Karoa 1
Dahaka Do Ia Vara Tanobada Dekenai?
OI BONA tanobada noholaia taudia ma milion momo herea be dahaka do umui davaria, vaira negana lalonai? Oi ura unai neganai maino bona noho namo do umui davaria bona do umui lalokau heheni momokani, a? Unai hahenamo do oi davaria diba. To taunimanima momo edia lalohadai vaira negana dekenai be idau. Dahaka dainai?
2 Niuklia tuari ia vara diba dainai, momo idia laloa taunimanima momo herea be vaira negana do idia itaia lasi. Lagani 1945 lalonai, atom bomu be nega ginigunana idia tuarilaia neganai, taunimanima 70,000 be miniti tamona lalonai idia hamasedia. Bena unai murinai momo herea be unai bomu dainai idia mase mai edia hisihisi bada herea danu. To hari inai negai, bomu tamona ena siahu ese unai tuari lalonai idia tuarilaia bomudia iboudiai edia siahu ia hanaia. Niuklia tuari gaudia momo idia haboudia hegaegae. Bona dina ta ta iboudiai tanobada besedia be K2,000,000,000 idia negea, tuari kohu hoia totona.
3 To bema edia niuklia tuari gaudia haida sibodia idia tuarilaia, be edena bamona? Dika bada herea do ia vara. Saiens tauna ta mai ladana badana, Carl Sagan, ia gwau, bema bese haida ese edia niuklia gaudia haida sibodia do idia tuarilaia, “unai ese tanobada taudia iboudiai edia noho do ia hadikaia momokani . . . taunimanima iboudiai do idia hamasedia ore reana.” Taunimanima momo ese unai lalohadai idia edia lalona amo idia negea toho, to unai dala amo unai dika ena vara dalana idia koua diba lasi. Haida be roho mauri oreadia idia haginia. Roho mauri dalana idia tahua dainai, gabu aukadia be taunimanima idia noho lasi gabudiai idia karaia bona unuseniai aniani bona muramura idia haboua, bona ipidi danu idia abia hegaegae, vareai kava taudia luludia totona.
4 Saiens taudia idia gwau, niuklia tuari amo sibona lasi, to reana dala idauna amo tanobada be do idia hadikaia momokani. Idia laloa momo gaudia be inai: Hodahoda, ita ibounai ita lagaia gauna, idia hamiroa noho. Uda audia momo idia utua ore dainai, medu be ena nega korikori ai ia mai lasi bona tano ena kopina ia dika. Edia lalo-duhu bona mataganigani dainai haida ese uma gabudia idia hadikaia. Sinavai be muramura dikadia amo idia hamirodia. To bema unai gaudia be lasi, taunimanima idia mauri diba lasi.
5 To reana oi laloa momo gaudia be inai: Raskol edia dagedage karadia dainai taunimanima idia loaloa diba lasi. Taunimanima edia orea idauidau idia hepapahuahu dainai idia noho namonamo diba lasi. Momo be moni gaukara idia davaria lasi dainai idia ogogami, bona gau iboudiai edia davana idia daekau haraga dainai momo idia lalo-hekwarahi. Momo edia ruma bese maurina be dika, badina be idia lalokau heheni lasi dainai. Gabu iboudiai dekenai taunimanima be sibodia edia ura idia tahua noho.
6 Vadaeni, mauri namona davaria dalana be edeseniai? Tanobada besedia idia hegeregere lasi mauri namona be vaira negana lalonai do idia havaraia, badina be inai dika idauidau be idia ese idia havaraia, bona idia kokia diba lasi. Ena be idia be dala lasi, to reana mauri namona davaria dalana ta ia noho, a?
