Tanobada (Earth)

Anina: Inai hereva “tanobada” be mai anina idauidau, Buka Helaga lalonai. Ena anina ta be, taunimanima idia noholaia tanobadana kuboruna ibounai, ia dekenai Iehova ese taunimanima edia mauri durua gaudia momo herea ia havaradia, badina ia ura edia mauri do idia moalelaia bada. Ena anina ma ta be tanobada noholaia taudia eiava tanobada besena ta.

Niuklia tuarina ta lalonai tanobada ibounai do idia hadikaia ore, a?

Baibel ese ia hahedinaraia Dirava ena ura tanobada dekenai be dahaka?

Mat. 6:10: “Oiemu Basileia do ia mai, oiemu ura gauna tanobada dekenai do ai karaia, guba dekenai idia karaia bamona.”

Sal. 37:29: “Kara maoromaoro taudia ese tano bae abia, bae noholaia hanaihanai.”

Kohelete 1⁠:4; Salamo 104⁠:⁠5 itaia danu.

Tanobada besedia ese Dirava ena palani idia laloa lasi dainai, reana edia kara amo tanobada do idia hadikaia bena taunimanima ese do idia noholaia diba lasi, a?

Isa. 55:​8-11: “Iehova na e tomu: . . . Guba na tanobada daenai heḡereḡerena, lauegu dala na emui dala daediai, bona lauegu lalo-hadai na emui lalo-hadai daediai. . . . Lau udugu amo e lasimu herevana na . . . basine lou henigu kava, a egu ura baine haḡuḡurua, bona dainai na siaia ḡauna ena namo baine habadaia.”

Isa. 40:​15, 26: “A itaia, [Iehova Dirava vairanai] tanobada besedia na ranu hetuturuna tamona na heto, hodu amo e hetuturu dobimu; idia na ḡahu, metau ihahetohona ḡauna ai, na heto. . . . Ba gaga dae, ba itaia, unu hisiu na daika ese e karadia? Ia ese edia orea na ta ta amo e halasidiamu, bona iboudiai ladadia e hatomu; ena goada herea-daena amo, bona ena siahu na bada dainai, ta se boiomu.” (Taunimanima ese tanobada besedia edia niuklia tuari gaudia edia siahu garina idia gari. To hisiu bilion momo be niuklia siahuna ese ia hasiahudia, unai siahu ena bada ita lalo-pararalaia diba lasi. Daika ese unai guba gaudia iboudiai ia karadia bona ia biagudia? Iena siahu be hegeregere, tanobada besedia do ia koudia, bena iena ura tanobada dekenai koua totona edia niuklia tuari gaudia do idia tuarilaia diba lasi, ani? Dirava ese ia hahedinaraia vadaeni ia be unai bamona do ia karaia; Israel taudia be Aigupito amo ia hamauridia neganai, Farao ese ena dala ia koua toho, to ia ese Aigupito ena tuari taudia bona kohudia ia hadikadia ore.​—⁠Eso. 14⁠:​5-31.)

Apok. 11:​17, 18: “Lohiabada e, Siahu Ibounai Diravana, harihari oi noho, gunaguna oi noho. Ai ese oi ai tanikiu henia. Oi ese oiemu siahu bada oi gaukaralaia vadaeni. Bona oiemu Basileia oi biagua hamatamaia vadaeni. Dirava diba lasi taudia idia badu dikadika. Badina be oiemu badu ena nega ia ginidae vadaeni. . . . Harihari be tanobada idia hadikaia vadaeni taudia do oi alaia ore.”

Dirava ese lahi amo tanobada do ia araia ore, a?

Petero Iharuana 3⁠:​7, 10 ese unai hereva ia hamomokania, a? “Harihari idia noho guba bona tanobada be Dirava ese, ena oda hereva dekena amo ia naridia noho. Oibe, idia noho hegaegae ela bona Kota Badana Dinanai. Unai neganai lahi badana ese tanobada bona guba do ia araia ore, bona Dirava idia negea taudia be do idia boio. . . . Lohiabada ena Dina be do ia ginidae, henaoa tauna ia ginidae bamona. Unai Dina neganai guba be nega tamona do ia ore, mai regena bada danu. Gubai noho gaudia, hisiu, hua, bona dina be lahi bada herea ese idia do ia araia ore. Tanobada danu, bona ia lalonai noho gaudia ibounai, be lahi bada ese do ia araia ore.”

Apokalupo 21⁠:1 ese ia hahedinaraia ita noholaia tanobadana do ia hadikaia ore, a? “Vadaeni guba matamatana bona tanobada matamatana lau itaia. Badina be guba gunana bona tanobada gunana be idia lao ore vadaeni. Davara danu be ia ore vadaeni.”

