Karoa 22
Edena Tomadiho be Momokani?
ITA diba aposetolo edia nega lalonai Iesu Keriso idia badinaia taudia iboudiai ese tomadiho momokani idia badinaia, Keristen oreana tamona lalonai. To hari inai nega lalonai tomadiho momokani be edena bamona ita davaria diba?
2 Iesu ia gwau: “Edia huahua amo do umui diba idia. . . . au namodia iboudiai ese huahua namodia idia havaraia, to au dikadia iboudiai ese huahua dikadia idia havaraia.” (Mataio 7:16, 17) Anina be edia kara amo ita diba daidia be tomadiho momokani taudia bona daidia be tomadiho koikoi taudia. Vadaeni, tomadiho momokani taudia be dahaka idia hereva bona dahaka idia karaia, edia huahua namona bamona, be namo?
DIRAVA ENA LADANA IDIA HAHELAGAIA
3 Tomadiho momokani taudia ese Iesu ena guriguri herevana hegeregerena idia karaia be namo. Unai guriguri ena hereva ginigunana be inai: “Oiemu ladana do ai hahelagaia.” (Mataio 6:9, HM) Dirava ena ladana ita hahelagaia anina be dahaka? Iesu ese edena bamona ia hahelagaia?
4 Iesu ese ena Tamana ena ladana ia hahelagaia dalana be ia ese ia gwauraia hedinarai, ena Tamana be inai bamona ia hereva henia neganai: “Tanobada dekenai oi henia lau dekenai taudia be oiemu ladana lau hadibaia vadaeni idia dekenai.” (Ioane 17:6, HM) Oibe, Iesu ese Dirava ena ladana, Iehova, ia hadibaia taunimanima dekenai. Iesu ia diba ena Tamana ia ura iena ladana be tanobada ibounai lalonai do idia abia isi. Unai dainai unai ladana ia harorolaia bona ia hahelagaia, taunimanima ese iena kara do idia tohotohoa totona.—Ioane 12:28; Isaia 12:4, 5.
5 Bible ese ia hahedinaraia Dirava be sibona ena ladana dainai Keristen orea momokanina ia havaraia. Aposetolo Petro ia gwau Dirava ese “idau bese taudia ia laloa, bona idia dekena amo bese ta ia abia hidi, iena ladana idia abia.” (Kara 15:14, HM) Unai dainai, namona be Dirava ena orea taudia momokanidia ese ena ladana idia hahelagaia bona tanobada ibounai lalonai idia harorolaia. Hahemauri idia abia dalana tamona be unai, badina be Bible ia gwau: “Iehova ena ladana dekenai idia boiboi taudia iboudiai be do ia hamauridia.”—Roma 10:13, 14.
6 Vadaeni, hari inai nega lalonai edena orea taudia ese Dirava ena ladana idia hahelagaia bona tanobada ibounai lalonai idia harorolaia? Dubu orea momo ese Dirava ena ladana, Iehova, idia gwauraia hedinarai lasi bona haida ese edia Bible amo idia kokia. To orea tamona ese Iesu ena kara idia tohotohoa bona edia dekena taudia vairadiai Iehova ena ladana idia herevalaia momo. Edia ura badana be Dirava ena hesiai gaukara idia karaia bona ena ladana idia harorolaia, Iesu ia karaia hegeregerena. Unai dainai, Bible ena hereva hegeregerena, sibodia idia gwauraia “Iehova ena Witness taudia.”—Isaia 43:10-12.
DIRAVA ENA BASILEIA IDIA HAROROLAIA
7 Iesu ese ia hahedinaraia Dirava ena basileia be gau badana, taunimanima be inai bamona idia guriguri totona ia hadibadia neganai: “Oiemu Basileia do ia mai.” (Mataio 6:10, HM) Iesu ese ia hahedinaraia loulou Basileia sibona ese taunimanima edia hisihisi ia kokia diba. Ia bona ena aposetolo taudia be “hanua badadia bona hanua maragidia iboudiai lalodiai” bona “ruma ta ruma ta dekenai” Dirava ena basileia idia harorolaia bona idia hadibalaia.—Luka 8:1; Kara 5:42; 20:20.
