Stadi 20
Hereva Siriudia Namonamo Dalana
1 Hereva ta ena badina o point idauidau idia hesiriu namonamo neganai, idia kamonai taudia ese anina idia abia haraga. Hereva idia hesiriu, anina be hereva lalonai kahana iboudiai idia join namonamo, hereva henia tauna ese ia hakapudia namonamo dainai. Ena hereva ena badina ta ta be edia gabu korikoridia ai ia atodia, bona hesiriu herevadia amo ia siriudia o ia hakapudia.
2 Inai bamona: Emu hereva ena kahana toiosi be inai: Ena hamatamaia herevana, ena kahana badana, bona ena dokona; unai kahana toiosi siriua totona, hesiriu herevadia haida oi atodia be namo.
3 Hesiriu herevadia namodia gaukaralaidia. Lalohadai idauidau be hesiriu herevadia amo ita siriudia o ita hakapudia diba. Unai hereva haida be inai: danu, ma danu, unai bamona, unai hegeregerena, unai dainai, to. Nega haida hereva tamona ia hegeregere lasi dainai, namona be sentens ta amo eiava ma hereva haida amo hereva ena badina o point badadia rua ita hakapudia. Nega haida, point ta ena anina ita gwauraia neganai, unai amo murinai point ita hamatamaia bamona. Ruma ta ruma ta gaukarana lalonai ita gwauraidia herevadia momo be unai bamona.
4 Nega haida, ena be emu hereva ena kahana rua be mai padadia to edia badina oi hakapudia o oi siriudia be namo. Emu hereva ena dokona bona ena matamana be inai bamona oi hakapudia tamona be namo: Emu hereva ena matamana lalonai oi gwauraia gauna be emu hereva dokona lalonai bema oi gwauraia lou, emu hereva ibounai ena anina be unai dala amo oi hahedinaraia.
5 Oi hereva henidia taudia be oi gwauraidia gaudia bema idia diba vadaeni, idia sibodia ese emu hereva ena kahana idauidau be edia lalona dekenai idia hakapudia diba. To oi gwauraidia gaudia bema idia diba lasi, hesiriu herevadia bona hesiriu sentens momo oi gaukaralaidia be namo, oi durudia totona.
6 Emu hereva ena badina ta ta siriudia maoromaoro daladia haida be inai: Oi gwauraidia edia vara hegeregeredia, ia vara guna gauna ela bona gabeai ia vara gauna; eiava oi gwauraidia edia bada hegeregeredia, anina maragi gauna ela bona anina bada gauna; eiava hekwakwanai ta oi herevalaia guna, bena hanaia dalana be gabeai oi herevalaia.
7 Dala rua amo emu hereva oi haginia diba. (1) Hereva momokani be oi hereva henidia taudia vairadiai oi atoa, bena ma hereva haida amo oi hamomokania. (2) Taunimanima edia lalohadai kererena ta ena kerere oi gwauraia hedinarai, bena unai dala amo oi hakoikoia vadaeni murinai, hereva momokani do ia hedinarai goevagoeva. Unai murinai, unai hereva momokani badinaia dalana oi gwauraia sibona.
8 Hereva ena kahana iboudiai edia gabu korikoridia dekenai atodia. Emu hereva oi hegaegaelaia neganai, oi naria namonamo, oi ese badina lasi herevana ta oi atoa vareai garina. Ruma ta oi haginia neganai, bema badina eiava du oi atoa guna lasi, haba oi haginia diba lasi; unai hegeregerena, namona be hereva ta ta edia badina oi atoa guna, edia gabu korikoridia ai.
9 Unai bamona oi karaia totona, pepa maragidia ta ta ai hereva ena badina ta ta oi torea. Unai murinai pepa ta ta be edia hereva hegeregeredia edia gabu korikoridia dekenai oi atodia hebou. Bema ta ena atoa vareai gabuna momokanina oi davaria diba lasi, vadaeni, oi negea.
10 Oi naria namonamo, anina bada herevana ta oi reaia garina. Bema tau ta ese sitori rua rumana ia haginia to ena vadavada be lasi, ia kerere ani? Unai hegeregerena, hereva ta oi henia neganai, bema ena badina herevadia haida oi reaia, ia hegeregere lasi, bona idia kamonai taudia haida be ena anina do idia lalo-pararalaia lasi.