Karoa 7
Oi Aonega, Do Oi Mase Garina
BEMA hereva momokani tauna ese ia hadibadia gau dikana ia vara gwauraia, aonega taudia be roho mauri dalana idia tahua. (Hereva Lada-isidia 22:3) To taunimanima momo herea idia mase vadaeni, badina be koikoi taudia idia abidadama henidia dainai. Sisima badana ta ladana Titanic idia heagilaia, idia gwau ia mutu diba lasi. Unai hereva idia abia dae taudia momo herea be madi idia maloa mase, unai sisima be lagani 1912 lalonai ia mutu neganai. Lagani 1902 lalonai Pelée Ororona, Martinique dekenai be kahu bona nadi ia halasidia matamaia neganai, Saint-Pierre hanuana taudia idia gari, to unai hanua ena tau badadia be sibodia edia namo idia tahua dainai hanua taudia idia koidia, idia gwau namona be hanua idia rakatania lasi. Bena unai ororo ia pou neganai, taunimanima 30,000 idia mase.
2 Hari inai nega lalonai Iehova ena Witness taudia ese taunimanima idia hadibadia noho, gabu tamona dekenai do ia vara hisihisina idia gwauraia lasi, to Dirava ena tuari Aramagedono hari, tanobada ibounai dekenai do ia vara gauna unai. (Isaia 34:1, 2; Ieremia 25:32, 33) Idia hamaorodia loulou, namona be idia kara mai edia aonega danu, idia roho mauri totona. Mauri oi ura henia bada dainai, unai bamona do oi karaia haraga a?
‘TANOBADA BE KAHIRAKAHIRA DO IA ORE’
3 Oi roho mauri totona, gau badana be tanobada oi abidadama henia lasi. Ena be oi mauri noho lalonai tanobada dekenai oi noho, to ena ura dikadia bona kara dikadia oi dadaraia diba. Tanobada taudia ese taunimanima bona edia palani idia abidadama henidia, Dirava bona ena palani idia laloa lasi; to edia dala amo oi raka siri diba. Namona be dala ta oi abia hidi, badina be dala rua be nega tamona oi rakalaia diba lasi. “Bema umui ura tanobada danu umui turana karaia neganai Dirava umui tuari henia noho.” Badina be dahaka? Badina be, Bible ia hereva bamona, “Satani ese tanobada taudia ibounai ia gunalaia noho.”—Iakobo 4:4; 1 Ioane 5:19; Salamo 146:3-5.
4 Taunimanima momo be edia mauri dalana amo idia hahedinaraia Dirava ia badulaia karadia idia karaia noho. Ia ese unai taudia do ia hamauridia lasi, bona ena Nega Matamatana lalonai do idia vareai lasi. Ena be tanobada taudia ese unai kara idia laloa momo lasi, to bema ita ura inai tanobada dikana ena dokona amo ita roho mauri, namona be Bible ena hereva ita kamonai henia; ia gwau sihari kava taudia, heudahanai taudia, tatau idia sihari henidia tataudia bona lebulebu taudia iboudiai do idia roho mauri lasi. Herevana haida idia koikoi momo o idia henaohenao momo, to unai kara do ita dadaraia. Ena be taunimanima momo ese babalau karadia idia ura henia, to unai kara amo do ita siri. Ena be haida idia mama, idia heai, idia badubadu o edia lalo-hekwarahi negea totona drag idia ania o idia inuinu kekero, to do ita tohotohodia lasi. Bona ena be inai kara haida ita karaia loulou vadaeni dainai idia be iseda kara korikori bamona, to do ita negedia. Badina be dahaka? Badina be Dirava ita lalokau henia momokani, mauri ita ura henia, bona Bible ia gwau “unai bamona idia karaia taudia ese Dirava ena Basileia do idia abia lasi.”—Galatia 5:19-21; Efeso 5:3-7; 1 Korinto 6:9, 10; 2 Korinto 7:1; Apokalupo 22:15.
5 Bema ita laloa ita be mai eda moale danu do ita mauri hanaihanai be gau badana, namona be mauri henia Diravana, Iehova hamoalea dalana ita dibaia. (Kara 17:24-28; Apokalupo 4:11) Namona be iena Hereva ita badinaia, iseda kara iboudiai lalodiai. Unai ita karaia noho lalonai, iseda lalohadai ita sibona dekenai, taunimanima ma haida dekenai, bona kohu bona dagi dekenai, do ita tahua namonamo, inai lalohadai ese Dirava idia hamoalea eiava. Idia bogaragidiai ita noho taudia be reana idia hekokoroku o sibodia edia bese idia heagilaia, to ita be Bible ena siri ta do ita laloa namonamo, ia gwau: “Dirava ese hekokoroku taudia edia dala ia koua, to manau taudia dekenai iena hariharibada ia henia.”—Iakobo 4:6; Sefania 2:2, 3; Salamo 149:4.
