Ioridane Sinavai Idia Hanaia

ITAIA! Israela taudia be Ioridane Sinavaina idia hanaia noho! To ranu be edeseni? Inai be medu negana dainai, miniti haida gunanai inai sinavai be ranu amo ia honu. To hari ranu ibounai be lasi! Bona Israela taudia be tano kaukauna dekenai idia raka hanai noho, guna Davara Kakakakana dekenai idia karaia bamona! Ranu ibounai be edeseni ia lao? Mani ita itaia.

Israela taudia be Ioridane Sinavaina idia hanaia gwauraia neganai, Iehova ese Iosua ia hamaoroa taunimanima dekenai inai bamona do ia hereva: ‘Hahelaga taudia ese Taravatu Mauana do idia abia bona ita vairanai do idia raka guna be namo. Edia aena be Ioridane Sinavaina lalonai idia atoa neganai, sinavai ena ranu ena heau do ia doko.’

Unai dainai hahelaga taudia ese Taravatu Mauana idia abia isi bona taunimanima edia vairanai idia raka lao guna. Ioridane dekenai idia ginidae neganai, hahelaga taudia edia aena be sinavai lalonai idia atoa. Ranu be ia dobu bona ia aru goada. To edia aena be sinavai dekenai idia atoa neganai ranu ena heau ia doko matamaia! Unai be hoa gauna! Sinavai ataiai, Iehova ese ranu ia koua. Daudau lasi murinai sinavai dekenai ranu be lasi.

Taravatu Mauana idia huaia hahelaga taudia be sinavai kaukauna huanai idia lao. Laulau dekenai idia oi itaia diba, a? Idia gini noho neganai, Israela taudia ibounai be Ioridane Sinavaina idia hanaia lao tano kaukauna dekenai!

Ibounai idia hanaia murinai, Iosua ese tatau goadadia 12 ia hamaoroa: ‘Hahelaga taudia mai Taravatu Mauana danu idia gini gabuna dekenai umui lao. Nadi 12 umui gogoa bona hari hanuaboi umui mahuta gabuna dekenai umui haboua. Bena, vaira laganidia lalonai, emui natudia be inai nadi edia anina totona idia henanadai neganai, namona be umui hamaorodia, Iehova ena Taravatu Mauana be Ioridane ia hanaia neganai, ranu ena heau ia doko. Nadi dainai, inai hoa karana do umui laloatao!’ Iosua ese nadi 12 be sinavai huanai hahelaga taudia idia gini gabuna ai ia haginidia.

Gabeai, Iosua ese Taravatu Mauana idia huaia hahelaga taudia ia hamaoroa: ‘Ioridane amo umui daekau.’ Idia daekau neganai, sinavai ena ranu ma ia aru lou.