Karoa 12
Atai amo Ia Mai Aonegana
“Iehova e, oi karaia gaudia be momo herea! Iboudiai be mai emu aonega ida oi karaia vadaeni. Oi karaia gaudia ese tanobada idia hahonua.” (Salamo 104:24) Oibe, Dirava ese ia karaia gaudia iboudiai, hisiu oreadia badadia amo ela bona palaoapalaoa, edia hairai ese iena aonega hereadaena idia hahedinaraia. Hari inai negai taunimanima ese gau matamatadia momo idia karaia diba, to iena diba ese edia diba ia hanaia momokani. Bema Baibel be Dirava ena Hereva, Iena aonega hereadaena be ia lalonai ia hedinarai be maoro. Vadaeni, unai aonega ia hedinarai, eiava?
1. (Hamatamaia herevana danu) (a) Dirava ena aonega hereadaena ena toana be edeseniai ita itaia? (b) Baibel ese aonega edena bamona ia sisibalaia?
BAIBEL ese ia hahedinaraia aonega be gau badana. Ia gwau: “Aonega be gau hereadaena. Aonega oi abia; bona oi abia gauna ibounai ida, lalo-parara danu oi abia.” (Hereva Lada-isidia 4:7) Ia ese danu ia hahedinaraia ita taunimanima be nega momo aonega ai ita dabu, ma ia gwau: “Bema umui ta be aonega lasi, namona be Dirava do ia noia, vadaeni Dirava ese ia dekenai do ia henia. Badina be Dirava ese taunimanima ibounai dekenai gau namodia ia henia noho.”—Iakobo 1:5.
2. Ta ese ena aonega edena bamona ia habadaia diba?
2 Dirava ese aonega ita ia henia dalana ta be inai: Iseda lalona ia hagoadaia, Baibel do ita duahia bona ena anina do ita dibaia totona. Baibel ia gwau: “Natugu e, bema lauegu hereva oi abia dae bona lauegu hahegani oi lalodia bada, aonega oi hakala henia totona . . . Iehova gari henia karana do oi diba, bona Dirava diba maoro karana do oi davaria. Badina be Iehova sibona ese aonega ia henia.” (Hereva Lada-isidia 2:1, 2, 5, 6) Baibel ena sisiba ita badinaia bona ena anina bada ita itaia neganai, ita diba ia ese Dirava ena aonega ia hahedinaraia.
Aonega Herevadia
3, 4. (a) Baibel ese moni ura henia taudia edia kerere edena bamona ia gwauraia? (b) Baibel ese moni edena bamona ia sisibalaia namonamo?
3 Inai ita diba goevagoeva totona, mani Baibel ena aonega herevadia haida ita laloa. Ta be inai: “Kohu momo idia ura henia taudia be hedibagani dekenai idia moru diba. Bona . . . ura dikadia bona ura kavakava ese . . . do idia koia bona hadikaia. Badina be moni ura henia kara ese dika idauidau ibounai ia havaraia noho.” (1 Timoteo 6:9, 10) To hari inai negai taunimanima edia lalona idia hagoadaia, moni do idia tahua guna totona. Madi, idia momo, ena be idia tahua kohuna idia davaria, to edia lalona idia hegeregere lasi. Doketa ta, unai kerere ia tahua namonamo tauna, ia gwau: “Ena be ta ese ladana bada bona kohu momo ia abia, to unai dainai ena lalona do ia hegeregere lasi bona taunimanima ese ia do idia matauraia momokani lasi bona do idia ura henia momokani lasi.”1
4 To aonega tauna ese moni ia dadaraia vaitani diba lasi. Baibel ena hereva maorona ta be inai: “Aonega ese taunimanima ia naridia moni ese ia naridia hegeregerena; to diba ena hahenamo be inai, idia abia taudia be aonega ese ia hamauridia.” (Kohelete 7:12) Baibel ese ita ia hadibaia, ena be moni be mai anina bada, to gau iboudiai ia hereaia lasi. Bema ita aonega lasi, moni do ita gaukaralaia maoromaoro lasi bena ita do ia durua bada lasi.
5, 6. (a) Baibel ese ita ia sisiba henia kara dika taudia do ita bamodia lasi; dahaka dainai unai sisiba be mai aonega? (b) Bema ‘aonega taudia ida ita raka,’ dahaka namo do ita davaria?
