Mauri Aukana Ia Matamaia

EDEN umana murimurinai, Adamu bona Heva ese hekwakwanai momo idia davaria. Edia aniani abia totona idia hekwarahi bada. Au bona ava ginigini momo idia tubu, to huahua audia be momo lasi. Adamu bona Heva ese Dirava idia kamonai henia lasi bona Ena turana karana idia rakatania neganai, idia dekenai unai ia vara.

To unai dika sibona lasi, mase dalana dekenai idia vareai. Laloaboio lasi, Dirava ia gwau do idia mase bema ia taravatua au ena huahua idia ania. Vadaeni idia ania dinana ai idia mase matamaia. Dirava idia kamonai henia lasi karana be kavakava!

Dirava ese Adamu bona Heva be Eden amo ia luludia murinai, edia natudia ibounai idia havaraia. Anina be edia natudia do idia buruka bona do idia mase danu.

Bema Adamu bona Heva ese Iehova idia kamonai henia, idia bona edia natudia edia mauri be do ia namo herea. Mai moale ida tanobada dekenai do idia noho ela bona hanaihanai diba. Ta do ia buruka, gorere bona mase lasi.

Dirava ia ura taunimanima be mai moale ida idia noho ela bona hanaihanai, bona Ia gwauhamata dina ta unai do ia vara. Tanobada be hairai gabuna ai do ia lao sibona lasi, to taunimanima do idia gorere lasi. Bona taunimanima ibounai tanobada dekenai do idia hetura heheni bona Dirava do idia tura henia danu.

To hari Heva be Dirava ena turana lasi. Unai dainai ena natudia ia havaraia neganai, ia hekwarahi bada. Hisihisi bada ia mamia. Iehova ia kamonai henia lasi dainai, ia lalohisihisi bada, ani?

Adamu bona Heva ese memero bona kekeni momo idia havaraia. Edia natuna ginigunana ia vara neganai, ena ladana idia atoa Kaino. Edia natuna iharuana idia gwauraia Abela. Idia dekenai dahaka ia vara? Oi diba, a?