INAI ITA LALOABOIO LASI BE NAMO
7 Nega momo, taunimanima ese vaira negana idia laloa negadiai, tanobada bona taunimanima ia havaraia Diravana idia laloa lasi. To iena palani be edena bamona ita davaria diba? Bible ese ita ia hadibaia. Hari buka be nega momo ia gwau Dirava ese ia havaraia. Inai hereva be momokani eiava? Bema ia momokani, namona be oi badinaia, oi mauri totona. Inai gau be mai anina bada dainai, namona be oi sibona ese Bible ena anina oi tahua namonamo. Do oi davaria ena peroveta herevadia momo ese vaira neganai do idia vara gaudia idia hahedinaraia. Mai ena aonega bada ia ese moale hanaihanai davaria dalana ia gwauraia hedinarai. Ai laloa, bema ena hereva oi tahua namonamo, do oi abia dae ia be lalokau momokani Diravana ena amo ia mai. Inai nega dikana amo ita roho mauri totona, namona be Bible ena hereva ita tahua bona ita badinaia. Unai dainai, Bible momo herea tanobada ibounai dekenai idia hariharilaia vadaeni be hoa gauna lasi.—2 Petro 1:20, 21; 3:11-14; 2 Timoteo 3:1-5, 14-17 itaia.
8 Bible ena siri ginigunana ia gwau: “Dirava ese guba bona tanobada ia karaia.” (Genese 1:1) Ena be taunimanima haida idia ura lasi Dirava ena ladana idia hatoa, to Bible be unai bamona lasi. Genese 2:4 ese Dirava ena ladana ia hahedinaraia, ia gwau: “Iehova Dirava ese tanobada bona guba ia karaia.” (Genese 14:22; Esodo 6:3; 20:11 danu itaia.) Bible ena kahana badana be Heberu gado ai idia torea guna neganai, Dirava ena ladana be nega 7,000 bamona inai Heberu leta 4 יהוה amo idia torea.
9 Inai ladana be Dirava idia laloa bada taudia edia lalohadai amo ia vara lasi. Dirava sibona ese ia abia hidi. (Esodo 3:13-15; Isaia 42:8) Ma ladana ta, hegeregere Buddha, Brahma, Allah eiava Iesu, be ena gabunai ita hatoa be maoro lasi. Unai dainai peroveta tauna Mose ese idau negai Israel besena ia hamaorodia, ia gwau: “Hari dinai umui diba bona emui lalona dekenai umui abia dae lou, Iehova [Heberu gado ai: יהוה] be Dirava momokani guba dekenai bona tanobada dekenai. Ma ta be lasi.” (Deuteronomi 4:39) Iesu Keriso ese ia guriguri henia Diravana be unai, “Dirava momokani tamona” ia gwauraia. Hari inai negai diba taudia tanobada besedia iboudiai lalodiai ese idia tomadiho henia.—Ioane 17:3; Mataio 4:8-10; 26:39; Roma 3:29.
10 Iehova ese tanobada ia havaraia, unai dainai tanobada ibounai be iena gau, bona ia diba dahaka be vaira neganai do ia vara tanobada dekenai. (Deuteronomi 10:14; Salamo 89:11) Dirava ena diba bona siahu be hegeregere, taunimanima edia hekwakwanai iboudiai do ia kokia. Hisiu edia siahu ese niuklia bomu edia siahu ia hanaia momokani; vadaeni, daika ese unai siahu ia biagua, hisiu milion momo lalodiai? Dirava ena diba bona siahu be hegeregere tanobada idia noholaia gaudia do ia hamauridia, ani? Unai hegeregerena, ena be taunimanima be edia lalo-duhu bona mataganigani amo tanobada idia hamiroa bona idia hadikaia, to unai ese Siahu Ibounai Diravana ena palani do ia koua lasi. Iena aonega bona siahu be hegeregere dainai, tanobada bona ena mauri gaudia idauidau iboudiai ia havaradia diba; bema ia ura neganai, ia be gau iboudiai ia hamatamataia diba. (Isaia 40:26; Salamo 104:24) Vadaeni, Iehova ena palani iseda tanobada totona be dahaka?
