Isako be Hahine Namona Ia Abia

INAI laulau dekenai ia noho kekenina oi diba, a? Iena ladana be Rebeka. Bona ia raka henia tauna ena ladana be Isako. Rebeka be Isako ena adavana ai do ia lao. Edena dala ai unai ia vara?

Isako ena tamana Aberahamo ia ura adavana namona ta ia abia ena natuna totona. Ia ura lasi Isako be Kanana kekeni ta ia adavaia, badina unai taudia ese dirava koikoidia idia tomadiho henia. Unai dainai Aberahamo ese ena hesiai tauna ia boiria bona ia hamaoroa: ‘Lau ura egu varavara idia noho gabuna Harana dekenai oi lao bona adavana ta oi abia egu natuna Isako totona.’

Maoromaoro Aberahamo ena hesiai tauna ese kamelo 10 ia abia bona laolao daudauna ia karaia. Aberahamo ena varavara edia noho gabuna kahirakahira ia ginidae neganai, ranu guri ta dekenai ia naria. Unai be adorahi momokani, bona hanua hahine be ranu guri amo ranu abia totona kahirakahira do idia mai. Unai dainai Aberahamo ena hesiai tauna be Iehova dekenai ia guriguri: ‘Mani emu kara, lau bona kamelo totona ranu do ia abia kekeni be oi ese oi abia hidi Isako ena adavana ai ia lao totona.’

Daudau lasi Rebeka be ranu abia totona ia mai. Aberahamo ena hesiai tauna be ranu totona ia noinoi neganai, ia dekenai ia henia. Bena ranu haida ia abia idia ranu mase kamelo ibounai totona. Unai be hekwarahi bada herea, badina kamelo be ranu momo idia inua.

Rebeka ese unai gaukara ia haorea neganai, Aberahamo ena hesiai tauna ese ia nanadaia iena tamana ena ladana be daika. Danu, ia noia bema edia ruma dekenai ia mahuta diba. Ia haere: ‘Lauegu tamana be Betuela, bona ai dekenai oi noho be hegeregere.’ Aberahamo ena hesiai tauna ia diba Betuela be Aberahamo ena tadina Nahoro ena natuna. Unai dainai ia tui diho bona Iehova ia tanikiu henia, Ia ese ia be Aberahamo ena varavara dekenai Ia hakaua lao dainai.

Unai hanuaboi ai Aberahamo ena hesiai tauna be Betuela bona Rebeka ena taihuna Labana dekenai ia mai ena badina ia gwauraia. Idia ruaosi idia lalo-tamona Rebeka be ia danu do ia giroa bona Isako do ia adavaia. Rebeka idia nanadaia neganai, dahaka ia gwau? Ia gwau, ‘Oibe,’ ia ura ia lao. Unai dainai murina dinana ai kamelo dekenai idia guia bona Kanana dekenai idia giroa.

Idia ginidae neganai, ia be adorahi kahanai. Rebeka ia itaia tau ta ia raka mai. Unai tau be Isako. Isako be Rebeka ia itaia neganai ia moale. Isako ena sinana Sara be lagani toi gunanai ia mase bona ia do lalohisihisi noho. To gabeai Isako ese Rebeka ia lalokau henia bada bona ia moale lou.