laga-ani sisina (pause) be gau badana. Bema lasi, taunimanima ese oiemu hereva ena anina do idia abia namonamo lasi, bona ena badina badadia do idia laloatao lasi.

¹⁰ Taunimanima haida be hereva idia henia neganai, idia hereva haragaharaga, idia laga-ani lasi. Bema oi be unai bamona oi hereva, namona be laga-ani karana oi manadalaia, oiemu haroro dalana do oi hanamoa totona. Bema hereva momo oi hegaegaelaia emu hereva lalonai do oi gwauraidia totona, unai ese emu laga-ani karana do ia hadikaia, badina do oi hereva haragaharaga hereva iboudiai gwauraidia totona. Unai dainai namona be nega oi atoa, hereva lalonai nega ta ta do oi laga-ani totona.

¹¹ Laga-ani, maka maragidia dekenai. Hereva oi duahia neganai, inai maka maragidia, koma (,) semikoulon (;) koulon (:) bona ful-stop (.) dekenai oi laga-ani sisina be namo. Bema lasi, hereva do oi duahia kerere bona ena anina danu do oi haidaua. Haheitalai ta be Ioane 14⁠:6 lalonai: “Iesu ia haere, ia gwau, ‘Dala be lau, hereva momokani be lau, mauri danu be lau.’ ” Iesu ena hereva oi duahia neganai, bema koma ginigunana dekenai oi laga-ani lasi, do oi gwau: “Dala be lau hereva momokani . . .” bona unai amo iena hereva ena anina do oi mogea.

¹² Maniuskrip o Baibel ena kahana ta oi duahia gwauraia neganai, laga-ani gabudia oi makaia guna be namo.

¹³ Hereva badadia ta ta murinai oi laga-ani. Bema hereva badana o point ta oi herevalaia vadaeni bona ma ta oi herevalaia gwauraia, namona be oi laga-ani guna, bena idia kamonai taudia be emu hereva badana gunana do idia laloa namonamo diba, bona do idia hegaegae diba ma hereva badana ta do idia kamonai totona. Unai laga-ani be sisina ia lata, maka maragidia dekenai hegeregerena lasi.

¹⁴ Laga-ani, anina bada herevana hahedinaraia totona. Anina bada herevana ta oi herevalaia gwauraia neganai, bema oi laga-ani sisina, idia kamonai taudia do idia naria mai edia ura ida. Bema ia murinai oi laga-ani sisina, ena anina do idia laloa diba. Namona be anina bada herevadia sibodia dekenai unai bamona oi laga-ani.

¹⁵ Laga-ani, rege bada ia vara neganai. Hereva oi henia negana lalonai, bema rege bada ia vara, namona be oi naria ela bona ia doko, bena taunimanima ese oiemu hereva do idia kamonai diba.