Karoa 8
Roho Mauri Taudia Bese Iboudiai Amo
IEHOVA ese tanobada besedia iboudiai edia namo ia tahua mai ena lalokau danu. Dala ia karaia vadaeni, bese iboudiai be iena lalo-namo bona hahenamo idia abia totona. Iehova ese Abram (Abraham) ia hamaoroa, ia gwau: “Oiemu tano bona oiemu varavara bona oiemu tamana ena ruma oi rakatania, bona oi dohore lau hadibaia tano dekenai do oi lao. Lau be oi dekenai tubuna momo do lau henia, dohore idia be bese bada herea. Oi do lau hanamoa, bona oiemu ladana do lau habadaia, vadaeni, taunimanima ese namo do idia davaria oi dekena amo. Oi idia hanamoa taudia be lauegu hanamoa do idia davaria. To oi idia hadikaia taudia be dohore lau hadikaia. Tanobada ena bese ibounai be oi dainai namo do idia davaria.” (Genese 12:1-3; Kara 7:2-4) “Tanobada ena bese ibounai”—anina be ita danu; ita be edena bese taudia be herevana.—Salamo 65:2.
2 Iehova ese unai bamona ia gwauhamata henia tauna be abidadama tauna ta; unai hegeregerena, bema ita be mai eda abidadama, Dirava ese ia gwauhamatalaia hahenamo do ita abia. (Iakobo 2:23; Heberu 11:6) Abraham ena abidadama be mai ena kara. Ena abidadama dainai Mesopotamia ia rakatania, ia diba lasi gabu daudauna ia lao henia. “Dirava ia abidadama henia dainai Dirava ia gwauhamatalaia tanona dekenai idau bese tauna bamona ia noho.” Badina be “hanua badana ta [Dirava ena Basileia] ia naria noho. . . . Unai hanua be Dirava ese iena palani hegeregerena ia karaia, bona ia haginia danu.”—Heberu 11:8-10.
3 Abraham ena mauri lagani be 100 bona ena adavana Sara ena mauri lagani be 90 neganai, hoa dalana amo Iehova ese natuna merona ta ia henidia, Isako unai. Inai natuna amo Dirava ese Abraham ena abidadama bona kamonai ia tohoa bada. Isako ia tauhau neganai, Iehova ese Abraham ia hagania, do ia abia lao Moria tanona dekenai, unuseniai lahi dekenai do ia bouboulaia. Abraham be unai bamona ia karaia matamaia, badina ia laloa Dirava ese ena natuna na mase amo do ia hatorea isi diba. (Heberu 11:17-19) Isako ese ena tamana ia kamonai henia; Abraham ese ia guia bona boubou patana latanai ia atoa hegaegae, bena kaia amo ia alaia mase gwauraia neganai, Iehova ena aneru ese ia koua. Unai hahetoho ese ia hamomokania vadaeni Abraham be gau ta do ia dogoatao lasi Dirava ia ura abia neganai. Unai dainai Dirava ese ena gwauhamata Abraham dekenai ia gwauraia lou. Bible ia gwau:
4 “Iehova ia hereva, ‘Lau sibona egu ladanai lau gwauhamata inai. Inai bamona oi karaia vadaeni dainai, emu natuna, emu natuna tamona, oi lalokau henia merona, be lau ura abia neganai oi dogoatao lasi dainai, momokani oi do lau hanamoa, bona emu garana taudia do lau hahutumadia, guba hisiudia bona kone mirina bamona; emu garana ese ena inai taudia edia hanua ena ikoukou do ia abia. Bona oiemu garana dainai tanobada besedia iboudiai be sibodia do idia hanamoa, badina be oi ese lauegu hereva oi kamonai henia dainai.’ ”—Genese 22:15-18, NW.
