Lalohadai Hakapua Namonamo

DO OI herevalaia gaudia oi do hakapua lasi neganai, namona be emu tahua gauna oi laloa. Emu tahua gauna be ma haida dekenai gau ta​—hadibaia hereva, lalohadai, kara, eiava mauri dalana ta​—oi hahedinaraia sibona, a? Oi ura lalohadai ta oi hamomokania eiava hakoikoia, a? Oi ura gau ta do idia laloa bada eiava kara ta do idia karaia, a? Herevana tau ta eiava taunimanima hutuma oi hereva henia, emu tahua gauna hagugurua totona namona be edia diba bona edia lalohadai oi herevalaia gauna dekenai oi laloa. Unai oi karaia murinai, do oi herevalaia gauna be emu tahua gauna hagugurua totona oi ia durua dalanai oi hegaegaelaia.

Kara 9:22 ese Saulo (Paulo) ena haroro gaukara Damaseko dekenai ia sivarailaia neganai, ia gwau Paulo ese “Iesu ia harorolaia noho, ia gwau [“hereva hakapua namonamo dalanai ia hamomokania,” NW] ia be Keriso momokani.” Edena bamona hereva hakapua namonamo dalanai unai ia hamomokania? Antioka bona Tesalonika dekenai Paulo be gabeai ia haroro ena sivarai ese ia hahedinaraia bamona, Paulo ia diba Iuda taudia ese Heberu Revarevadia bona idia lalonai Mesia ena sivarai idia abia dae dainai unai gaudia ia herevalaia guna. Bena, Paulo ese unai Revarevadia amo Mesia ena mauri bona gaukara idia herevalaia kahadia ia abia hidi. Unai ia gwauraia bona Iesu dekenai idia vara gaudia ida ia hahegeregerea. Dokonai, unai amo ia hedinarai lalohadaina ia gwauraia, anina be Iesu be Keriso, eiava Mesia, momokani. (Kara 13:​16-41; 17:​2, 3) Bema oi ese hereva hakapua namonamo dalanai Baibel ena hereva momokani oi hahedinaraia, ma haida edia lalona ia veria diba.

Hereva Henia Dalana Oi Hegaegaelaia. Do oi herevalaia gauna be dala idauidau ai oi hakapua namonamo diba. Nega tamona dala idaudia haida oi gaukaralaia hebou diba bema oi laloa unai ia namo. Dala haida mani oi laloa.

Kahana ta ta ai oi hegaegaelaia. Do oi herevalaia gauna be kahana idauidau dekenai oi hapararaia, idia ta ta ese emu tahua gauna idia durua. Reana unai kahana idauidau be oi herevalaia gauna dekenai lalo-parara idia havaraia hereva badadia. Reana idia be gau ta idia hamomokania eiava hakoikoia hereva. Oi herevalaia gauna idia durua herevadia haida be kamonai taudia eiava emu tahua gauna dainai reana do oi atoa eiava kokia.

Kahana ta ta ai hereva hegaegaelaia dalana ena haheitalai mani oi laloa. Dirava ena ladana herevalaia neganai, reana kahana ta ta be (1) dahaka dainai Dirava ena ladana do ita diba be mai anina bada, (2) Dirava ena ladana be daika, bona (3) edena dala ai unai ladana do ita abia isi.

“Hesiai tauna mai ena kamonai, bona mai ena kara maoromaoro” ese Baibel stadi totona idia karaia gaudia amo kahana ta ta ai hereva hegaegaelaia dalana do ita dibaia. (Mat. 24:45) Nega momo unai bukadia lalonai hereva idauidau idia noho, stiuden tauna ese Baibel ena hereva momokani badadia ia diba totona. Buka badadia ai karoa ta ta be kwara hereva maragidia amo idia hapararaia. Kahana ta ta be mai anina sivarai ibounai hahedinaraia totona bona stiuden tauna ia durua hereva gabena ia lalo-pararalaia totona.

Ia vara gauna bona ia vara ena badina. Lalohadai hakapua namonamo dalana ma ta be ia vara gauna bona ia vara ena badina oi hahedinaraia.

Inai dala be namo, bema oi be kara ta idia karaia eiava idia karaia gwauraia taudia hutuma eiava haida oi hereva henia bona idia ese unai kara dainai do ia vara diba gauna idia laloa be namo. Aonega Herevadia karoa 7 ese haheitalai namona ia hahedinaraia. Dala namona ai ia hahedinaraia matamata tauna ta “mai ena laloa kavakava” (ena badina unai) be ariara hahine ida ia lao bona dika ia davaria (ia vara gauna unai).​—Aon. 7:7.

Emu hereva ena siahu oi habadaia totona reana Iehova ena dala idia badinaia lasi taudia dekenai ia vara dika be Iehova idia kamonai henia taudia dekenai ia vara namo ida oi hahegeregerea. Mose be Iehova ena lauma ese ia hasiahua lalonai, Israela taudia be Gwauhamata Tanona idia vareai gwauraia neganai, unai dala ai ia hereva.​—Deut., karoa 28.

Nega haida, namona be emu hereva oi hamatamaia neganai ia vara gauna ta oi hahedinaraia, bena unai ia vara ena badina idauidau oi hahedinaraia. Nega momo unai oi karaia lalonai hekwakwanai bona hanaia dalana oi hahedinaraia.

