Adamu Bona Heva ese Dirava Idia Kamonai Henia Lasi

Dina ta Heva be sibona ia noho neganai, gaigai ta ese ia hereva henia. Ia gwau: ‘Momokani Dirava ia gwau au ibounai ena huahua do umui ania lasi, a?’ Heva ia gwau: ‘Uma gabu ena au huahua ibounai ai ania diba, to tamona sibona be do ai ania lasi. Bema unai au ena huahua ai ania, do ai mase.’ Gaigai ia gwau: ‘Do oi mase lasi. To bema au ena huahua umui ania, umui be Dirava bamona ai do umui lao.’ Unai be momokani, a? Lasi, unai be koikoi. To Heva be unai hereva ia abia dae. Heva be au huahua ia itaia noho dainai, unai ese iena ura ia habadaia. Unai au huahua ia ania bona Adamu dekenai ia henia. Adamu ia diba bema Dirava idia kamonai henia lasi do idia mase. To Adamu ese unai au huahua ia ania danu.

Gabeai, Iehova ese Adamu bona Heva ia hereva henia. Ia nanadaia dahaka dainai ia idia kamonai henia lasi. Heva ese gaigai ia bleim, bona Adamu be Heva ia bleim. Adamu bona Heva ese Iehova idia kamonai henia lasi dainai, Eden umana amo ia kokia. Idia vareai lou lasi totona, aneru bona tuari kaia mai ena lahi ia atoa.

Iehova ia gwau ia ese Heva ia koia tauna do ia panisia danu. Gaigai korikori ese Heva ia hereva henia lasi. Badina Iehova ese gaigai ia karaia neganai, idia hereva diba lasi. To aneru dikana ta be gaigai amo ia hereva. Unai dala amo Heva ia koia. Unai aneru idia gwauraia Satani Diabolo. Vaira nega ai, Iehova ese Satani do ia hadikaia ore, unai amo taunimanima do ia koia lou lasi kara dika idia karaia totona.