5 Abraham ese Iehova ia laulaulaia bona Isako ese Iesu Keriso ia laulaulaia; unai ita diba neganai, edia kara ena anina bada ita dekenai ita lalo-pararalaia. Iehova ita kara henia hegeregerena, do ita mauri o do ita mase. Mauri hanaihanai do ita abia diba, badina be, Abraham ese Isako ia bouboulaia toho hegeregerena, Dirava ese ena Natuna na boubou gauna ta bamona ia henia, iseda kara dika kokia totona. (Ioane 3:16) Iehova idia “hadikaia,” idia matauraia lasi, o ena palani idia laloa maragi taudia, be ia ese do ia hadikadia, anina be do idia mase ela bona hanaihanai. (1 Samuel 3:12-14; 2:12 itaia.) To bema iena heduru ita laloa bada, Abraham ia hanaia Diravana do ita “hanamoa.” Edena bamona? Do ita gwau gau namodia iboudiai be Iehova ena amo idia mai, iena Natuna ena amo ia henia harihari gauna, mauri, danu. Danu, Iehova ena kara namo bona ena Basileia hairaina do ita harorolaia. (Iakobo 1:17; Salamo 145:7-13) Inai dala amo iena hahenamo do ita abia ela bona hanaihanai.
ABRAHAM ENA GWAUHAMATA “GARANA”
6 Taunimanima ia hanamodia totona, Iehova ese guba gavamanina maorona ta ia laloa hegaegae. Iesu Keriso be Abraham ena bese lalonai ia vara, iena “garana” badana, bona Iehova ese king dagina ia henia vadaeni. (Galatia 3:16; Mataio 1:1) Unai dainai, Dirava ena gwauhamata Abraham dekenai hegeregerena, ia ese Iesu Keriso ena amo tanobada besedia iboudiai do ia hanamodia. Vadaeni, unai hahenamo oi tahua noho a? Oiemu mauri dalana amo oi hahedinaraia Iesu ena boubou gauna oi laloa bada a? Ia be King hegeregerena oi kamonai henia noho, a?—Ioane 3:36; Kara 4:12.
7 Guba dekenai do idia vara gaudia be aneru ta ese aposetolo Ioane ia haheitalaia; Ioane ese haida ia itadia, idia be Iesu Keriso danu idia gini, guba ena Siona Ororona dekenai. Idia danu be “Abraham ena natuna.” Apokalupo 14:1-5 hegeregerena, “taunimanima ibounai edia huanai dekena amo Dirava ese idia ia hoia vadaeni,” bona edia namba be 144,000. (Galatia 3:26-29) Idia be daidia? Bible ese ia hahedinaraia goevagoeva, Dirava ia ura lasi kara maoromaoro taudia iboudiai be guba dekenai do ia abidia daekau. (Mataio 11:11; Kara 2:34; Salamo 37:29) “Orea maragi” sibona be Keriso danu do idia lohia, guba Basileiana lalonai. King ai bona hahelaga taudia ai do idia lao, bona ia danu do idia lohia ela bona lagani 1,000.—Luka 12:32; Apokalupo 5:9, 10; 20:6.
8 Dirava ese unai “orea maragi” taudia edena bamona ia abidia hidi? Israel taudia korikoridia ia boiridia guna, guba Basileiana idia abia totona. To edia abidadama be lasi dainai, idia sibodia bogaragidia amo 144,000 ia abidia lasi. Unai dainai Samaria taudia ia boiridia bena gabeai bese idauidau taudia danu. (Kara 1:8) Unai “orea maragi” taudia ginigunadia be lauma helaga amo ia horodia, Pentekoste dinanai, lagani 33 C.E. lalonai. Unai orea taudia be Dirava ese ia abidia hidi noho, ema bona 144,000 dekenai maka ia atoa. Unai murinai ia ese guba gavamanina henunai do idia noho taudia ia haboudia matamaia.
