Gado Regena Haidaua

MAI anina herevadia oi hahedinaraia karana amo kamonai taudia oi durua, oi herevalaia gauna idia lalo-pararalaia totona. To gado regena ena bada, haraga, bona tiuni idauidau oi gaukaralaia dainai, emu hereva idia kamonai mai edia moale ida. Danu, unai amo kamonai taudia ese emu hemami oi herevalaia gauna dekenai idia diba. Emu hemami oi herevalaia gauna dekenai ese edia hemami unai gauna dekenai ia veria diba. Unai be momokani, herevana oi be platfom amo hereva oi henia eiava haroro gaukara lalonai tau ta dekenai oi hereva.

Taunimanima edia gado regena be gau namo hereana, rege idauidau ia havaraia diba. Oi gaukaralaia namonamo neganai, hereva ia hamauria, kudouna ia hamarerea, hemami ia havaraia, bona taunimanima ia hagoadaia kara ta idia karaia totona. To, emu pepa dekenai gado regena ena bada, haraga, bona tiuni oi haidaua gabudia oi makaia sibona amo unai ia vara lasi. Unai bamona maka dainai emu gado regena oi haidaua neganai toana be oi sibona emu hereva dalana bamona lasi. Emu hereva ia hamauria lasi, to reana kamonai taudia edia mamina ia hadikaia. Gado regena haidaua maoromaoro karana be kudouna amo ia mai.

Hereva henia tauna be mai aonega ida gado regena ia haidaua neganai, kamonai taudia do ia veria lasi ia idia laloa bada totona. To, kamonai taudia ia durua, ia herevalaia gauna ena anina idia lalo-pararalaia totona.

Gado Regena Habadaia Eiava Hamaragia. Emu gado regena haidaua dalana ta be oi habadaia eiava hamaragia. To namo lasi emu gado regena oi habadaia bona hamaragia loulou kava. Unai ese oi herevalaia gauna ena anina do ia hakererea. Bema gado regena oi habadaia momo, mamina namona ia havaraia lasi.

Namona be oi herevalaia gauna hegeregerena emu gado regena oi habadaia eiava hamaragia. Herevana oi ese Apokalupo 14:​6, 7 eiava Apokalupo 18:4 lalonai ia noho mai anina bada hahegani oi duahia, eiava Esodo 14:​13, 14 bamona abidadama goadana ia hahedinaraia herevana oi duahia, namona be dala maorona ai emu gado regena oi habadaia. Unai hegeregerena, bema Baibel amo hahemaoro herevana ta oi duahia, Ieremia 25:​27-​38 ai ia noho bamona, emu gado regena oi habadaia bona hamaragia dainai hereva haida be do idia hedinarai namonamo.

Emu tahua gauna oi laloa danu. Oi ura kamonai taudia oi hagoadaia kara ta do idia karaia totona, a? Emu hereva ena hereva badadia oi ura hahedinaraia namonamo, a? Mai aonega ida gado regena habadaia karana ese oi ia durua unai tahua gaudia oi davaria totona. To, gado regena oi habadaia sibona amo emu hereva ena badina oi hunia diba. Edena dala ai? Reana oi herevalaia gauna dainai, gado regena oi habadaia lasi to mai hebogahisi bona lalo-parara ida oi hereva be namo. Unai be Stadi 11 dekenai do ita herevalaia.

Mai lalo-parara ida gado regena oi hamaragia neganai, do oi gwauraia herevadia kamonai totona idia naria mai edia ura ida. To nega momo unai murinai, maoromaoro emu gado regena amo hemami goadana oi hahedinaraia be namo. Gado regena maragina amo hemami goadana oi hahedinaraia karana ese lalo-hekwarahi eiava gari ia havaraia. Danu, gado regena maragina amo oi hahedinaraia diba oi gwauraia noho herevadia edia anina be hereva oredia edia anina ese idia hereaia. To, bema hanaihanai emu gado regena ia maragi, reana toana be oi daradara eiava oi herevalaia gauna oi abia dae lasi eiava oi ura bada lasi. Ia hedinarai, gado regena ia diho momokani be aonega dalanai oi gaukaralaia be namo.

Emu Hereva Ena Haraga Haidaua. Dina ta ta lalonai, iseda lalohadai ita gwauraia neganai hereva idia heau namonamo. Gau ta ita hoalaia neganai, ita hereva haraga. Ita ura ma haida ese ita gwauraia gauna idia laloatao namonamo neganai, ita hereva metaira.

To, hereva henia taudia matamatadia momo ese edia gado regena idia haidaua lasi. Dahaka dainai? Idia ese do idia gwauraia herevadia ta ta idia hegaegaelaia. Reana ibounai idia torea. Ena be maniuskrip idia gaukaralaia lasi, to reana hereva iboudiai ta ta idia laloatao. Unai dainai, gado regena tamona ai edia hereva ibounai idia henia. Autlain amo hereva henia dalana idia dibaia neganai, unai kerere idia hamaoromaoroa diba.