6 Ena be haida ese kohu bona moni bona dagi badadia idia ura henia bada, to ita ese sibona eda kara do ita tahua namonamo, ita ese 1 Ioane 2:15-17 ita badinaia eiava; unai siri ia gwau: “Tanobada do umui ura henia lasi, bona tanobada ena gaudia danu do umui ura henia lasi. Bema tanobada umui ura henia noho neganai, Tamana Dirava umui ura henia lasi inai. Badina be tanobada gaudia ibounai, tauanina ena ura dikadia, matabodaga ena ura dikadia, bona hekokoroku, inai gaudia be Tamana Dirava dekena amo idia mai lasi. Idia be tanobada dekena amo idia mai noho. Tanobada, mai ena gau dikadia, taunimanima idia ura dikadika gaudia, be kahirakahira do idia ore. To Dirava ena ura ia karaia noho tauna be do ia noho ela bona hanaihanai.” Bema iseda kara ita haidaua be namo, harihari ita haidaua be gau badana.
7 Inai tanobada do ia ore, mai ena mauri dalana danu. Tanobada gunalaia taudia ese edia orea taudia edia lalona idia ania noho reana, idia gwau tanobada do idia hanamoa diba. To ia vara gwauraia hisihisina badana amo roho mauri dalana tamona be, Dirava ena hereva ita badinaia. Nineve taudia edia haheitalai, peroveta tauna Iona ena negai idia haheitalaia, unai ita laloa namonamo be namo.
“IONA ENA HARORO DAINAI EDIA LALONA IDIA GIROA”
8 Lagani 850 B.C.E. bamona ai, Iehova ese Iona ia oda henia, Asuria ena hanua badana Nineve dekenai do ia lao, hanua taudia do ia hamaorodia dina 40 do idia ore bena Nineve do ia hadikaia ore. Vadaeni, unai hereva idia kamonai neganai, dahaka idia karaia? Idia kirikirilaia lasi, to “Dirava idia abidadama henia; anivaga idia gwauraia bona puse dabuadia idia atoa.” Edia king danu be unai bamona ia karaia; idia iboudiai ia haganidia, Dirava do idia tai henia bona edia kara dika amo do idia raka oho bona edia dagedage karadia amo danu. Ia gwau: “Daika ia diba, reana Dirava be . . . ena badu bada amo do ia raka oho, bena do ita mase lasi.” Edia kara dika idia rakatania dainai, Iehova ia hebogahisi henidia. Ia hamasedia lasi.—Iona 3:2-10.
9 Gabeai, Iesu ese kamonai lasi Iuda taudia ia gwau henidia neganai, ia gwau: “Kota Badana dinana neganai, Nineve taudia ese do idia samani henia umui, badina be idia ese Iona ena haroro dainai edia lalona idia giroa, to iniseniai tau ta ese Iona ia hanaia.”—Mataio 12:41.
10 Vadaeni, iseda nega be edena bamona? Haida be unai bamona idia helalo-kerehai a? Oibe, taunimanima momo herea tanobada hegegemadai, ena be guna Nineve taudia hegeregeredia idia ese Dirava momokani idia tomadiho henia lasi, to hari idia ese Iehova ena hereva, tanobada do ia hadikaia ore herevana, idia kamonai henia, bona iena hebogahisi idia tahua. Edia mauri dalana gunana amo edia lalona idia giroa momokani, bona ‘kara idia karaia edia lalona giroa hamomokania totona.’ (Kara 26:20; Roma 2:4 danu itaia.) Oi ura oi danu be unai bamona do oi karaia, a? Vadaeni, kara haraga oi karaia be namo.
MAINO TAHUA HARAGA
11 Iosua ena negai, Gibeon taudia idia kara mai edia aonega danu, idia mase lasi totona. Idia be Kanana taudia; matabodaga karadia idia karaia, kohu idia laloa bada, kaivakuku bona demoni idia tomadiho henidia. Iehova ena oda be do idia hamasedia ore. Idia diba Iehova ese Israel na Egypt amo ia hamauridia vadaeni bona Amoro pavapavadia Ioridane Sinavaina unai kahanai ese idia koudia diba lasi. Idia iboudiai idia diba Ieriko ena magu aukadia be idia vairadiai idia moru vadaeni, bona Ai hanuana idia hadikaia ore vadaeni. (Iosua 9:3, 9, 10) Gibeon taudia idia ura idia mauri noho, to idia diba Israel ena Dirava be tuari lalonai do idia halusia diba lasi. Vadaeni kara ta idia karaia haraga be namo. Dahaka? Israel taudia idia doridia diba lasi maino idia gwauhamatalaia totona, to unai gwauhamata idia tahua. Edena dala amo?