9 Keriso ida guba Basileiana do idia abia taudia be Bible lalonai idia gwauraidia “abia hidi taudia,” “helaga taudia,” bona Dirava ese ia “horoa” taudia. (2 Timoteo 2:10; 1 Korinto 6:1, 2, NW; 2 Korinto 1:21, NW) Edia orea be Keriso ena “headava matamata hahinena” idia gwauraia danu. (Apokalupo 21:2, 9; Efeso 5:22-32) Edia dagi ma haida hegeregeredia, idia gwauraidia Keriso ena “tadina,” “Dirava ena dihina, Keriso ida,” bona Dirava ena “natuna.” (Heberu 2:10, 11; Roma 8:15-17, NW; Efeso 1:5) Herevana edena bese amo idia mai, to lauma dalanai idia be “Dirava ena Israela.” (Galatia 6:16; Roma 2:28, 29; 9:6-8) Iehova ese iena Taravatu gwauhamatana Israel dekenai ia hadokoa neganai, gwauhamata matamatana ia karaia lauma Israel dekenai. To ia ese Israel taudia na unai gwauhamata gunana hegeregerena ia kara henidia karadia be toa, gabeai do idia vara gaudia idia laulaulaia. (Heberu 10:1) Vadaeni, Israel besena gunana, Dirava ese ia abia hidi iena “bese korikori,” ese dahaka ia laulaulaia? Gauna be lauma Israel, Dirava ia abidia hidi, guba dekenai Keriso danu do idia lohia, taudia unai. (Esodo 19:5, 6 be 1 Petro 1:3, 4 bona 1Pe 2:9 danu oi hahegeregerea.) Keriso bona idia edia amo Dirava ese kamonai taudia oredia iboudiai do ia hanamodia. Inai ita diba neganai, Bible ena anina ita lalo-pararalaia diba.
“GARANA” AMO IA HANAMODIA TAUDIA
10 Gunaguna, Dirava ese Israel besena ia durua bada noho lalonai, ia ese danu dala ia kehoa idau bese taudia edia, idia ura Israel taudia danu tomadiho momokani do idia karaia taudia unai. Bible ese unai bamona taudia ia gwauraidia goevagoeva. Hari inai nega lalonai haida be idia hegeregeredia ai idia lao, a? Oibe. Dala idauidau momo amo idia laulaulaidia taudia be inai: Idia be lauma Israel taudia lasi, to idia ura bada mauri hanaihanai be tanobada dekenai do idia abia, Dirava ena Basileia henunai. Dirava ese unai taudia ia gwauraidia Abraham dekenai, ia gwau iena “garana” dainai “tanobada besedia iboudiai be sibodia do idia hanamoa.”—Genese 22:18, NW; Deuteronomi 32:43.
11 Nega ibounai Dirava ena palani be taunimanima iboudiai be tomadiho momokani dekenai do idia lalo-tamona. King Solomon ese Ierusalem dekenai ia haginia dubuna ia hahelagaia neganai, Iehova ia guriguri henia, ia noia idau bese taudia edia noinoi do ia kamonaia, Israel danu idia tomadiho henia maoromaoro taudia unai. (2 Sisiga 6:32, 33) Bona, Isaia 56:6, 7 dekenai, Dirava ia gwauhamata, ia gwau: “Idau bese taudia Iehova ena orea ai idia vareai vadaeni, ia do idia tomadiho henia totona bona Iehova ena ladana do idia lalokau henia bona iena hesiai taudia ai do idia lao totona taudia, . . . lau ese egu ororo helagana dekenai do lau hakaudia mai, bona egu guriguri rumana lalonai do lau hamoaledia. . . . badina be egu dubu be bese iboudiai edia guriguri rumana do idia gwauraia.” Unai hegeregerena, hari inai negai “idau bese taudia” be bese iboudiai amo idia mai, “Iehova ena orea ai idia vareai.” Inai idia karaia totona, edia mauri idia gwauhamatalai henia, ranu lalonai idia bapatiso edia gwauhamata toana hegeregerena, bena edia hesiai gaukara namona amo idia hahedinaraia “Iehova ena ladana” mai ena anina ibounai danu idia lalokau henia.—Mataio 28:19, 20.