5 Baibel ena hereva momokanina ma ta be inai: “Aonega taudia ida ia raka tauna be do ia aonega, to kavakava taudia ia bamodia tauna ese dika do ia davaria.” (Hereva Lada-isidia 13:20) Iseda bamodia edia lalo-ani be mai anina bada ita dekenai, ani? Memero kekeni haida be edia bamodia edia lalo-ani dainai idia inuinu kekero, o drag idia ania kava, o matabodaga karadia idia karaia. Hereva mirodia herevalaia taudia bema ita bamodia, ita danu be hereva mirodia do ita herevalaia. Bema koikoi taudia ita bamodia, do ita koikoi reana. Momokani, Baibel ena hereva hegeregerena, “bema kara dika taudia danu umui turana karaia neganai idia ese emui kara namona do idia hadikaia.”—1 Korinto 15:33.
6 To kara namo taudia edia hebamo ese ita ia hanamoa diba. Bema ‘aonega taudia ida ita raka,’ do ita aonega, badina be edia kara namodia do ita tohotohoa. Mai ena aonega ida Baibel ese iseda lalona ia hagoadaia, ita bamodia gwauraia taudia do ita abidia hidi namonamo totona.
7. Dahaka dainai Baibel ena sisiba be idau vaitani?
7 Baibel be mai ena sisiba herevadia unai bamodia momo herea. Ena sisiba ese namo ia havaraia nega iboudiai. Nega ta ita ia hadikaia lasi. Kara idauidau momo herea ia sisibalaia. Idia badinaia bona ena hahenamo idia abia hanaihanai taudia be idia diba Baibel ena aonega be idau vaitani.
Sisiba mai Aonegana
8. Baibel ese ia gwauraia lasi karana ta ita lalohadailaia toho neganai, ia ese ita edena bamona ia durua?
8 To, Baibel ese ia gwauraia lasi karana ta be edena bamona ita lalohadailaia diba? Nega momo ena hereva ese ita ia hakaua, unai bamona karadia ita lalohadailaia maoromaoro totona. Kuku ania karana be unai bamona karana ta. Iesu ena nega lalonai, Israel taudia bona kahirakahira idia noho besedia be kuku idia diba lasi, unai dainai Baibel ese ia gwauraia lasi. To Baibel ena hereva haida ese ita idia durua, ita be mai eda aonega ida ita lalohadailaia totona.
9-11. Baibel ena hereva ese ita edena bamona ia durua, kuku ania karana ita lalohadailaia maoromaoro totona, bona unai hereva ita badinaia neganai, dahaka namo ita davaria?
9 Ena be kuku ania taudia idia gwau unai kara idia moalelaia, to unai dala amo muramura dikadia be edia baragi lalodiai idia veria vareai. Edia tauanina bona edia dabua bona hodahoda be idia hamiroa. Danu, kuku ania karana idia manadalaia taudia ese idia hadokoa be auka. Vadaeni, Baibel ena heduru mani ita tahua, unai kara be mai eda aonega ida ita lalohadailaia totona.
10 Paulo ese aniani gaudia ia herevalaia neganai, ia gwau: “Namo lasi inai kara ta ese [lau] do ia biagua.” (1 Korinto 6:12) Ia be aniani idauidau iboudiai ia ania diba, taravatu lasi. To ia diba haida edia lalona idia manoka dainai, aniani gaudia haida do ia ania lasi be namo, edia lalona do ia hahekwakwanaia garina. Unai aniani gaudia ese ia idia biagua lasi dainai, anidia karana be unai bamona ia hadokoa diba. Bema ta ese kuku ania karana ia hadokoa diba lasi, unai kara ese “ia biagua” momokani. Unai dainai Paulo ena hereva aniani dekenai ese kuku ania karana danu ia sisibalaia. Ita manadalaia karana ta ese ita ia biagua be namo lasi.
11 Danu, Baibel ia gwau: “Tauanina bona lauma hamiroa karadia ibounai do ita hadokoa.” (2 Korinto 7:1) Momokani, kuku ania karana be tauanina hamiroa bona hadikaia karana ta. Unai kara ena dika be World Health Organization ese ia gwauraia hedinarai, ia gwau lagani ta ta iboudiai taunimanima milion ta mai kahana be ia dainai idia mase. Bema Baibel ena hereva hegeregerena tauanina hamiroa karadia iboudiai amo ita siri, kuku ania karana bona drag bona miro gaudia idaudia ese ita do idia hadikaia lasi.
