Ierusalema Dekenai Idia Naria

INISENIAI idia noho taudia be Iesu ena murinai idia raka taudia. Ia idia kamonai henia bona Ierusalema dekenai idia noho. Bona idia ibounai idia naria noho lalonai, rege bada herea ese ruma ibounai ia hahonua. Unai rege be lai bada herea ena rege bamona. Bona lahi be hahediba taudia ta ta edia kwarana latanai ia hedinarai matamaia. Idia ta ta edia kwarana latanai ia noho lahi oi itaia diba, a? Unai ibounai ena anina be dahaka?

Unai be hoa gauna! Iesu be guba dekenai ena Tamana ida ia noho, bona ia ese Dirava ena lauma helaga be ena murinai idia raka taudia dekenai ia bubua. Unai lauma ese ia hasiahudia dainai idia karaia karana oi diba, a? Idia ibounai be gado idauidau dekenai idia hereva matamaia.

Ierusalema taudia momo be lai badana ena regena bamona idia kamonai bona idia mai ia vara gauna idia itaia totona. Taunimanima haida be bese idauidau taudia bona idia mai Israela taudia edia Pentekoste ariana totona. Unai vadivadi taudia idia hoa bada! Idia kamonai hahediba taudia be edia gado dekenai Dirava ese ia karaia gau namodia idia herevalaia.

Vadivadi taudia idia gwau: ‘Inai taudia be Galilea taudia. Vadaeni, edena bamona iseda tano idauidau edia gado ai idia hereva?’

Hari Petero ia gini bona idia dekenai ena anina ia gwauraia. Iena gadona ia habadaia bona taunimanima dekenai Iesu idia hamasea bona Iehova ese mase amo ia hatorea isi lou dalana ia gwauraia. Petero ia gwau: ‘Hari guba dekenai Iesu be Dirava ena idiba kahana dekenai ia helai noho. Bona ia gwauhamatalaia lauma helaga ia siaia inai. Unai dainai inai hoa karadia umui itaia bona kamonai henia.’

Vadaeni, Petero ese unai gaudia ia gwauraia neganai, taunimanima momo be Iesu dekenai idia karaia karadia dainai idia sori bada. Idia henanadai: ‘Dahaka do ai karaia?’ Petero ese idia ia hamaoroa: ‘Emui mauri umui haidaua bona bapatiso umui abia.’ Unai dainai unai dina dekenai taunimanima 3,000 bamona idia bapatiso bona Iesu ena murinai idia raka taudia ai idia lao.