Hahediba Taudia be Lauma Helaga Idia Abia

Iesu be guba dekenai ia daekau lou bona dina 10 murinai, iena hahediba taudia be lauma helaga idia abia. Unai be Pentekoste 33 C.E. ai, bona taunimanima be unai hebou totona gabu idauidau amo Ierusalema dekenai idia mai. Iesu ena hahediba taudia 120 be ruma ta ena ataiai daiutu ai idia haboua. Bena hoa gauna ta ia vara. Lahi bamona gauna ta be hahediba taudia ta ta edia kwarana ataiai ia diho, bona idia ibounai be gado idauidau ai idia hereva matamaia. Lai gubana ena regena bamona ese ruma ia hahonua.

Ierusalema dekenai idia mai vadivadi taudia be unai regena idia kamonai dainai, ia vara noho gauna itaia totona idia heau lao. Idia kamonai hahediba taudia be gado idauidau ai idia hereva neganai, idia hoa. Idia gwau: ‘Idia be Galilea taudia, ani? Edena bamona iseda gado korikori ai idia hereva diba?’

Bena Petero bona aposetolo taudia ma haida be hutuma vairanai idia gini. Petero ese Iesu idia hamasea dalana bona Iehova ese mase amo Iesu ia hatorea isi lou karana ia herevalaia. Petero ia gwau: ‘Iesu be Dirava ena imana idiba kahana ai ia helai, bona ia gwauhamatalaia lauma helaga be ia ese ia bubua diho. Unai dainai umui ese inai hoa karana umui itaia bona kamonai.’

Petero ena hereva ese taunimanima ia hagoadaia bada dainai idia henanadai: “Dahaka ai karaia be namo?” Ia gwau: ‘Umui helalo-kerehai, bona Iesu Keriso ena ladanai bapatiso umui abia. Bona lauma helaga, harihari gauna unai, do umui abia.’ Bona unai dina ai taunimanima 3,000 bamona be bapatiso idia abia. Unai nega amo, Ierusalema dekenai hahediba taudia edia namba ia bada daekau haraga. Lauma helaga ena heduru amo aposetolo taudia ese kongrigeisen momo idia hamatamaia. Unai amo Iesu ese idia dekenai ia henia hahegani ibounai be hahediba taudia dekenai idia hadibaia diba.