Ita Idia Hanamoa Herevadia
12. Dahaka dainai Baibel ena sisiba ibounai ese iseda tauanina bona iseda lalona ia hanamoa diba?
12 Baibel ena sisiba badinaia karana ese iseda tauanina ia hanamodia. Unai ita hoalaia lasi be namo, badina be Baibel ena sisiba be Dirava ena amo. Ita taunimanima ia havaraia dainai, ita ia karaia dalana bona ita idia hanamoa diba gaudia be ia diba herea. (Salamo 139:14-16) Nega ibounai iena sisiba ese iseda tauanina bona iseda lalona edia namo ia havaraia.
13, 14. Dahaka dainai Baibel ena sisiba hegeregerena ita koikoi lasi be aonega dalana?
13 Unai hegeregerena, ita ia sisiba henia do ita koikoi lasi. Ena be Baibel ia gwau koikoi herevadia be Iehova ese ia inai henia, bona koikoi taudia be Dirava ena tanobada matamatana dekenai do idia noho lasi, to taunimanima momo idia koikoi. (Hereva Lada-isidia 6:19; Apokalupo 21:8) Bisinesi magasin ta ia gwau: “Hari inai negai, U.S. dekenai koikoi karadia bona herevadia be momo herea, nega gunadia iboudiai idia hanaia.”2
14 To koikoi karadia bona herevadia ese taunimanima idia hadikadia, bona edia noho hebou dalana idia hadikaia danu. Magasin ta, The American Journal of Psychiatry, be ia gwau: “Koikoi herevadia amo idia koidia taudia idia hadikadia vaitani diba. Badina be, koikoi herevadia dainai idia ese edia mauri edia anina bada gaudia idia lalohadailaia kerere reana. Koikoi herevadia ese idia halasidia taudia danu idia hadikadia diba.”3 Baibel ena aonega sisibana hegeregerena, hereva momokani ita gwauraia be namo!
15, 16. Bema Baibel ena sisiba hegeregerena haida ita lalokau henidia, unai ese ita edena bamona ia hanamoa?
15 Baibel ese danu ita ia hadibaia, haida edia namo do ita tahua, do ita lalokau henidia bona do ita durudia be namo. Iesu ia gwau: “Gau ibounai umui ura taunimanima ese do idia karaia umui dekenai, umui ese unai bamona do umui karaia idia dekenai.”—Mataio 7:12.
16 Bema taunimanima iboudiai be unai bamona idia kara heheni, unai ese tanobada do ia hanamoa momokani! Bona ripoti ta United States dekenai ese ia hahedinaraia hegeregerena, sibodia edia lalona edia mamina do idia hanamoa danu. Taunimanima 1,700 idia gwau, idia ese haida idia durudia negadiai, unai ese edia lalona ia hanamoa bona edia lalo-hekwarahi amo idia vara hisihisidia ia haorea. Unai ripoti ena hereva dokona be inai: “Inai ese ia hahedinaraia, taunimanima edia kara korikori be, haida edia namo idia tahua, sibodia edia namo idia tahua hegeregerena.”4 Unai be Baibel ena hahegani ta hegeregerena: “Oiemu badibadinai tauna dekenai oi lalokau henia, oi sibona oi lalokau henia bamona.” (Mataio 22:39; ma danu Ioane 13:34, 35 oi itaia.) Iseda kara korikori be ita sibona ita lalokau henia. To Baibel ia gwau, iseda lalona idia namo totona namona be haida ita lalokau henidia danu.
Headava bona Kara Maoromaoro
17. Dahaka dainai haida idia laloa Baibel ena sisiba be anina lasi hari inai negai?
17 Ena be Baibel ese aonega bada ia hahedinaraia, to ena hereva haida be taunimanima ese idia ura henia lasi. Idia gwau ia be idaunegai gauna sibona. Badina ena be Baibel ena sisiba ese iseda namo nega daudau lalonai ia havaraia, to edia lalona bona edia tauanina idia biagua taudia mo sibodia ese ena sisiba herevadia idia badinaia diba; bona hari inai negai momo idia ura lasi unai bamona do idia karaia.