12 Namona be Dirava idia kamonai henia momokani, lauma amo ia horodia taudia idia karaia hegeregerena. Mose ena Taravatu ai Iehova ia gwau taravatu do ia tamona, Israel taudia dekenai bona “idau tauna” dekenai, tomadiho momokani ia badinaia tauna unai. (Numera 15:15, 16) Ia ura idia lalokau heheni momokani. (Levitiko 19:34) Unai hegeregerena, unai idau taudia ese idia laulaulaidia taudia danu ese Dirava ena hahegani idia badinaia momokani toho, bona lauma Israel taudia oredia ida idia gaukara hebou mai edia lalokau bona mai edia lalo-tamona danu.—Isaia 61:5.
13 Isaia ese taunimanima hutuma “bese iboudiai” amo ia perovetalaidia, hari inai negai mai edia ura bada danu idia aru mai Iehova ena dubu dekenai. Ia gwau: “Taunimanima momo do idia lao, do idia gwau: ‘Umui mai, Iehova ena ororo dekenai do ita daekau, . . . ia ese ena kara do ia hadibaia ita dekenai, bona ita be iena dala dekenai do ita raka.’ ” Unai dainai, ‘edia tuari kaia idia hodoa, tano geia auridia ai idia halaoa’ bona ‘tuari daladia idia hadibaia lou lasi.’ (Isaia 2:1-4) Oi danu be unai moale taudia edia orea lalonai, a? Oi danu oi ura Dirava ena taravatu oi diba bona oi badinaia, bona tuari gaudia oi abidadama henia lasi, a? Dirava ia gwauhamata vadaeni, inai dala idia badinaia taudia hutuma bada herea be “hisihisi badana” amo do idia roho mauri bena iena “tanobada matamatana” do idia noholaia mai edia maino danu.—Apokalupo 7:9, 10, 14, NW; Salamo 46:8, 9.
[Study Questions]
1. Dirava ese Abraham edena bamona ia gwauhamata henia, unai amo ia hahedinaraia “tanobada ena bese ibounai” be iena lalo-namo do idia abia diba?
2. (a) Abraham hegeregerena, ita be mai eda dahaka be namo? (b) Abraham ese ena abidadama edena bamona ia hahedinaraia?
3. Isako ena amo Dirava ese Abraham ena abidadama edena bamona ia tohoa bada?
4. Unai neganai Dirava be dahaka gwauhamata badana ma ta amo tanobada besedia iboudiai ia gwauhamatalaidia?
5. (a) Abraham ese Isako ia bouboulaia toho ese dahaka ia laulaulaia? (b) Genese 12:3 hegeregerena, taunimanima ese Abraham ia hereaia Diravana edena bamona idia “hadikaia,” bona edia davana be dahaka? (c) Edena bamona ita “hanamoa” diba?
6. (a) Abraham ena “garana” badana be daika? (b) Iena amo ia mai hahenamona be edena bamona ita abia diba?
7. (a) Daidia danu be “Abraham ena natuna”? (b) Dahaka dainai ita diba Dirava idia badinaia taudia haida be guba dekenai do idia lao lasi?
8. “Orea maragi” taudia be edena negai ia abidia hidi matamaia, bona ia abidia hidi noho ema bona edena negai?
9. (a) Bible ese edena hereva idauidau amo inai guba oreana ia gwauraia? (b) Israel taudia ese daidia idia laulaulaidia?
10. Idau bese taudia, Iehova idia tomadiho henia taudia unai, ese daidia idia laulaulaidia?
11. (a) Solomon ese idau bese taudia edena bamona ia gurigurilaidia? (b) Hari inai negai “idau bese taudia” be edena dala amo “Iehova ena orea ai idia vareai” noho?
12. Mose ena Taravatu be edena bamona ia hahedinaraia taravatu be tamona, lauma Israel dekenai bona Dirava ena Basileia henunai tanobada idia noholaia gwauraia taudia dekenai danu?
13. Bema ita ura ita roho mauri bena “tanobada matamatana” ita noholaia, Isaia 2:1-4 edena bamona ita badinaia be namo?