Ta ese unai siri edia anina ia gwauraia hedinarai neganai, ena hereva do ia maoro totona, namona be ena hereva be unai siri kahirakahira dekenai idia noho siridia bona Baibel orena hegeregeredia

Bema inai siri (2 Petero 3⁠:​7, 10 bona Apokalupo 21⁠:⁠1) edia anina be lahi ese tanobada do ia araia ore, anina be lahi ese guba gaudia (hisiu, dina, bona hua) danu do ia araia ore. To, unai bamona lalohadai be Mataio 6:​10, Salamo 37:29 bona Sal 104:​5, bona Hereva Lada-isidia 2:​21, 22 edia hereva edia anina hegeregerena lasi. Danu, idia siahu herea vadaeni gaudia, dina bona hisiu unai, be lahi ese ia araia ore diba lasi, ani? Unai dainai, inai hereva “tanobada,” 2 Petero 3⁠:​7, 10 bona Apokalupo 21⁠:1 dekenai, ena anina be taunimanima ese idia noholaia tanobadana lasi.

Genese 11:​1, Hanua Pavapavadia Ginigunana 2:​1, 2, Sisiga Ginigunana 16:​31, Salamo 96:​1, bona siri ma haida dekenai, inai hereva “tanobada” ena anina be taunimanima ese idia noholaia tanobadana lasi, to ena anina be taunimanima. Vadaeni, reana 2 Petero 3⁠:​7, 10 bona Apokalupo 21⁠:1 dekenai ena anina be unai, a?

Mani inai oi laloa, 2 Petero 3⁠:​5, 6 (bona 2Pet 2⁠:​5, 9) dekenai, Petro ese Abata Badana, Noa ena negai ia vara gauna, ia herevalaia danu; unai Abata Badana ese taunimanima dikadia ia hamasedia ore, to Noa mai ena ruma bese ida idia roho mauri, bona guna idia noholaia tanobadana be ia ore lasi. Unai hegeregerena, 2 Petero 3⁠:7 dekenai ia gwau, “Dirava idia negea taudia” do ia hamasedia ore. Unai dainai, inai siri lalonai inai hereva “tanobada” ena anina be unai bese gunana dikana, bona unai ese Baibel ena hereva oredia ia hamomokania, bona ia be ataiai ai torea siridia edia anina hegeregerena danu. Iehova Dirava idia badinaia lasi taudia edia toana koikoina be lahi amo do ia araia ore, bena edia dika do ia hedinarai goevagoeva. Unai ese do ia hahedinaraia Dirava ese do ia haoredia momokani be maoro. Unai taunimanima dikadia be “tanobada gunana,” Apokalupo 21⁠:1 ese ia gwauraia gauna.

Iesu ena hereva Luka 21⁠:33 ai, (“Guba bona tanobada do idia boio, to lauegu hereva be do ia boio lasi”) ena anina oi lalohadailaia neganai, namona be Luka 16⁠:17 ida oi hahegeregerea: “Guba bona tanobada do idia boio be mai ena dala, to Taravatu ena koma ta do ia boio be dala lasi.” Unai siri ruaosi lalodiai ia hahedinaraia gauna be inai sibona: Iena hereva bona Taravatu ena koma ta do idia boio diba lasi, lasi momokani.​—⁠Mataio 5⁠:18 itaia danu.

Dirava ese kara maoromaoro taudia guba dekenai do ia abidia daekau, bena kara dika taudia do ia haoredia murinai, tanobada dekenai do ia siaidia lou, a?