18, 19. Baibel ena taravatu headava bona kara maoromaoro dekenai be dahaka?
18 Baibel ese headava bona kara maoromaoro taravatudia metaudia ia gwauraidia. Ia gwau tau ta ese hahine tamona sibona do ia adavaia be namo. Ia gwau, kerere badadia dainai headava taudia haida ese edia adavadia do idia rakatanidia diba o edia headava do idia hadokoa diba reana, to namona be oredia ese edia adavadia do idia badinadia ela bona mase. “Buka Helaga umui duahia lasi, a? Ia torea, ‘Hamatamaia nega ia karaia neganai Dirava ese tau bona hahine ia karaia, ia gwau, “Inai dainai tau be ena tamana sinana do ia rakatania, ena adavana dekenai do ia hakapua, vadaeni idia ruaosi be tamona idia noho.” ’ Unai dainai idia be rua lasi, edia anina be tamona. Dirava ese ia hakapua taudia, be taunimanima ese do idia hapararaia lasi.”—Mataio 19:4-6; 1 Korinto 7:12-15.
19 Danu, Baibel ia gwau headava lalonai sibona taunimanima ese mahuta hebou karadia idia karaia be maoro. Mahuta hebou karadia idaudia iboudiai ia taravatua, ia gwau: “Lebulebu taudia . . . heudahanai taudia . . . eiava tatau ese tatau danu hemarai karadia idia karaia taudia . . . ta lasi be Dirava ena Basileia do ia davaria diba.”—1 Korinto 6:9, 10.
20. Hari inai negai, edena dala amo momo ese Baibel ena taravatu maorona idia dadaraia?
20 Hari inai negai unai taravatu be taunimanima momo ese idia laloa lasi. Profesa David Mace ia gwau: “Hanaia laganidia 80 bamona lalodiai iseda mauri dalana bona iseda tubudia ese idia karaia karadia idia haidaua vaitani. Unai bamona karana ta be headava.”5 Taunimanima momo be lebulebu karadia idia karaia. Memero bona kekeni idia mahuta hebou be taunimanima ese idia hoalaia lasi. Bona headava taudia momo idia heudahanai.
21. Momo ese Baibel ena taravatu maorona idia badinaia lasi dainai, dahaka ia vara?
21 Unai lebulebu karadia ese moale idia havaraia, a? Lasi, lalo-hekwarahi bona lalohisihisi idia havaraia, bona ruma taudia idia hapararadia. Ma danu, unai kara dainai momo herea ese gonoria, sifilis, klamidia bona unai bamona goreredia ma haida idia abia, bona doketa ese unai dika idia koua diba lasi. Vanegai laganidia lalodiai, hahine edia ariara karadia dainai bona tatau be tatau ida idia karaia kara bodagadia dainai, AIDS gorerena be idia momo dekenai ia hanai haraga. Kekeni momo ese ulato dagina idia abia matamata neganai beibi idia abidia. Magasin ta, Ladies’ Home Journal, be ia gwau: “Mahuta hebou karadia tahua goadagoada karana . . . ese moale bada ia havaraia lasi, to lalohisihisi bada ia havaraia vadaeni.”6
22. Dahaka ese moale bada ia havaraia?
22 Unai dainai, hari inai negai haida idia hereva, Profesa Carlfred B. Broderick ia hereva bamona; ia gwau: “Reana hari ita be lo taudia ai ita lao vadaeni dainai, inai ita laloa namonamo be namo: Namona be iseda bese taudia do ita sisiba henidia, mahuta hebou karadia do idia karaia lasi ela bona do idia headava. Unai dala amo do ita durudia bada, edia ura-kwalimu ena anina do idia moalelaia totona; do idia gorere lasi, bona do idia rogogoro lasi idia ura lasi negadiai.”7 Momokani, ia hedinarai vadaeni, Baibel ena taravatu kara maoromaoro dekenai ese moale bada ia havaraia.
Hahegani Namodia
23. (a) Bema ta ese ena headava ia moalelaia lasi, unai kerere hanamoa dalana tamona be ena headava do ia hadokoa, a? (b) Headava haginia auka bona moalelaia daladia rua be dahaka?
