Mose Ia Heau Ena Badina

MOSE oi itaia, Aigupito amo ia heau siri noho. Ia idia lulua taudia oi itaia diba, a? Idia ura Mose idia alaia ena badina oi diba, a? Mani ena badina ita tahua.

Mose be Aigupito ena lohia tauna, Farao, ena ruma lalonai ia tubu daekau. Ia be aonega bona siahu bada tauna ai ia lao. Mose ia diba ia be Aigupito tauna lasi, to ena tama sina korikoridia be Israela hesiai taudia.

Dina ta, Mose ena mauri lagani be 40 neganai, ena taunimanima edia noho dalana itaia totona ia lao. Ia itaia Aigupito taudia ese idia kara henidia dalana be dika momokani. Aigupito tauna ta ia itaia, Israela hesiai tauna ta ia botaia. Mose be gabu ibounai ia itaia bona ta ese ia itaia lasi neganai, Aigupito tauna ia botaia bona ia mase. Bena Mose ese mase tauna be miri lalonai ia hunia.

Murina dinana ai Mose ia lao ena taunimanima ia itaia lou totona. Ia laloa idia ia durua diba unai amo hesiai gaukara do idia karaia lou lasi. To Israela tatau rua ia itaia idia heai, unai dainai kerere tauna dekenai ia gwau: ‘Dahaka dainai emu tadikaka oi botaia noho?’

Ia haere: ‘Daika ese oi, emai lohia tauna bona hahemaoro tauna ai ia halaoa? Lau danu do oi alaia mase, unai Aigupito tauna oi alaia mase bamona, a?’

Vadaeni, Mose ia gari. Ia diba taunimanima be Aigupito tauna dekenai ia karaia gauna idia diba vadaeni. Farao danu ia kamonai, bona tatau haida ia siaia Mose idia alaia totona. Unai dainai Mose be Aigupito amo ia heau.

Mose ese Aigupito ia rakatania neganai, gabu daudau, Midiana tanona dekenai ia lao. Unuseniai Ietero ena bese ia davaria, bona ena kekeni Sipora ia adavaia. Mose be mamoe naria tauna ai ia lao bona Ietero ena mamoe ia naridia. Lagani 40 Midiana tano ai ia noho. Hari ena mauri lagani be 80. Bena dina ta, Mose be Ietero ena mamoe ia naria noho lalonai, hoa gauna ta ia vara, unai ese Mose ena mauri ia haidaua. Mani rau oi kehoa bona unai hoa gauna ita itaia.