Karaharaga emu gado regena oi haharagaia lasi, badina unai ena toana be pusikasi ese sisia ia itaia neganai ia heau mauri haraga bamona. Bona oi hereva haragaharaga lasi, hereva gwauraia maoro karana oi hadikaia garina.

Emu gado regena haidaua totona, oi hereva haraga bona metaira kava lasi. Unai hereva dalana ese oi herevalaia gauna ia hanamoa lasi, to ena mamina ia hadikaia. Namona be oi herevalaia gauna, oi ura hahedinaraia hemami, bona emu tahua gauna hegeregerena oi hereva haraga eiava metaira. Hereva ena haraga maorona ai emu hereva oi henia. Gau ta oi hoalaia mamina hahedinaraia totona hereva oi haharagaia, dina ta ta ai oi karaia bamona. Anina bada lasi herevadia eiava sivaraidia oi gwauraia neganai unai bamona oi karaia diba danu. Unai ese emu hereva ena toana ia hanamoa bona ia metau lasi. To, mai anina bada herevadia, hereva badadia, bona lalohadai badadia oi gwauraia neganai, emu hereva ia haraga lasi be namo.

Emu Gado Regena Ena Tiuni Oi Haidaua. Mani oi laloa ta ese hora tamona lalonai miusiki gauna ta ia gadaralaia. Unai nega ibounai lalonai nouti tamona sibona ia gadaralaia​—matamanai nouti ena rege ia bada, gabeai ia maragi, nega haida ia haraga, gabeai ia metaira. Ena rege ena bada bona haraga ia haidaua, to tiuni ia haidaua lasi dainai, unai “miusiki” ita ura henia lasi. Unai hegeregerena, bema iseda gado regena ena tiuni ita haidaua lasi, eda gado regena do idia moalelaia lasi.

To namona be ita lalo-parara, gado idauidau ai gado regena ena tiuni haidaua karana ese hereva ia haidaua dalana be tamona lasi. Hegeregere, China gado ai hereva ta ena tiuni idia haidaua neganai hereva ena anina ia idau danu.

To tiuni ese hereva ena anina ia haidaua lasi gadodia dekenai danu, tiuni haidaua karana ese lalohadai idauidau ia havaraia diba. Hegeregere, tiuni ita abia isi bona gado regena ita habadaia karana amo mai anina herevadia ita hahedinaraia diba. Eiava tiuni haidaua karana ese gau ta ena bada eiava ena daudau ia hahedinaraia diba. Sentens ena dokona kahana ai tiuni abia isi karana ese henanadai ia hahedinaraia. Gado haida ai gado regena ena tiuni idia hadihoa.

Gado regena ena tiuni oi abia isi karana amo hoa eiava ura bada mamina oi hahedinaraia diba. Reana lalohisihisi bona lalo-hekwarahi hahedinaraia totona tiuni oi hadihoa. Inai kahana ai ita herevalaia hemami ese hereva henia tauna idia durua, kamonai taudia edia kudouna ia hamarerea totona. Unai hemami oi ura hahedinaraia neganai, idia oi gwauraia sibona lasi. Emu gado regena oi gaukaralaia dalana amo oi hahedinaraia idia oi mamia.

Badina Oi Atoa. Edena negai gado regena haidaua karana oi laloa matamaia be namo? Do oi herevalaia gaudia oi abia hidi negana ai oi matamaia. Bema gau haida bona edia badina sibona eiava hagoadaia herevadia sibona oi gwauraia, dala momo idia noho lasi emu hereva lalonai gado regena oi haidaua totona. Unai dainai emu autlain oi itaia namonamo, namona be oi abia hidi gaudia dainai emu hereva do ia mauri bamona bona diba namona ia halasia.

Mani oi laloa emu hereva oi henia lalonai, oi mamia gau haida oi haidaua be namo badina ia metau bamona. Dahaka oi karaia diba? Oi hereva dalana oi haidaua sisina. Edena bamona? Dala ta be oi hereva sibona lasi, to emu Baibel oi kehoa, kamonai taudia oi noia edia Baibel do idia kehoa, bona siri ta oi duahia. Eiava hereva ta be henanadai ta ai oi halaoa, bona oi laga-ani sisina ena anina oi hahedinaraia totona. Haheitalai maragina ta oi henia. Hereva henia dalana idia diba namonamo taudia be unai dala idauidau idia gaukaralaia. To herevana emu diba ena bada be edena bamona, do oi herevalaia gauna oi hegaegaelaia neganai unai daladia oi gaukaralaia diba.

Ita gwau diba gado regena haidaua karana be hereva ena mamina hanamoa karana. Bona bema dala maorona ai oi karaia, kamonai taudia ese mai moale ida emu hereva do idia kamonai.