Taunimanima ese Kohoro Badana ta Idia Haginia

LAGANI momo idia lao. Noa ena memero amo natuna momo idia vara. Bona edia natudia idia tubu daekau bona natudia ma haida idia havaraia. Daudau lasi murinai tanobada dekenai taunimanima idia hutuma vadaeni.

Idia ta be Noa ena tubuna, ena ladana be Nimiroda. Iena kara be dika, ia ese animal bona taunimanima ia tahua bona ia hamasedia. Haida lohiaia totona Nimiroda be sibona king ai ia halaoa. Dirava be Nimiroda ia ura henia lasi.

Unai negai taunimanima ibounai edia gado be tamona. Nimiroda ia ura idia ibounai be gabu tamona dekenai idia noho, unai amo idia ia lohiaia diba. Unai dainai ia karaia gauna oi diba, a? Taunimanima ia hamaorodia hanua badana ta mai ena kohoro badana ta do idia haginia. Laulau dekenai oi itaia diba, idia be biriki idia karaia noho.

Iehova Dirava be unai gaukara dekenai ia moale lasi. Dirava ia ura taunimanima ese unai gabu do idia rakatania bona tanobada ibounai dekenai idia noho. To taunimanima idia gwau: ‘Toreisi! Hanua ta bona guba dekenai ia daekau kohoro ta ita haginia. Bena taunimanima ibounai be ita do idia diba!’ Idia ura sibodia idia hanamoa, to Dirava lasi.

Unai dainai Dirava ese kohoro idia haginia taudia edia gaukara ia koua. Ia koua dalana oi diba, a? Nega tamona taunimanima edia gado ia haidaua, bena gado idauidau dekenai idia hereva. Gaukara taudia idia hereva neganai, ta be ta ena gado ia lalo-pararalaia diba lasi. Unai dainai edia hanua idia gwauraia Babela eiava Babulonia, anina be “Daradara.”

Taunimanima ese Babela idia rakatania matamaia. Gado tamona ai idia hereva taudia be idia lao hebou, tanobada ena kahana haida dekenai idia noho totona.