TANOBADA DO IA NOHO ELA BONA EDENA NEGAI?
11 Dirava ena palani be tanobada bona idia noholaia gaudia iboudiai do ia haoredia, a? Hisiu idia stadilaia taudia haida idia gwau dina be do ia pou bona tanobada do ia haorea. Ma haida idia laloa nega do ia ginidae, dina do ia bodo bona mauri gaudia iboudiai be tanobada ena kopina amo do idia mase ore. To edia lalohadai be maoro eiava? Siahu bona gau iboudiai edia anina ia havaraia bona iseda mauri durua daladia ia karaia Diravana be dahaka ia gwau?—Iobu 38:1-6, 21; Salamo 146:3-6.
12 Iehova ese ena lauma amo King Solomon ia hadibaia, inai hereva Kohelete 1:4 dekenai ia torea totona: “Uru ta ia ore gwauraia, bona ma uru ta ia vara noho; to tanobada ia noho hanaihanai.” Taunimanima edia sivarai, idau nega amo ema bona hari, ese unai ia hamomokania. Ena be uru ta idia mase ore bena uru ma ta ese edia gabu idia abia, to ita noholaia tanobadana ia noho hanaihanai. To, do ia noho ela bona edena negai?
13 Inai hereva “hanaihanai” be Heberu hereva ‘oh·lamʹ amo idia hahanaia, ena anina be “ena daudau ia hehuni negana daudauna ta.” Unai anina ta be “ela bona hanaihanai.” Hari siri lalonai ena anina be unai a? Eiava ena anina be inai, a: nega daudau herea murinai, ita diba lasi neganai, tanobada do ia ore, a? Bible ese unai bamona ia gwauraia gaudia haida be idia ore vadaeni. (Numera 25:13 bona Heberu 7:12 itaia.) To Bible ese idia noho ela bona hanaihanai gaudia danu inai hereva ‘oh·lamʹ amo ia gwauraia—ia ese Dirava danu unai bamona ia gwauraia. (Salamo 90:2 bona; 1 Timoteo 1:17 itaia.) Bona ita diba momokani tanobada be unai bamona ia gwauraia neganai, anina be do ia noho ela bona hanaihanai. Salamo 104:5 ia gwau: “Tanobada be ena badina latanai ia haginia; do ia mareremarere lasi ela bona hanaihanai.”—Salamo 119:90 danu itaia.
14 Tanobada ena kopina do ia dika vaitani lasi. Ieremia 10:10-12 ia gwau: “Iehova be Dirava korikorina. . . . Ia ese ena siahu amo tanobada ia karaia, bona ena aonega amo tanobada mai ena anina ibounai ia haginia, bona ena lalo-parara amo guba ia veria lao.” Mani inai oi laloa: “Tanobada ia karaia” sibona lasi, to “tanobada mai ena anina ibounai” ia haginia danu. Gado hahanaia taudia momo be Heberu hereva te·velʹ Motu gado ai idia hahanaia neganai, “tanobada” sibona idia torea, to buka ta ladana Old Testament Word Studies, William Wilson ese ia torea, ia gwau te·velʹ ena anina be “tanobada mai ena anina ibounai, taunimanima ese idia noholaia tanodia.” Iehova ena palani inai tanobada mai ena anina ibounai totona be Salamo 96:10 ese inai bamona ia gwauraia: “Iehova be pavapava ai ia lao vadaeni. Oibe, tanobada mai ena anina ia haginia vadaeni, do ia marere lasi ela bona hanaihanai.”—Isaia 45:18 danu itaia.
15 Tanobada, ita noholaia gauna, be Iesu ese ia gwauraia, ena hahediba taudia be Dirava guriguri henia dalana ia hadibadia neganai; ia gwau tanobada be inai bamona do idia gurigurilaia: “Oiemu Basileia do ia mai, oiemu ura gauna tanobada dekenai do ai karaia, guba dekenai idia karaia bamona.”—Mataio 6:9, 10.
