Stadi 27

Gini Bona Tauanina Toana

¹ Ia gini maoro tauna be ia daradara lasi, ia gari lasi, bona ia marere kava lasi. Ia diba idia henia gaukarana ia karaia diba. To unai ia hekokorokulaia lasi be namo. Hereva henia taudia matamatadia momo be idia hemarai eiava idia gari, hebou taudia vairadiai idia gini neganai. To edia gari bona edia hemarai haoredia dalana be ia noho.

² Badina be dahaka hereva henia taudia haida idia gari? Badina toi be inai: (1) Idia hegaegae lasi, eiava (2) idia laloa edia hereva be anina bada lasi, eiava (3) idia laloa idia hereva namo diba lasi.

³ Vadaeni, dahaka ese emu lalona do ia hagoadaia? Gauna be inai: Namona be emu lalona oi hadaia, oi gwau do oi karaia diba. Emu hereva ginigunadia oi henia negadiai reana oi gari, to hereva haida do oi henia murinai emu gari do ia ore.

⁴ Oiemu lalona ia goada totona, namona be do oi herevalaia gaudia iboudiai oi dibadia bona oi hamomokanidia guna, bona do oi herevalaidia dalana danu oi hegaegaelaia be namo. Bena Sikuli lalonai oi herevalaidia neganai, emu hereva sibona do oi laloa, bona sibomu emu tauanina bona emu gari do oi laloaboio; Dirava hamoalea dalana do oi laloa, taunimanima hamoaledia dalana do oi laloa lasi.​—⁠Gal. 1⁠:10; Eso. 4⁠:​10-12; Ier. 1⁠:⁠8.

⁵ Bema oi daradara eiava oi hemarai eiava oi gari, oiemu tauanina ena toana bona emu gini ena toana bona emu hereva ena toana ese unai do idia hahedinaraia. Ta ena gari idia hahedinaraia gaudia haida be inai: Ena imana ruaosi be ena tauanina murinai ia atodia, eiava ia atodia maoromaoro au hegeregeredia, eiava haroro patana ia dogoatao auka herea, eiava ena imana ta be ena piripou ena poketi lalonai ia atoa loulou, eiava ena vairana o ena matagalasi o ena pensolo o ena pepa ia daua toho loulou, eiava ena aena o ena tauanina ia hamarerea momo, eiava ena uduna bibinadia ia topoa loulou, eiava ena kanudi ia hadonoa loulou, eiava ia hahodi haraga.

⁶ Bema unai kara be mai emu lalona ida oi koudia toho, do oi koudia diba. Namona be emu hereva oi laloa bada; idia kamonai taudia oi lalo-hekwarahilaidia lasi bona sibona oi laloa momo lasi be namo. Oi hahodi metairametaira, bona oi hereva matamaia gwauraia neganai oi laga-ani sisina.

⁷ Bema emu gadona ena regena ia daekau momokani eiava oi huahua loulou, unai ese ia hahedinaraia oi gari, to unai kara oi hadokoa diba. Platfom dekenai oi daekau gwauraia neganai oi raka metairametaira. Oi hereva matamaia neganai, bema oi daradara eiava oi gari, oi hereva metairametaira bona emu gadona ena regena oi hadihoa. Emu imana oi gaukaralaia, bona oi laga-ani loulou, unai amo emu lalo-hekwarahi do oi hamaragia, platfom dekenai oi gini negadiai.

⁸ Emu tauanina ena toana ia namo be gau badana. Bema oiemu toana be namo lasi, oi hereva henidia taudia ese oi eiava emu dabua do idia raraia bona emu hereva do idia kamonai namonamo lasi. Bema emu tauanina ena toana ia dika, oi idia itaia taudia ese iseda orea do idia matauraia lasi bona oiemu haroro herevana do idia dadaraia. Keristani tataudia be sitailo idauidau dabuadia idia karaia lasi, taunimanima ese edia dabua do idia raraia garina. Keristani hahinedia danu idia ura lasi edia dabua dainai taunimanima iboudiai ese do idia raraidia. Idia ura edia toana do ia goeva bona ia namo. Keristani hahinedia ese Paulo ena sisiba 1 Timoteo 2⁠:9 lalonai idia badinaia be namo. Unai hegeregerena, tanobada ena lebulebu hahinedia edia sitailo idia tohotohoa lasi.

⁹ Tano idauidau taudia be mai edia dabua idauidau, bona taunimanima ta ta edia ura dabuadia be idauidau, to namona be dabua namodia sibodia ita karaia, hebou taudia ese iseda dabua do idia laloa dika bena unai dainai edia lalona do idia hekwakwanai garina. Haroro Sikuli eiava hesiai hebou lalonai, tadikaka ese dabua namona, pablik tok dabuana bamona, be idia karaia be namo. Namona be hereva henia taudia iboudiai ese edia huina idia duaria namonamo guna, bona tatau idia seivi namonamo guna be namo.

¹⁰ Bema ta ena dabua ena toana namona dainai eiava ena tauanina ena toana namona dainai Sikuli naria tauna ese ia hanamoa be namo, hebou taudia vairadiai ia hanamoa be maoro; to bema ta ena dabua ena toana dikana dainai eiava ena tauanina ena toana dikana dainai ia sisiba henia be namo, namona be ia sisiba henia hehuni mai ena manau ida.

¹¹ Ta be platfom dekenai ia gini neganai, ena gini toana ia naria namonamo be namo. Gini kerere daladia haida be inai: Ta be ena aena ia hapadadia bada, eiava haroro patana ia dogoatao, eiava ena aena ia lokua, eiava ena imana be ena piripou ena poketi lalonai ia atoa. Vadaeni, platfom dekenai oi do gini lasi neganai, emu gini toana oi laloa be namo.

¹² Namona be emu Baibel bona emu baege idia goeva bona mai edia toana namona, bona pepa gunadia amo idia honu lasi be namo. Pen momo eiava ma gau haida be emu siedi ena poketi lalonai oi atoa lasi.

¹³ Emu vairana ena toana ia maoro. Mase eiava unai bamona gauna ta oi herevalaia neganai, oi kiri be maoro lasi. Moale gaudia oi herevalaia neganai, emu vairana oi huaia oi badu bamona be maoro lasi. Namona be emu vairana ena toana be emu hereva ena anina hegeregerena.