Iakobo Ena Ruma Bese be Bada

INAI bese badana oi itaia. Inai be Iakobo ena natuna memero 12. Ia be mai ena kekeni haida danu. Iena natudia haida edia ladadia oi diba, a? Mani haida ita gwauraia.

Lea ese Rubena, Simeona, Levi bona Iuda ia havaraia. Rahela be natudia ia abia lasi neganai, ia lalohisihisi bada. Unai dainai Iakobo dekenai ena hesiai hahine Bileha ia henia, bona ia ese natuna rua, Dano bona Napatali ia havaraia. Bena Lea danu ese Iakobo dekenai iena hesiai hahine Silipa ia henia, bona Silipa ese Gado bona Asere ia havaraia. Gabeai Lea ese Isakara bona Sebuluno ia havaraia.

Gabeai Rahela ese natuna ta ia havaraia. Ena ladana ia atoa Iosepa. Iena sivarai haida be gabeai do ita dibaia, badina ia be dagi bada tauna ai ia lao. Iakobo be Rahela ena tamana Labana danu idia noho neganai, natuna memero 11 idia vara.

Iakobo amo kekeni haida idia vara danu, to Baibel ese tamona sibona ena ladana ia gwauraia. Iena ladana be Daina.

Nega ia ginidae bena Iakobo ia laloa namona be Labana ia rakatania bona Kanana dekenai ia giroa lou. Unai dainai ena ruma bese badana bona ena mamoe bona boromakau ibounai ia haboua, bona unai gabu daudauna dekenai idia lao.

Iakobo bona ena ruma bese be Kanana dekenai idia giroa lou murinai, Rahela ese mero ma ta ia havaraia. Idia laolao noho neganai, unai ia vara. Rahela ia hekwarahi bada dainai natuna ia havaraia lalonai ia mase. To mero maragi be ia namo. Iakobo ese iena ladana ia atoa Beniamina.

Iakobo ena natuna memero 12 edia ladadia ita laloatao be namo, badina Israela ena bese ibounai be idia amo ia vara. Momokani, Israela ena iduhu 12 dekenai Iakobo ena natuna 10 bona Iosepa ena natuna rua edia ladadia idia atoa. Inai memero momo idia vara murinai, Isako ia mauri daudau, bona tubudia momo ia abia dainai ia moale. To ena tubuna Daina dekenai ia vara gauna mani ita itaia.