12 Mai edia aonega danu idia ese tatau haida idia siaidia Iosua dekenai, edia toana be gabu daudau herea amo idia mai taudia edia toana bamona. Iosua idia hamaoroa, idia gwau idia be gabu daudau amo, Iehova ena kara badadia edia sivarai idia kamonai dainai edia bese taudia ese idia siaidia, Israel taudia do idia hamaorodia edia hesiai taudia ai do idia lao, bona do idia noidia maino do idia gwauhamatalaia. Iosua bona Israel ena kwarana taudia ese edia hereva idia abia dae. Gabeai, Gibeon taudia edia koikoi ia hedinarai neganai, edia kerere idia gwauraia hedinarai mai edia manau danu; idia gwau idia mase garina idia gari, ma idia gwau edia lalona idia hegeregere, Israel taudia edia oda hegeregeredia do idia karaia. (Iosua 9:4-25) Iehova ese unai kara ibounai ia itaia. Ia idia koia diba lasi. Ia diba iena bese taudia idia hakereredia toho lasi, Moab taudia be guna idia karaia bamona, bona ia diba idia ura bada idia mauri noho. Unai dainai ia ese gwaumaoro Israel taudia ia henidia, Levi taudia edia hesiai taudia ai do idia halaodia; hesiai gaukara metaudia kalaga helagana dekenai do idia karaia, unai amo Iehova tomadiho henia karadia do idia durua. Momokani, edia kara mirodia idia rakatania guna be namo, unai hesiai gaukara idia karaia diba totona.—Iosua 9:27; Levitiko 18:26-30.
13 Hari inai negai “dina gabedia” edia dokona be ia kahirakahira, unai dainai edia roho mauri dalana idia tahua taudia iboudiai be idia kara haraga mai edia momokani danu be namo. Iesu Keriso idia koia diba lasi, Gibeon taudia ese Iosua idia koia bamona. Ia ese do ia aladia mase lasi totona, namona be taunimanima vairadiai idia gwau Iehova idia abidadama henia, ia be Dirava momokani. (Kara 2:17-21 itaia.) Namona be Iesu Keriso idia abia dae danu, Dirava ese ia henia dagidia hegeregeredia, bona inai tanobada dikana idia ura henia lasi taudia hegeregeredia idia noho be namo. Bena namona be Dirava ena hesiai taudia ai idia lao, iena hesiai gaukara helagana be iena orea taudia danu idia karaia hebou, mai edia manau danu.—Ioane 17:16; Apokalupo 7:14, 15.
14 Gibeon taudia ese Iehova ena bese taudia idia badinaia matamaia, bena nega sisina murinai Amoro pavapavadia 5 ese edia hanua idia koua hegege, idia gwau hanua taudia do idia fosidia idia durudia lou totona. Gibeon taudia ese hereva ta idia siaia haraga Iosua dekenai, iena heduru idia noia, bena Iehova ese hoa dalanai ia hamauridia. Edia inai taudia ia hagaridia, nadi badadia guba amo ia hadihodia idia latadiai, bona dina ia halataia ela bona Israel taudia ese idia halusidia vaitani. (Iosua 10:1-14) Gibeon taudia unai bamona ia hamauridia be peroveta karana ta; Dirava momokanina ese ia idia tomadiho henia taudia hutuma bada unai bamona do ia hamauridia, Aramagedono tuarina dekenai. Bema hari idia kara mai edia aonega danu, taunimanima bese iboudiai amo be unai hahemauri do idia abia diba. Vadaeni, unai hahemauri oi tahua noho, a?—Apokalupo 7:9, 10.
[Study Questions]
1. Dahaka dainai taunimanima momo idia mase (a) Titanic ia mutu neganai? (b) Pelée Ororona ia pou neganai?
2. (a) Dahaka hereva be hari idia harorolaia noho? (b) Dahaka dainai taunimanima idia kamonaia haraga be namo?
3. Dahaka dainai tanobada ita dadaraia be namo, ita roho mauri totona?
4. (a) Emu Bible amo oi hahedinaraia, dahaka kara bona lalohadai idia badinaia taudia be Dirava ena Basileia henunai do idia noho diba lasi. (b) Dahaka dainai unai kara idia karaia taudia ese idia rakatania haraga be namo?
5. (a) Bema mauri ita laloa bada, dahaka ita karaia be namo? (b) Inai paragraph ena dokonai idia noho siridia ese dahaka kara namodia idia gwauraia? Unai kara be mai anina bada a? Unai kara idauidau be edena bamona ita goadalaia diba?
6, 7. Dahaka dainai iseda mauri be 1 Ioane 2:15-17 hegeregerena ita tahua namonamo be namo?
8. Iona ese ia haroro henidia neganai, Nineve taudia ese edia aonega edena bamona idia hahedinaraia? Bena dahaka ia vara?
9, 10. (a) Dahaka dainai Iesu ese Nineve taudia ia hanamodia? (b) Hari inai negai daidia be unai Nineve taudia hegeregeredia?
11. (a) Gibeon taudia edia sivarai mani oi kikilaia. (b) Dahaka dainai dala idia tahua Israel danu idia maino karaia totona?
12. (a) Ena be Gibeon taudia idia koikoi, to Dirava ese ia hamasedia lasi, badina be dahaka? (b) Edia mauri be edena bamona idia haidaua, bona dahaka gaukara idia henidia?
13. (a) Gibeon taudia edia sivarai ese ita edena bamona ia durua diba? (b) Iosua ia hereaia tauna ese do ia hamasedia lasi totona, taunimanima be dahaka idia karaia be namo?
14. Dahaka dainai Iehova ese Gibeon taudia ia hamauridia sivaraina be mai anina bada ita dekenai?