Hekwakwanai bona hanaia dalana. Bema haroro gaukara lalonai taunimanima idia laloa hekwakwanai oi herevalaia bona hanaia dalana namona oi hahedinaraia, reana taunimanima idia ura kamonai. Reana unai hekwakwanai be oi ese eiava ruma tauna ese ia gwauraia.

Reana unai hekwakwanai be taunimanima idia buruka bona idia mase, taravatu utua karana ia bada, eiava kara gageva ia bada herea. Unai hekwakwanai idia hedinarai goevagoeva dainai, hamomokania herevadia momo oi gwauraia be badina lasi. Unai hekwakwanai oi gwauraia sibona, bona Baibel amo hanaia dalana oi hahedinaraia.

To, reana hekwakwanai ta be ta ena mauri lalonai ia vara, hegeregere adavana be lasi tama eiava sina ena hekwarahi, gorere badana ese ia havaraia lalo-metau, eiava ta ese ia hahisia dainai ia vara lalohisihisi. Namo bada oi havaraia totona, namona be ena hereva oi kamonai namonamo guna. Baibel ese unai hekwakwanai ibounai dekenai diba namona ia henia. To unai diba oi gaukaralaia namonamo be namo. Emu hereva ese ta ia durua momokani totona, gau korikorina ta oi herevalaia. Oi hahedinaraia goevagoeva, oi ese hekwakwanai haorea vaitani dalana, nega sisina lalonai durua dalana, eiava hari inai negai do ia ore lasi hekwakwanai haheaukalaia dalana oi herevalaia. Anina be, namona be oi herevalaia Baibel siridia ese oi gwauraia lalohadaina idia hamomokania. Bema lasi, oi gwauraia hanaia dalana be ruma tauna ese ia lalo-pararalaia diba lasi.

Idia vara negana hegeregerena. Gau haida be idia vara negana hegeregerena oi hegaegaelaia diba. Hegeregere, Esodo bukana lalonai, Hisihisi Ten be idia vara negana hegeregerena idia hedinarai. Heberu karoa 11 ai, aposetolo Paulo ese abidadama bada taudia be edia mauri negana hegeregerena ia herevalaidia.

Bema guna idia vara gaudia be idia vara negana hegeregerena oi hahedinaraia, kamonai taudia ese gau haida idia vara dalana idia itaia diba. Unai be momokani hari inai negai ena histori sivaraina bona Baibel ena sivarai dekenai. Unai dainai, oi ese gau idauidau be idia vara negana hegeregerena oi hahedinaraia neganai, idia vara gaudia bona idia vara edia badina oi hahedinaraia danu. Bema oi ura Baibel ia perovetalaia vaira negana oi hahedinaraia, do idia vara negana hegeregerena oi hahedinaraia be namo, kamonai taudia ese idia lalo-pararalaia bona laloatao totona.

Idia vara negana hegeregerena gau idauidau oi herevalaia neganai, reana nega ibounai gau ginigunana amo oi hamatamaia lasi. Nega haida, ia vara gauna badana ta amo sivarai oi hamatamaia diba. Hegeregere, ekspiriens ta oi gwauraia neganai, reana oi ura ta ena abidadama Dirava dekenai ia tohoa gauna oi hahedinaraia guna. Unai kahana amo kamonai taudia edia lalona oi veria murinai, idia vara gaudia be idia vara negana hegeregerena oi sivarailaia.

Mai Anina Gaudia Sibona. Herevana edena dala ai oi herevalaia gauna oi hegaegaelaia, mai anina gaudia sibona oi abia hidi be gau badana. Namona be emu hereva ena sinado hegeregerena idia oi abia hidi. Kamonai taudia oi laloa danu. Reana kamonai taudia haida dekenai gau ta be mai anina bada, to ma haida dekenai unai be anina lasi. Bona namona be oi herevalaia gaudia ibounai ese emu tahua gauna idia durua. Bema lasi, ena be emu hereva idia ura kamonai, to reana anina namona ia havaraia lasi.

Hereva haida oi tahua neganai, reana do oi herevalaia gauna idia hahedinaraia hereva namodia momo oi davaria. Idia ibounai do oi gaukaralaia be namo, a? Bema kamonai taudia dekenai hereva momo oi herevalaia, reana emu tahua gauna ia guguru lasi. Hereva badadia haida sibona oi herevalaia namonamo be do idia laloatao diba, to lalohadai momo oi gwauraia haraga be do idia laloatao lasi. Oi herevalaia gauna dekenai diba habadaia herevadia haida oi gwauraia diba. To namo lasi idia ese emu tahua gauna idia hunia. Baibel ese unai bamona gaudia ia hahedinaraia dalana namona be Mareko 7:​3, 4 bona Ioane 4:​1-3, 7-9 dekenai oi itaia.

Hereva badana ta be hereva badana ma ta ida oi hakapua neganai, namona be oi haraga lasi, kamonai taudia ese hereva ia heau dalana idia itaia noho totona. Lalohadai idia gaukara hebou namonamo totona, namona be hakapua gaudia oi gaukaralaia. Reana unai gaudia be hereva haida eiava sentens ta, unai lalohadai idia hakapua dalana idia hahedinaraia. Gado momo ai hakapua herevadia idia gaukaralaia, lalohadai matamata ena anina lalohadai gunana dekenai idia hahedinaraia totona.

Mai anina herevadia sibona oi gaukaralaia bona oi hakapua namonamo neganai, emu tahua gauna do oi hagugurua.