Iehova ese Iosua Ia Abia Hidi

Mose be lagani momo lalonai Israela besena ia gunalaia, bona kahirakahira do ia mase. Iehova ese Mose ia hamaoroa: ‘Oi ese Gwauhamata Tanona dekenai Israela taudia do oi hakaua vareai lasi. To, daudau amo unai tano do oi itaia.’ Bena Mose ese Iehova ia noia gunalaia tauna matamata ia abia hidi totona. Iehova ia gwau: ‘Iosua dekenai oi lao bona ia oi hamaoroa ia be gunalaia tauna.’

Mose be Israela besena ia hamaoroa ia be kahirakahira do ia mase, bona Iehova ese Iosua ia abia hidi, ia ese Gwauhamata Tanona dekenai idia do ia hakaua vareai. Mose ese Iosua ia hamaoroa: ‘Oi gari lasi. Iehova ese oi do ia durua.’ Daudau lasi murinai, Mose ia daekau Nebo Ororona dekenai, bona Iehova ese ia dekenai Gwauhamata Tanona ia hahedinaraia. Unai tano be Aberahamo, Isako, bona Iakobo dekenai ia gwauhamatalaia. Mose ena mauri lagani be 120 neganai ia mase.

Iehova ese Iosua ia hamaoroa: ‘Ioridane Sinavai umui hanaia, bona Kanana dekenai umui lao. Oi do lau durua, Mose lau durua hegeregerena. Dina ta ta ai egu Taravatu oi duahia be namo. Oi gari lasi. Oi boga-auka. Oi lao bona oi lau oda henia hegeregerena do oi karaia.’

Iosua ese spai taudia rua be Ieriko siti dekenai ia siaia. Leseni 30 ai gau ma haida do ita dibaia. Spai taudia idia giroa lou neganai, idia gwau hari be nega namona Kanana dekenai idia vareai totona. Murina dinana ai, Iosua ese Israela taudia ia hadibaia edia kamepa do idia kokia. Bena taravatu maua idia huaia hahelaga taudia be Ioridane Sinavai dekenai ia siaia guna. Sinavai be ia abata. To hahelaga taudia edia aena be ranu ai idia atoa neganai, maoromaoro ranu ena heau ia doko! Bona hahelaga taudia be huanai idia gini lalonai, Israela besena be idia hanaia lao. Oi laloa unai hoa karana amo idia be Iehova ese Davara Kakakakana ai ia karaia gauna idia laloatao, a?

Lagani momo murinai, Israela taudia be Gwauhamata Tano dekenai idia ginidae. Hari ruma bona siti idia haginia diba. Uma gabudia bona vain umadia idia karaia diba. Tano be milika bona hani amo ia honu.