Iakobo be Harana Dekenai Ia Lao

INAI laulau dekenai Iakobo ia hereva henia tatau oi diba, a? Dina momo ia laolao murinai, Iakobo ese ranu guri ta badinai ia davaridia. Edia mamoe idia naria noho. Iakabo ia henanadai: ‘Edena gabu amo umui mai?’

Idia gwau: ‘Harana amo.’

Iakobo ia henanadai: ‘Labana umui diba?’

Idia haere: ‘Oibe. Itaia, ena natuna kekeni Rahela be Labana ena mamoe ia abia mai inai.’ Laulau dekenai Rahela oi itaia diba, ia be daudau amo ia mai noho, ani?

Iakobo ese Rahela ia itaia ena vavana Labana ena mamoe ia hakaua mai neganai, ia lao bona ranu guri ia koua nadi ia kokia, unai amo mamoe be ranu idia inua diba. Bena Iakobo ese Rahela ia kisi henia bona ena sivarai ia gwauraia. Rahela be mai moale bada danu ia lao bona ena tamana Labana ia hadibaia.

Labana be mai moale ida Iakobo ia abia dae idia danu do ia noho totona. Bona Iakobo be Rahela adavaia totona ia henanadai neganai, Labana ia moale. To, Iakobo ia hamaoroa lagani seven do ia gaukara guna, gabeai Rahela do ia henia. Iakabo ese Rahela ia lalokau henia bada dainai unai bamona ia karaia. To headava negana ia ginidae neganai, oi diba dahaka ia vara?

Labana ese ena kekeni ginigunana, Lea be Iakobo dekenai ia henia, to Rahela lasi. Iakobo ia gwau ma lagani seven Labana totona do ia gaukara neganai, Labana ese Rahela danu ia henia ena adavana ai ia lao totona. Unai negadiai tatau be hahine momo idia adavaia diba, Dirava ese ia koua lasi. To hari, Baibel ese ia hahedinaraia hegeregerena, tau ta ese hahine tamona sibona ia adavaia be namo.