Babela Kohorona

Abata murinai, Noa ena natudia memero bona edia adavadia be natudia momo idia havaraia. Edia famili ia bada ia lao, bona tanobada ena kahana idauidau dekenai idia lao matamaia, Iehova ese idia ia hamaoroa hegeregerena.

To unai famili haida be Iehova idia badinaia lasi. Idia gwau: ‘Namona be siti ta ita haginia bona iniseni ita noho. Kohoro ta ita haginia, bona do ia daekau ela bona guba. Unai amo ladana bada ita abia.’

Iehova be unai taudia edia gaukara dekenai ia moale lasi dainai, edia gaukara ia koua. Oi diba dahaka ia karaia? Ia ese edia gado ia haidaua. Edia gado be ta ta ese idia lalopararalaia lasi dainai, gaukara idia hadokoa. Bona idia haginia siti idia gwauraia Babela, anina be “Daradara.” Taunimanima be tanobada ena gabu idauidau dekenai idia lao. Bona idia lao gabudia dekenai kara dikadia idia karaia. To Iehova idia lalokau henia taudia haida idia noho, a? Karoa 8 ai do ita itaia.