Gima Kohorona INTANET LAIBRI
Gima Kohorona
INTANET LAIBRI
Hiri Motu
  • BAIBEL
  • PABLIKEISEN
  • HEBOUDIA
  • w97 1/1 rau 30-31
  • Adavana ta Ia Davaria Isako Totona

Oi abia hidi kahana ena vidio ia noho lasi.

Sori, hekwakwanai ia vara vidio ia loud totona.

  • Adavana ta Ia Davaria Isako Totona
  • 1997 Gima Kohorona Iehova Ena Basileia Ia Harorolaia
  • Sinado maragidia
  • Inai Bamona Atikol
  • Gaukara Aukana
  • Ita Idia Hadibaia
  • Rebeka Ia Ura Iehova Ia Hamoalea
    Emui Natudia Umui Hadibaia
  • Headava ta be Taunimanima Milion Momo Ia Hanamodia
    1990 Gima Kohorona Iehova Ena Basileia Ia Harorolaia
  • Guriguri Ena Siahu
    Gima Kohorona Iehova Ena Basileia Ia Harorolaia—2000
  • Isako be Hahine Namona Ia Abia
    Lauegu Baibel Sivarai Bukana
Ma Haida Itaia
1997 Gima Kohorona Iehova Ena Basileia Ia Harorolaia
w97 1/1 rau 30-31

Iehova Ena Ura Idia Karaia

Adavana ta Ia Davaria Isako Totona

RANU guri badinai ia helai tau burukana ia hesiku bada herea. Ia bona ena bamodia mai edia kamelo 10 ida be Bere Sieba amo idia mai Mesopotamia ena not kahana ai​—edia padana be kilomita 800 ia hanaia.a Hari, idia lao gabuna ai idia ginidae neganai, unai hesiku laolao tauna ese ena gaukara aukana ia lalohadailaia. Unai tauna be daika, bona dahaka dainai unai laolao aukana ia karaia?

Unai tau be Aberahamo ena “hesiai tauna badana.” (Genese 24:2) Unai sivarai ese ena ladana ia hatoa lasi, to reana unai be Eliesere, nega ta Aberahamo be ia gwauraia iena ruma tauna ta bona iena ‘kohu do ia abia tauna tamona.’ (Genese 15:​2, 3) Unai be Aberahamo bona Sarai be natuna lasi neganai. Hari edia natuna mero, Isako, ena mauri lagani be 40, bona ena be hari Eliesere be Aberahamo ena kohu ibounai do ia abia tauna lasi, ia be do iena hesiai tauna. Unai dainai, Aberahamo ese noinoi aukana ia gwauraia neganai, ia abia dae. Unai be dahaka?

Gaukara Aukana

Aberahamo ena negai headava be mai anina famili dekenai sibona lasi to bese, eiava iduhu ibounai dekenai. Unai dainai edia kastom hegeregerena tama sina ese adavana idia abia hidi natudia totona. To, ena natuna mero Isako totona adavana ia tahua neganai, Aberahamo ese hekwakwanai ia davaria. Kanana taudia edia mauri dalana be Dirava ese ia ura henia lasi dainai, idia ta ia adavaia be hegeregere lasi. (Deuteronomi 18:​9-​12) Bona ena be kastom hegeregerena tau ese ena bese hahinena ta do ia adavaia, to Aberahamo ena varavara be kilomita handred momo gabu daudau ai idia noho, Mesopotamia ena not kahana ai. Unuseniai Isako ia siaia diba lasi, badina Iehova ese Aberahamo ia gwauhamata henia vadaeni: ‘Inai tano be oiemu tubudia dekenai do lau henia,’ Kanana tanona unai. (Genese 24:7) Unai dainai, Aberahamo be Eliesere dekenai ia gwau: “Oi giroa lou lauegu tano korikori dekenai, bona unuseni, lauegu varavara dekena amo lauegu natuna Isako ena adavana oi abia.”​—Genese 24:4.

Laolao daudauna ia haorea murinai, Eliesere be ranu guri badinai ia laga-ani lalonai ena gaukara aukana ia laloa. Ia diba daudau lasi murinai, hahine taudia do idia mai ranu guri amo hanuaboi lalonai do idia gaukaralaia ranu abia totona. Unai dainai Iehova ia noia: “Lau be kekeni ta dekenai do lau hereva, do lau gwau, ‘Mani emu kara oiemu hodu oi atoa diho lao, bona ranu sisina lau dekenai do oi henia, do lau inua.’ Bema ia gwau, ‘Namo, oi inua, bona oiemu kamelo dekenai danu ranu do lau henia.’ Lau ura unai kekeni be oiemu abia hidi kekeni oiemu hesiai tauna Isako dekenai. Bema inai bamona ia vara neganai, do lau diba oiemu gwauhamata lauegu biaguna dekenai be oi hamomokania vadaeni.”​—Genese 24:14.