23 Dirava ia ura headava taudia ese edia adavadia do idia badinadia ela bona mase. Unai dainai headava kwalimulaia dalana ita diba be namo. Haida idia gwau, bema ta ena headava ia dika, ia hadokoa be namo, ia lalohisihisilaia noho be dika. To dala namona be inai: Ena lalona idia hahisia gaudia do ia hamaoromaoroa toho. Baibel ese inai kara danu ia sisibalaia. Ita itaia vadaeni, ita ia sisiba henia iseda adavadia do ita badinadia; headava moalelaia bona haginia auka dalana ta unai. Dala ma ta be, Baibel ena hereva ma ta do ita abia dae, ia gwau headava lalonai kwarana tamona be tau. Hahine ia sisiba henia, ena adavana do ia durua bona do ia hanaia toho lasi. Tau ia sisiba henia, ena dagi do ia gaukaralaia ena adavana ena namo havaraia totona, bona sibona ena ura do ia tahua lasi.—1 Korinto 11:3; 1 Timoteo 2:11-14.
24, 25. Baibel ese tatau bona hahine edena bamona ia hagoadadia, edia headava dagidia korikori do idia gaukaralaidia totona?
24 Baibel ia gwau: “Namona be tatau ese edia adavana do idia lalokau henia, idia edia tauanina idia lalokau henia hegeregerena. Adavana ia lalokau henia tauna ese sibona ia lalokau henia noho. Badina be tau ta ese sibona ena tauanina ia badu henia diba lasi.” (Efeso 5:28, 29) Lalokau tauna ese ena siahu ia gaukaralaia mai ena hebogahisi ida. Ia diba, ena be ia be ena adavana ena kwarana, to namona be ena namo ia tahua bona ena ura bona ena lalohadai ia nanadailaia.
25 Baibel be ma ia gwau: “Hahine danu iena adavana do ia matauraia.” (Efeso 5:33) Namona be ena adavana do ia matauraia iena dagi dainai bona do ia durua mai ena hemataurai ida. Hari inai negai hahine momo ese inai sisiba idia abia dae diba lasi. To Baibel ena sisiba hegeregerena edia adavadia idia lalokau henidia bona idia matauraidia hahinedia iboudiai ese edia headava idia moalelaia.
26. Baibel ena taravatu headava dekenai ese anina namona idia havaraia a? Haheitalai ta oi gwauraia.
26 Sivarai ta South Pacific motumotuna ta amo ese ia hahedinaraia, Baibel ena sisiba unai bamona ese anina namona ia havaraia. Unuseniai, tau ta mai ena adavana be lagani 10 idia noho hebou murinai idia laloa edia headava ia dika. Unai dainai idia parara gwauraia. Bena hahine be Iehova ena Witness hahinena ta ida Baibel ena sisiba headava taudia ediai idia stadilaia hebou. Ena tau ia gwau: “Egu adavana ese Baibel ena sisiba herevadia ia dibaia noho lalonai, ia badinaia toho. Pura haida murinai lau itaia iena kara haida ia haidaua.” Ia ura ia diba badina be dahaka ena adavana be unai bamona ia karaia, unai dainai ena stadi lalonai ia helai, bona Baibel ena sisiba tatau ediai be ia dibaia. Unai murinai ia gwau: “Hari ai ese emai ruma bese hamoalea dalana korikori ai davaria vadaeni.”
27. Dahaka hereva Baibel lalonai bema Keristen taudia ogogamidia ese idia badinaia, unai ese do ia durudia?
27 Baibel ena sisiba ese danu ogogami taudia ia durudia. Ia hahedinaraia kuku ania karana bona inuinu kekero karana be dika; ogogami taudia edia moni haorea karadia unai. (Hereva Lada-isidia 23:19-21) Danu, Baibel ia gwau namona be ita gaukara goadagoada, badina be gaukara goada tauna ese ena ruma bese ubua dalana ia davaria haraga diba, to lahedo tauna o lalo-manoka tauna be unai bamona lasi. (Hereva Lada-isidia 6:6-11; 10:26) Danu, bema Baibel ena sisiba hegeregerena ta ese ‘kara kerere taudia ia mama henidia lasi,’ do ia henaohenao lasi bona laki gadara do ia karaia lasi, ena ogogami haorea totona. (Salamo 37:1) Haida idia laloa unai dala amo edia ogogami do idia haorea haraga, to gabeai unai kara edia davana dikana be nega daudau lalonai idia hisihisilaia bada.