Apokalupo 21⁠:​2, 3 ese unai lalohadai ia hamomokania, a? Ia gwau: “Hanua Helagana, Ierusalema matamatana lau itaia, guba dekena amo ia diho mai noho, Dirava dekena amo. Inai Hanua Helagana be headava matamata kekeni bamona, ia herahera namo herea, dabua namona ia karaia, iena adavana totona ia hegaegae vadaeni. Gado ta lau kamonai, helai gabuna badana dekena amo ia mai, ia hereva badabada, ia gwau, ‘Harihari Dirava ena noho gabuna be taunimanima edia huanai do ia noho, bona idia be iena bese taudia do idia lao. Dirava be idia danu do ia noho, bona ia be edia Dirava do ia lao.’ ” (Dirava be taunimanima “danu do ia noho” ena anina be tauanina ai do ia noho, a? Unai bamona do ia karaia lasi, badina Iehova ese Mose ia hamaoroa, ia gwau: “Asi tauna ta ese baine itagu bona baine mauri.” [Eso. 33⁠:20] Unai hegeregerena, Ierusalem matamatana taudia be taunimanima hegeregeredia tanobada dekenai do idia giroa mai lasi. Dirava be taunimanima “danu do ia noho” bona Ierusalem matamatana be “guba dekena amo ia diho mai,” anina be dahaka? Unai ita diba totona, namona be Baibel ena siri ma haida ita tahua. Genese 21⁠:1 [BH] ia gwau Dirava ese Sara ia “vadivadi henia,” bona ia buruka neganai natuna ta ia henia. Dirava ese Mose Israel bese taudia hamauridia totona ia siaia sivaraina be Esodo 4⁠:31 ese ia gwauraia, ia gwau Dirava ese Israel bese taudia ia “vadivadi” henidia unai. Luka 7⁠:16 ia gwau Iesu ena hesiai gaukarana amo “Dirava ese ena bese taudia dekenai ia mai itaia.” Nao gado Baibel haida lalodiai unai siri idia gwau dirava ese iena taunimanima “ia lalodia.” Unai dainai Apokalupo 21⁠:​2, 3 ena anina be inai: Guba Ierusalem Matamatana amo Dirava ese taunimanima do ia ‘vadivadi henidia’ o edia huanai do ia noho, bona unai guba oreana amo kamonai taudia ese hahenamo do idia abia.)

Her. 2:​21, 22: “Kara maoromaoro taudia na tano bae noholaia, bona lalo-maoromaoro taudia na ia lalonai bae noho; a kara dika taudia na tano amo bae henege daure, bona kara heḡui⁠-⁠heḡui taudia na tano amo bae heraḡa oho.” (Inai siri ia gwau lasi lalo-maoromaoro taudia be tanobada dekenai do idia giroa mai, to ia gwau idia be tanobada dekenai do idia “noho.”)

Dirava ena palani tanobada totona, matamana neganai ia lalohadailaia gauna, be ia ese ia haidaua vadaeni, a?

Gen. 1:​27, 28: “Dirava ese taunimanima ia karaia, ia sibona ena laulau bamona, Dirava ena toana hegeregerena ia karaia. Tau bona hahine ia karaia. Bona Dirava ese ia hanamodia, idia dekenai ia gwau, Emui bese umui havaraia, do umui hutuma. Tanobada ena gabu ibounai dekenai umui noho, bona umui biagua. Davara ena gwarume bona atai manudia, bona mauri gaudia tanobada dekenai idia marere gaudia umui biagua.” (Unai amo Dirava ese ia hahedinaraia ena palani be, Adam bona Eva mai edia natudia bona edia tubudia ida ese tanobada do idia hahonua bona tanobada ena paradaiso do idia naria. Dirava ese tanobada mo sibona ia karaia bona ia hegaegaelaia, taunimanima ese do idia noholaia totona. Unai dainai tanobada ia idau vaitani, taunimanima ese edia teleskoup amo idia raraia vadaeni hisiudia o edia roketi idia siaidia lao vadaeni hisiudia hegeregeredia lasi. Vadaeni, Dirava ese unai ibounai ia karaia murinai, Adam ena kara dika dainai ena palani ia rakatania, bona unai dainai ena anina do ia vara lasi ela bona hanaihanai, a?)

Isa. 45:18: “Iehova, guba ikarana Diravana, ini e gwau tomamu. Ia na Dirava; ia ese tanobada e hadaia bona oromana e henia, bona e haginia tutuka-tutuka; ia ese se karaia ḡau asi oromana, a haida ese bae noholaia totona e karaia. Ia na e tomu: Lau na Iehova; idauna ta na lasi.” (Isaia 55⁠:​10, 11 itaia danu.)

Bema tanobada oromana matamatana lalonai taunimanima do idia mase lasi, edena bamona tanobada ena bada do ia hegeregere noholaia taudia iboudiai totona?

Mani inai oi laloa: Dirava ese ena palani tanobada totona ia gwauraia neganai, ia gwau: “Besemui ba havaradia, ba hutuma; tanobada ba hahonua.” (Gen. 1⁠:​28, BH) Dirava ese natu havaraia siahuna taunimanima ia henidia, unai dainai ena palani, tanobada do ia honu palanina, do ia guguru neganai, ia ese unai siahu do ia koua diba.

Dirava ese edena bamona taudia mauri hanaihanai do ia henidia?

Sef. 2:3: “Umui tano taumui mai manaumui ida, ena haheḡani o badinadiamu taumui, Iehova ba tahua! Kara maoromaoro ba tahua, lalo-manau ba tahua; bena reana ba hehuni diba, Iehova ena badu dinana ai.”

Sal. 37:​9, 11: “Iehova e nariamu taudia ese tano bae abia. . . . Manau taudia ese tano bae abia; maino ena harihari-bada idia ese bae moalelaia.”