Sinado Ena Anina Hahedinaraia

IDIA manada hereva henia taudia idia diba sinado be mai anina bada. Hereva idia hegaegaelaia neganai, sinado ese idia ia durua gau tamona idia herevalaia bona laloa namonamo totona. Unai dala ai, gau momo herea idia herevalaia kava lasi, to kamonai taudia ia durua bada dalana ai edia hereva idia hahedinaraia namonamo. Hereva badadia ta ta be sinado ida idia hegeregere bona sinado ena anina hahedinaraia dalana idia durua neganai, kamonai taudia ia durua unai hereva idia laloatao bona edia namo idia laloa bada totona.

Ena be ita gwau diba oiemu sinado be oi herevalaia gauna, to do oi itaia emu hereva edia namo do oi habadaia bema oi laloa emu sinado be itaia dalana ta, bona unai dala amo oi herevalaia gauna ena anina oi hahedinaraia. Basileia, Baibel, bona toreisi lou be hereva badadia haida. Sinado idauidau amo oi herevalaidia diba. Haheitalai haida be inai: “Basileia, Gavamani Korikorina,” “Dirava Ena Basileia ese Tanobada be Paradaiso ai Ia Halaoa,” “Baibel be Dirava Ena Lauma amo Ia Vara,” “Baibel ese Ita Ia Hakaua Namonamo,” “Toreisi Lou be Lalo-Hisihisi Taudia Edia Helaro Namona,” bona “Toreisi Lou Helarona ese Ita Ia Durua Dagedage Lalonai Ita Gini Goada Totona.” Unai sinado ibounai edia anina hahedinaraia daladia be ta ta amo idia idau.

Iesu Keriso ia karaia haroro gaukarana be Baibel ena sinado badana ida ia hegeregere dainai, inai sinado ia hahedinaraia: “Guba Basileia be kahirakahira ia mai vadaeni.” (Mat. 4:17) Edena dala ai unai sinado ena anina ia hahedinaraia? Evanelia Bukadia foa ese unai Basileia idia gwauraia negadia be 110 ia hanaia. To Iesu ese inai hereva “basileia” ia gwauraia sibona lasi. Iesu ese ia hadibaia gaudia bona ia karaia hoa karadia amo ia hahedinaraia goevagoeva, ia, unuseniai ia noho tauna, be Dirava ena Natuna, Mesia, Iehova ese Basileia do ia henia tauna. Danu, Iesu ese ia hahedinaraia ia amo dala ia kehoa ma haida be unai Basileia lalonai do idia vareai. Unai hahenamo idia abia taudia ese idia hahedinaraia karadia ia gwauraia. Iena hadibaia herevadia bona kara badadia amo Dirava ena Basileia ena anina taunimanima edia mauri dekenai ia hahedinaraia goevagoeva bona ia hahedinaraia Dirava ena lauma amo demoni ia luludia karana ese ia hamomokania kamonai taudia dekenai ‘Dirava ena Basileia ia ginidae vadaeni.’ (Luka 11:20) Iesu ese ia murinai idia raka taudia ia hagania unai Basileia do idia harorolaia.​—Mat. 10:7; 24:14.

Sinado Namona Oi Gaukaralaia. Oi ai hamaoroa lasi sinado ta ena anina do oi hahedinaraia Baibel ese ia karaia ena bada bamona, to emu hereva dekenai sinado maorona ta ia noho be mai anina bada.

Bema oi ese sinado oi abia hidi diba, emu hereva ena tahua gauna oi laloa guna. Bena emu autlain ena hereva badadia oi abia hidi neganai, namona be idia ese oi abia hidi sinado idia durua momokani.

Bema sinado idia henia, unai oi laloa namonamo, ena anina hahedinaraia dalana maorona oi diba totona. Unai sinado ena anina bona ena namo oi laloa namonamo be namo. Bema oi ese unai sinado ena anina oi hahedinaraia herevadia do oi abia hidi, namona be oi abia hidi namonamo, sinado ia hedinarai noho totona. To, bema hereva ibounai idia henia, unai neganai danu sinado ena hereva hegeregerena do oi gaukaralaia dalana oi laloa be namo. Danu, dahaka dainai unai hereva be mai anina bada kamonai taudia dekenai bona hereva oi henia neganai emu tahua gauna be dahaka oi laloa be namo. Unai ese oi do ia durua dainai do oi diba hereva oi henia lalonai dahaka gaudia oi hahedinaraia be namo.

Sinado Oi Hahedinaraia Dalana. Sinado oi hahedinaraia namonamo totona, do oi herevalaia gaudia oi abia hidi bona hegaegaelaia neganai emu hereva ena badina oi atoa. Bema emu sinado idia durua gaudia sibona oi gaukaralaia bona autlain namona karaia dalana oi badinaia, sinado do oi hahedinaraia namonamo.

Hereva gwauraia lou karana amo sinado ia hedinarai namonamo. Haheitalai ta be lalokau anena ta. Unai ane ibounai lalonai ane abia tauna ese ena sinado ia hahedinaraia, bona unai sinado be, ia ura henia tauna ia lalokau henia. Dala idauidau ai unai sinado ia gwauraia lou diba. Reana unai hereva “lalokau” ida idia hegeregere herevadia, laulau herevadia, mamina namo herevadia, eiava haheitalai ma haida ia gaukaralaia diba. To, unai ane ibounai be sinado dekenai ia hakapua noho. Namona be hereva ta ena sinado hahedinaraia dalana danu be unai bamona. Hereva badadia gwauraia lou karana be ane dekenai idia hegeregere herevadia gwauraia lou karana bamona. Idia hegeregere herevadia gwauraia lou eiava dala ma ta ai sinado gwauraia be sinado hahedinaraia daladia haida. Unai bamona dala ese kamonai taudia do ia durua dainai do idia laloatao herevana be sinado ena hereva.

Unai hakaua herevadia be platfom amo oi hereva neganai sibona oi badinaia lasi, to haroro gaukara lalonai danu. Herevahereva kwadogina danu do idia laloatao bema sinado ia hedinarai namonamo. Baibel stadi lalonai oi gwauraia hadibaia herevadia be do idia laloatao namonamo bema sinado oi hahedinaraia. Sinado namona oi abia hidi bona ena anina oi hahedinaraia totona oi hekwarahi neganai, Dirava ena Hereva oi gwauraia bona hadibaia karadia do idia namo.