8 Vadaeni, hari inai nega lalonai Dirava ena Keristen orea momokanina ena hadibaia herevana badana be dahaka? Iesu ese inai “dina gabedia” ia perovetalaia, ia gwau: “Inai basileia ena sivarai namona be tanobada ibounai dekenai do idia harorolaia, bese iboudiai hadibaia totona; bena dokona do ia ginidae.” (Mataio 24:14) Unai dainai Basileia be Dirava ena orea taudia edia haroro herevana badana, hari inai nega lalonai.
9 Bema tau ta be oi emu ruma dekenai ia mai bona Dirava ena basileia ia harorolaia, oi laloa ia be Iehova ena Witness tauna ta ani? Badina be idau mission taudia be Dirava ena basileia unai bamona idia harorolaia lasi, ani? Idia momo idia diba lasi inai basileia be dahaka! Ena be ia be Dirava ena gavamani tanobada ibounai totona, to idia herevalaia lasi. Peroveta tauna Daniel ia gwau inai basileia ese ‘ma gavamani iboudiai do ia hamakohidia bona do ia hadokodia, bena ia sibona ese tanobada do ia lohiaia.’—Daniel 2:44.
DIRAVA ENA HEREVA IDIA MATAURAIA
10 Tomadiho momokani taudia edia toana ma ta be Bible idia matauraia. Iesu be nega ibounai Dirava ena Hereva Bible lalonai ia matauraia. Nega momo unai hereva amo sibona ena hereva ia hamomokanilaia. (Mataio 4:4, 7, 10; 19:4-6) Iesu ese Bible ia matauraia dalana ma ta be ena hereva ia badinaia, sibona ena mauri lalonai. Ia gwau lasi Bible be gau maragina. To, sibodia edia lalohadai hegeregeredia hereva idaudia idia hadibaia bona unai amo Bible ena siahu idia hamaragia taudia be ia ese ia samanidia.—Mareko 7:9-13.
11 To Kerisendom ena dubu orea momo ese Keriso ena kara unai bamona idia tohotohoa lasi, ani? Bible idia matauraia momokani lasi, ani? Edia haroro taudia momo ese Bible ena sivarai haida idia abiadae lasi; idia gwau Adam ena sivarai, Noa ena sivarai bona Iona ena sivarai be gori sibona. Ma idia gwau Dirava ese taunimanima ia havaraia lasi, to idia be animal edia amo idia vara. Dubu orea gunalaia taudia haida idia gwau sihari kava karadia bona kara bodagadia ma haida be kerere lasi. Unai bamona hereva amo taunimanima idia hagoadaia, Bible idia matauraia bona idia badinaia totona a? Lasi, ani? Idia ese Dirava ena Natuna bona ena aposetolo taudia edia kara idia tohotohoa lasi.—Mataio 15:18, 19; Roma 1:24-27.
12 Dubu orea taudia haida be mai edia Bible bona idia stadilaia danu, to edia kara ese idia hahedinaraia idia badinaia lasi. Bible ese unai bamona taudia ia gwauraidia, ia gwau: “Idia gwau Dirava idia diba, to edia kara amo Dirava idia dadaraia.” (Tito 1:16; 2 Timoteo 3:5) Bema dubu orea taudia haida idia kasi, bema idia inuinu kekero eiava bema ma kara dikadia haida idia karaia, to edia dubu orea amo idia luludia lasi, anina be dahaka? Anina be Dirava ese edia dubu orea ia moalelaia lasi.—1 Korinto 5:11-13.