28-30. (a) Baibel ena hereva badinaia karana ese Keristen hahinena ta edena bamona ia durua, ena ogogami lalonai ia kwalimu totona? (b) Keristen taudia ogogamidia tausen momo edia sivarai ese dahaka idia hahedinaraia?
28 Inai sisiba ese ogogami taudia ia durudia momokani, eiava? Tanobada ena gabu idauidau dekenai idia noho taudia edia sivarai ese idia hahedinaraia ia durudia momokani. Unai sivarai ta be inai: Keristen hahinena ta Asia dekenai ena adavana ia mase neganai, ena moni davaria dalana be lasi, bona ia be mai ena natuna merona ta. Vadaeni, Baibel ese ia bona ena natuna edena bamona ia durudia?
29 Unai hahine be Baibel ena sisiba hegeregerena ia gaukara goadagoada. Dabua ia turidia bona ia hoihoilaidia. Baibel ena sisiba hegeregerena iena bisinesi ia karaia mai ena momokani ida; unai dainai taunimanima haida ese dabua iena amo idia hoidia loulou. (Kolose 3:23) Bena ena ruma ena daiutu maragina ta be aniani gabuna ai ia halaoa, bona daba daba iboudiai 4 okoloka bamona ai ia toreisi bona aniani ia hegaegaelaia ia hoihoilaia totona. Unai dala amo danu moni ia davaria. Ia gwau: “Ena be unai bamona lau karaia, to davana maragi gaudia sibodia lau hoia diba emai mauri durua totona.” To ia ese Baibel ena sisiba ia laloatao: “Bema ita be mai iseda aniani bona dabua neganai, moni dekenai ita laloa momo lasi be namo.”—1 Timoteo 6:8.
30 Ma ia gwau: “Ena be lau ogogami, to unai dainai lau badu lasi. Baibel ena hereva ese egu lalona ia hagoadaia.” Danu, ia davaria vadaeni, Iesu ena gwauhamata ta ia momokani ia dekenai. Iesu ia gwau: “Umui be iena Basileia bona iena kara maoromaoro do umui tahua guna, vadaeni unai gau [tauanina durua gaudia] ibounai danu umui dohore ia henia.” (Mataio 6:33) Hari Keristen hahinena ia davaria vadaeni, Dirava hesiai henia karana ia tahua guna dainai, ena mauri durua gaudia be dala idauidau amo ia abia nega ibounai. Iena sivarai bona Keristen taudia ogogamidia momo herea edia sivarai danu, ese idia hahedinaraia Baibel ena sisiba ese ia durudia momokani.
31. Baibel ena sisiba ita badinaia neganai dahaka ia vara, bona unai ese dahaka ia hahedinaraia?
31 Baibel be mai ena sisiba momo herea, to inai karoa lalonai ai ese ena sisiba sisina sibona ai herevalaia, bona sivarai ta ta sibodia amo ai hahedinaraia inai sisiba ese anina namona ia havaraia. Inai bamona sivarai tausen momo idia noho. Taunimanima ese Baibel idia badinaia neganai namo idia davaria, to idia badinaia lasi neganai dika idia davaria. Sisiba herevadia bukana idauna ta, idaunegai gauna eiava hari inai negai gauna, ese bese idauidau taudia inai bamona ia durudia hanaihanai lasi. Inai aonega sisibana be tubu tama herevadia mo lasi. Inai bamona aonega herevadia momo be Baibel lalonai idia torea, ese ia hahedinaraia goevagoeva ia be Dirava ena Hereva.
[Blurb on page 168]
Heduru karana ese iboudiai ia hanamodia
[Picture on page 163]
Aonega taudia ida raka hebou karana ese ita ia ha-aonegaia, to kavakava taudia edia hebamo ese ita do ia hadikaia
[Picture on page 165]
Kuku ita ania lasi be namo, badina be unai kara ese Baibel ena hereva ia utua
[Picture on page 171]
Edia headava lalonai Baibel ena sisiba idia badinaia taudia ese moale ena badina aukana idia atoa unai
[Picture on page 173]
Baibel ena sisiba badinaia karana ese ogogami taudia ia durudia, edia hekwarahi badadia dekenai idia kwalimu totona