16 Iehova ia ura lasi tanobada ena Biaguna idia matauraia lasi bona idia lalokau heheni lasi taudia be tanobada do idia noholaia. Idau negai inai bamona ia gwauhamata: “Kara dika taudia do idia haoredia, to Iehova idia naria taudia be tanobada do idia abia. Kara maoromaoro taudia ese tanobada do idia abia bona ia latanai do idia noho ela bona hanaihanai.” (Salamo 37:9, 29) Bible ese “tanobada matamatana” ia gwauraia, Dirava idia gari henia bona edia dekena taudia idia lalokau henidia taudia ese do idia noholaia. (Heberu 2:5; Luka 10:25-28 danu itaia.) Bible ese “tanobada matamatana” ia gwauraia, badina be Dirava ena guba Basileiana ese tanobada ena toana do ia haidaua vaitani, bena taunimanima be mauri goevadaena Paradaiso lalonai do idia abia. Taunimanima ia havaradia Diravana ese unai mauri ia lalohadailaia, tanobada ia havaraia matamaia neganai.—Apokalupo 21:1-5; Genese 2:7-9, 15.
17 Dirava ese “tanobada matamatana” ia haginia totona, gunana be hisihisi bada hereana dekenai do ia haorea guna, unai hisihisi ese hisihisi gunadia iboudiai do ia hanaia. Tanobada hanamoa totona bona ia havaraia Diravana idia laloa bada taudia hanamodia totona, ia ese “tanobada idia hadikaia vadaeni taudia do [ia] alaia ore.” (Apokalupo 11:17, 18) Unai bamona do ia karaia negana be ia kahirakahira momokani! Oi danu be unai hisihisi amo do oi roho mauri, eiava?—1 Ioane 2:17; Hereva Lada-isidia 2:21, 22.
[Study Questions]
1. Oi laloa dahaka be vaira negana lalonai do ia vara?
2, 3. Niuklia tuari ia vara diba dainai, taunimanima momo edia lalohadai vaira negana dekenai be dahaka?
4. Dahaka dainai haida ese tanobada hamiroa bona hadikaia karadia idia laloa momo?
5, 6. Dahaka dainai taunimanima idia laloa noho namo bona moale do idia davaria diba lasi?
7. (a) Dahaka ese ia hamomokania Bible be Dirava ena Hereva? (b) Dahaka dainai taunimanima be Bible ena hereva idia diba be gau badana?
8. Bible ia hahedinaraia tanobada ia havaraia Diravana ena ladana be daika?
9. (a) Daika ese Dirava ena ladana ia abia hidi? (b) Dirava ena ladana be mai anina bada ita dekenai, eiava? (Ioel 2:32; Mika 4:5)
10. Ena be niuklia tuari ia vara diba bona tanobada idia hadikaia noho, to dahaka dainai unai ese Dirava ena palani tanobada totona ia koua diba lasi?
11. (a) Saiens taudia haida idia laloa tanobada be edena dala amo do ia ore? (b) Daika ena diba inai gaudia dekenai be edia diba ia hanaia, bona badina be dahaka ia hanaia?
12. Kohelete 1:4 ena hereva be edena bamona ia momokani?
13. (a) “Hanaihanai” ena anina ta be dahaka? (b) Vadaeni, edena bamona ita diba momokani tanobada do ia noho ela bona hanaihanai?
14. Dahaka dainai ita diba tanobada ena kopina be gabeai do ia dika momokani lasi?
15. Inai hereva ese Iesu ena guriguri herevana edena bamona idia hamomokania?
16. (a) Unai neganai edena bamona taudia ese tanobada do idia noholaia? (b) “Tanobada matamatana,” Bible ese ia gwauraia gauna, be dahaka?
17. Dahaka dainai ita be Dirava ese ia gwauraia roho mauri dalana hari ita dibaia be gau badana?