Ia do guriguri noho neganai, hahine matamata mai hairaina ladana Rebeka ia mai kahirakahira. Eliesere be ia dekenai ia gwau: “Mani emu kara, oiemu hodu dekena amo ranu sisina lau dekenai oi henia, do lau inua.” Rebeka be unai ia karaia bena ia gwau: “Ranu ma haida do lau utua, oiemu kamelo dekenai do lau henia, edia ura hegeregerena.” Unai be mai hariharibada herevana, badina ia ranu mase kamelo be lita 95 ia inua diba miniti 10 lalonai! Herevana Eliesere ena kamelo be unai bamona idia ranu mase eiava lasi, to Rebeka ia diba ia gwauhamata gaukarana be mai ena hekwarahi bada. Vadaeni, ia ese “karaharaga iena hodu ena ranu orena daramu lalonai ia bubua, bona ranu guri dekenai ia giroa lou, giroa lou, ia lao bona hesiai tauna ena kamelo ibounai idia inua vadaeni.”​—Genese 24:15-​20.

Eliesere ia lalo-parara Iehova ese ia hakaua dainai, ia ese Rebeka dekenai golo rini ta iena udu baubauna totona bona golo gana rua iena imana totona ia henia, hari edia davana be K1,000 bamona. Rebeka ese ia hamaoroa ia be Nahoro, Aberahamo ena tadina, ena tubuna neganai, Eliesere ese tanikiu gurigurina Iehova dekenai ia henia. Ia gwau: “Oi Lohiabada ese maoromaoro lau oi hakaua, lauegu biaguna ena tadina ena ruma dekenai.” (Genese 24:22-27) Eliesere be Rebeka ena ruma bese dekenai ia hakaua. Gabeai, Rebeka be Isako ena adavana ai ia lao, bona ia ese hahenamo ia abia, Mesia, Iesu, ena tubuna hahine ta ai ia lao.

Ita Idia Hadibaia

Iehova be Eliesere ese mai guriguri ida ia karaia gaukarana ia hanamoa, unai gaukara be Dirava gari henia adavana ta ia tahua Isako totona. To, oi laloatao be namo, Isako ena headava be mai anina bada Dirava ena ura lalonai Aberahamo amo garana ia havaraia unai. Unai dainai, namo lasi unai sivarai dainai ita laloa adavana totona idia guriguri taudia ibounai be hoa dalanai adavana do idia abia. Lasi, to bema Iehova ena hakaua herevadia ita badinaia, ia ese goada ita ia henia mauri ena hekwakwanai do ita hanaia totona​—headava maurina eiava headava lasi maurina lalonai.​—1 Korinto 7:​8, 9, 28; Filipi 4:​11-​13 itaia.

Eliesere be ia hekwarahi bada Iehova ena dala ai gaukara ia karaia totona. Ita danu reana do ita davaria Iehova ena ura ita badinaia be nega momo ia auka. Hegeregere, reana tiokratik gaukarana ia hadikaia lasi moni gaukarana, Dirava ia gari henia adavana, hagoadaia turadia, bona moale karadia namodia ita davaria be auka. (Mataio 6:​33; 1 Korinto 7:​39; 15:33; Efeso 4:​17-​19) To, Iehova ese Baibel ena hakaua herevadia idia utua lasi taudia ia durua diba. Baibel ia gwauhamata: “Lohiabada do oi abidadama henia, mai emu kudouna ibounai. Oi sibona oiemu diba do oi abidadama henia lasi. Oi karaia gaudia ibounai lalonai, Lohiabada do oi laloa, vadaeni ia ese dala maorona, be oi dekenai do ia hadibaia.”—Aonega Herevadia 3:5, 6.

[Footnotes]

a Kamelo idia raka diba dalana bema ita laloa, reana unai laolao ena lata be dina 25 ia hanaia.

    Hiri Motu Pablikeisen (1987-2025)
    Log aut
    Login
    • Hiri Motu
    • Ta dekenai siaia
    • Preferens
    • Copyright © 2025 Watch Tower Bible and Tract Society of Pennsylvania
    • Gaukaralaia Taravatudia
    • Privacy Policy
    • Privacy Settings
    • JW.ORG
    • Login
    Ta dekenai siaia