Stadi 17
Hereva Kwarana Gwauraia Namonamo Bona Hereva Badadia Gwauraia Hedinarai
1 Emu hereva lalonai, hereva kwarana o sinado be gau badana. Reana sentens tamona dekenai oi gwauraia be namo, bena emu hereva lalonai oi gwauraia loulou. Emu hereva ena kwarana be ena badina korikorina. Bema oi be abidadama oi herevalaia, reana hereva kwarana namona be “Abidadama Dekenai Oi Goada Karaia,” eiava “Abidadama amo Dirava Oi Hamoalea,” eiava “Abidadama Ena Badina.” Ena be unai hereva iboudiai ese abidadama idia herevalaia, to edia badina be idauidau, unai dainai idia ta ta be dala idauidau ai do oi herevalaidia.
2 Bema oiemu hereva ena kwarana oi abia hidi gwauraia, namona be inai henanadai oi laloa guna: Oi ura inai hereva do idia kamonai taudia be iena amo dahaka do idia dibaia? Bena, hereva oi henia neganai, hereva kwarana oi gwauraia loulou bona oi gwauraia goevagoeva.
3 Hereva kwarana namona. Haroro Sikuli ena hereva momo edia kwarana be sediual dekenai idia torea hedinarai vadaeni. To bema idia torea lasi, namona be inai oi laloa: Oiemu hereva do idia kamonai taudia be dahaka do oi hadibalaidia toho? Emu hereva ena badina oi laloa, bena ia hegeregerena hereva kwarana namona ta oi abia hidi.
4 Hereva kwarana gwauraia loulou. Hereva kwarana do ia hedinarai namonamo totona, ena hereva badadia oi gwauraidia loulou be namo. Nega haida, oi ese hereva haida, edia anina be hereva kwarana dekenai ia hegeregere herevadia, oi gwauraidia be namo.
5 Hereva badadia gwauraia hedinarai. Hereva kwarana ta oi abia hidi murinai, mai anina bada herevadia oi abidia hidi, unai hereva kwarana hahedinaraia totona. Unai anina bada herevadia o point badadia be emu hereva ena badina badadia, emu hereva lalonai edia anina do oi herevalaia momo herevadia. Unai hereva oi abidia hidi gwauraia neganai, emu hereva do idia kamonai taudia oi lalodia, bona do oi hereva henidia ena badina danu. Bema hereva ta ese emu hereva ena point badadia ia durudia lasi, oi kokia. Namona be hereva o point badadia oi gwauraidia hedinarai goevagoeva.
6 Hereva badadia momo gwauraidia lasi. Emu hereva idia kamonai taudia be hereva badadia momo nega tamona idia laloa diba lasi, haida do idia laloaboio. Namo lasi hereva badadia momo oi hegaegaelaidia bena oi gwauraidia haragaharaga, to namona be haida sibodia oi hegaegaelaidia bena edia anina oi gwauraia hedinarai goevagoeva.
7 Lalohadai badadia ta ta ena nega ena nega dekenai gwauraidia. Lalohadai badana ta oi gwauraia ore, bena unai murinai ma ta oi gwauraia ore. Gau momo nega tamona oi gwauraidia lasi. Hereva badana ta oi gwauraia neganai, hereva maragidia, unai hereva badana hamomokania herevadia, danu oi gwauraidia be namo. Unai hereva maragidia be unai hereva badana dekenai oi haboudia, bena idia kamonai taudia do idia lalo-pararalaia.