13 Bema inai buka ena karoa gunadia bona idia lalodiai idia noho Bible siridia oi laloa namonamo vadaeni, Bible ena hereva badadia oi diba vadaeni. To, bema oi davaria vadaeni oi emu dubu orea ena hadibaia herevadia be Bible ena hereva hegeregerena lasi, dahaka do oi karaia? Bible ena hereva be hereva momokani hegeregerena do oi abiadae, eiava Bible do oi dadaraia bona hereva idaudia, Bible ese ia hamomokania lasi herevadia, do oi abiadae, a? Namona be oi sibona oi laloa namonamo. Badina be, dala maorona oi abiahidi neganai sibona, Dirava ese oi do ia lalo-namo henia bona mauri hanaihanai tanobada ena paradaiso lalonai do oi abia diba.
TANOBADA AMO IDIA GINI SIRI
14 Tomadiho momokani taudia edia toana ma ta be, Iesu ena hereva hegeregerena, “idia be tanobada ena lasi.” (Ioane 17:14, HM) Anina be, tomadiho momokani taudia be inai tanobada dikana bona ena kara amo idia gini siri. Iesu Keriso ese politikol dagina ia dadaraia. (Ioane 6:15) Tanobada amo ita gini siri be gau badana, badina be, Bible ia hereva bamona, Satana Diabolo be tanobada ena lohia. (Ioane 12:31; 2 Korinto 4:4) Danu, Bible be ma ia hahedinaraia tanobada bona ena kara amo ita gini siri be mai anina bada, ia gwau: “Ia ura tanobada ia tura henia tauna be sibona Dirava ena inai tauna ta ai ia halaoa.”—Iakobo 4:4.
15 Oi emu gabu dekenai idia noho dubu oreadia be unai hereva idia abiadae bona idia badinaia, a? Edia haroro taudia bona orea taudia be momokani “tanobada ena lasi” a? Eiava tanobada taudia hegeregeredia sibodia edia bese abia isi karadia bona politikol karadia bona edia bese taudia edia hepapahuahu lalodiai idia vareai, a? Oi diba idia be unai bamona idia karaia. To, bema Iehova ena Witness taudia edia kara oi tahua namonamo, do oi davaria idia ese Keriso bona ena hahediba taudia ginigunadia edia kara idia tohotohoa; tanobada ena politik, ena mata-ganigani karadia, ena kara bodagadia bona ena dagedage karadia amo idia gini siri.—1 Ioane 2:15-17.
IDIA LALOKAU HEHENI
16 Keriso ena hahediba taudia korikoridia edia toana badana be idia lalokau heheni. Iesu ia gwau: “Unai dekena amo taunimanima ibounai do idia diba umui be lauegu diba tahua taudia, ta ta dekenai do umui lalokau henia dainai.” (Ioane 13:35, HM) Dubu orea idauidau, oi diba vadaeni oreadia, be unai bamona lalokau idia hahedinaraia a? Edia bese idia tuari heheni neganai, dahaka idia karaia?
17 Tanobada gunalaia taudia ese oda idia gwauraia neganai, inai dubu orea taudia idia lao, sibodia edia orea taudia, idau bese taudia, idia tuari henidia bona idia alaia mase. Catholic taudia, Protestant taudia bona Moslem taudia danu ese sibodia edia dubu orea taudia idia alaia mase. Oi laloa unai dala amo Dirava ena Hereva idia badinaia bona iena kara idia tohotohoa, a? Lasi, ani?—1 Ioane 3:10-12.
18 To Iehova ena Witness taudia idia lalokau heheni dainai, sibodia edia orea taudia idia tuari henidia lasi, tanobada ena dubu orea taudia idia karaia bamona. Bema ta ia gwau, “Dirava lau lalokau henia,” to ena tadikaka, idau bese tauna, ia inai henia, ia koikoi unai, to idia be unai bamona idia koikoi lasi. (1 Ioane 4:20, 21) Bona ma dala haida amo lalokau idia hahedinaraia danu; edia dekena taudia idia kara namo henidia bona idia durudia toho Dirava idia diba totona.—Galatia 6:10.
TOMADIHO MOMOKANINA TAMONA
19 Tomadiho momokanina tamona sibona ia noho. Badina be Dirava momokanina be “heiriheiri Diravana lasi, to maino Diravana.” (1 Korinto 14:33) Bible ia gwau “abidadama be tamona.” (Efeso 4:5) Vadaeni, hari inai nega lalonai edena orea taudia be tomadiho momokani taudia?
20 Maoromaoro ai haere, ai gwau Iehova ena Witness taudia be unai. Inai hereva oi abiadae totona, oi ai noia Iehova ena Witness taudia edia Kingdom Hall dekenai do oi lao, badina be unai dala amo idia do oi diba namonamo. Edia hereva bona edia kara be unai bamona oi tahua be mai anina bada, badina be Bible ese ia hahedinaraia tomadiho momokani idia badinaia taudia ese moale idia davaria hari, bona dala idia davaria, mauri hanaihanai be tanobada ena paradaiso lalonai idia abia totona. (Deuteronomi 30:19, 20) Vadaeni, hari oi tahua be namo, ani?
[Study Questions]
1. Aposetolo edia nega lalonai edena taudia ese tomadiho momokani idia badinaia?
2. Dahaka amo tomadiho momokani taudia ita diba?
3, 4. (a) Iesu ena guriguri herevana hegeregerena, dahaka ita gurigurilaia guna be namo? (b) Iesu ese Dirava ena ladana edena bamona ia hahelagaia?
5. (a) Dirava ena ladana ena anina be dahaka, Keristen orea dekenai? (b) Hahemauri ita abia totona, dahaka ita karaia be namo?
6. (a) Dubu orea momo ese Dirava ena ladana idia hahelagaia a? (b) Taunimanima haida ese Dirava ena ladana idia gwauraia hedinarai a?
7. Iesu be edena bamona ia hahedinaraia Dirava ena basileia be gau badana?
8. Iesu ia gwau iena orea taudia momokanidia be dahaka sivarai do idia harorolaia badabada, inai “dina gabedia” lalodiai?
9. Edena taudia be Basileia ena sivarai idia harorolaia noho?
10. Iesu be edena bamona ia hahedinaraia Dirava ena Hereva ia matauraia?
11. Dubu orea momo ese Dirava ena Hereva Bible lalonai edena bamona idia laloa?
12. (a) Dahaka dainai ena be haida be mai edia Bible to Dirava ese edia tomadiho ia moalelaia lasi? (b) Bema dubu orea taudia idia kara dika mai edia ura danu to unai orea amo idia luludia lasi, anina be dahaka?
13. Bema tau ta ia davaria iena dubu orea ena hadibaia herevadia haida be Bible ena hereva hegeregerena lasi, dahaka ia lalohadailaia namonamo be namo?
14. (a) Tomadiho momokani ena toana ma ta be dahaka? (b) Dahaka dainai tomadiho momokani taudia be unai bamona idia karaia be gau badana?
15. (a) Dubu orea momo be momokani “tanobada ena lasi,” a? (b) Tomadiho orea ta be unai bamona a?
16. Keriso ena hahediba taudia korikoridia edia kara badana ta be dahaka?
17. Dubu orea idauidau bona edia orea taudia be unai bamona idia lalokau heheni a?
18. Iehova ena Witness taudia idia lalokau heheni a?
19. Bible be edena bamona ia hahedinaraia tomadiho momokanina tamona sibona ia noho?
20. (a) Inai buka ese ia hamomokania vadaeni edena taudia be tomadiho momokani taudia, hari inai nega lalonai? (b) Inai hereva oi abiadae a? (c) Iehova ena Witness taudia oi diba namonamo totona, dahaka oi karaia be namo?
[Picture on page 185]
Bema Iehova bona ena basileia oi herevalaia, taunimanima idia laloa oi be edena tomadiho?
[Pictures on page 186]
Bema ta ese Dirava ena Hereva ia badinaia lasi, anina be ia matauraia lasi, ani?
[Picture on page 188, 189]
Iesu ese politikol dagina ia dadaraia
[Picture on page 190]
Ai ura bada Iehova ena Witness taudia edia hebou lalodiai oi vareai