Tomadiho Maorona Oi Davaria Vadaeni A?

“Tomadiho goevana mai ena miro lasi eda Tamana Dirava vairanai be inai.”​—IAKOBO 1:27, NW.

HARI inai negai taunimanima momo ese tomadiho idia laloa maragi. Reana nega ta ta dubu idia lao, to haida mo be idia lao loulou. Reana idia laloa edia tomadiho be hegeregere idia dekediai, to idia laloa lasi tomadiho idaudia iboudiai be kerere bona sibodia edia mo be maoro.

1, 2. (a) Dahaka dainai taunimanima momo idia laloa edia tomadiho be maoro? (b) Tomadiho ita lalohadailaia neganai, dahaka ita laloa namonamo be namo?

² Unai dainai, inai henanadai, Tomadiho maorona oi davaria vadaeni a? anina tamona be inai a, Oi ura henia tomadihona oi davaria vadaeni a? Dahaka ese emu ura-heni ia havaraia? Emu famili ese a? Emu bamona ese a? Sibomu emu lalona ese a? Dirava ena lalohadai tomadiho dekenai be oi laloa namonamo vadaeni a?

Dirava Ena Lalohadai be Edena Bamona Ita Dibaia Diba?

³ Dirava ena lalohadai do ita dibaia totona, ia ese ia hahedinaraia be namo. Idaunegai bukana Baibel lalonai idia gwau Dirava ese ena lauma amo ia havaraia. (2 Timoteo 3:​16, 17) To hari buka lalonai Dirava ena hereva taunimanima iboudiai totona be momokani idia torea, eiava? Inai henanadai be edena bamona oi haerelaia, bona dahaka dainai? Emu tamana sinana be unai bamona idia laloa dainai a? Emu bamona edia lalohadai be unai a? Oi sibomu be hamomokanilaia gaudia oi tahudia vadaeni a? Hari unai gau hani oi tahudia be namo, ani?

4. Dahaka ese ia hahedinaraia Baibel mo sibona be Dirava ena amo?

⁴ Idia abia be haraga: Dirava ese taunimanima iboudiai totona ia siaia herevana be idia abia haraga diba be namo. Baibel be unai bamona a? Mani inai oi laloa: Baibel, ibounai eiava ena kahana, be gado 2,000 mai kahana ai idia halasia vadaeni. American Bible Society ia gwau lagani 10 bamona idia lao vadaeni tanobada taudia 100 100 amo 98 98 ese idia abia diba. Guinness Book of World Records ese ia herevalaia bamona, “Baibel ena momo ese buka idaudia iboudiai ta ta ena momo ena momo ia hanaia momokani.” Dirava ese bese idauidau iboudiai totona ia siaia herevana be unai bamona idia gaukaralaia be hoa gauna lasi. (Apokalupo 14:6 itaia.) Buka ta sivaraina be Baibel sivaraina ida ia hegeregere lasi.

5. Baibel lalonai be sivarai momokanidia; dahaka dainai unai be mai anina bada?

⁵ Sivarai momokanidia: Baibel ena sivarai bema ita tahudia namonamo, ia bona buka helaga idia gwauraidia gaudia oredia edia idau be ia hedinarai. Baibel ena sivarai be momokani; idia be ita hamomokanidia diba lasi goridia lasi. Loea ta ladana Irwin Linton, kota lalonai hereva hamomokanidia daladia ia diba tauna, be ia gwau: “Gori bona sivarai koikoidia idia herevalaidia taudia idia gwau idia sivarailaidia gaudia be gabu daudaudia ai idia vara, bona idia vara negadia idia gwauraidia goevagoeva lasi, . . . to Baibel lalonai idia sivarailaidia gaudia idia vara negadia bona gabudia be idia gwauraidia goevagoeva.” (Haheitalai haida be 1 Hanua Pavapavadia 14:25; Isaia 36:1; Luka 3:​1, 2 ai itadia.) Unai be mai anina bada, tomadiho lalonai hereva momokani idia tahudia taudia dekediai.

6. (a) Baibel ese taunimanima edena bamona ia durudia, hekwakwanai do idia haheaukalaidia totona? (b) Dahaka dala toi amo ia durudia, hekwarahi do idia haheaukalaidia totona?

⁶ Namo ia havaraia: Baibel idia tahua namonamo taudia be idia diba haraga ena hahegani bona ena hahekau herevadia idia toredia be hadikadia totona lasi. To, unai hereva ese mauri dalana ta idia gwauraia, idia badinaia taudia ese namo idia davaria. (Isaia 48:​17, 18) Lalohisihisi taudia edia lalodia ia hagoadadia, anina lasi herevadia amo lasi, to inai dala toi amo ia durudia, mauri ena hekwarahi idauidau do idia haheaukalaidia totona: (1) hekwarahi kara henidia daladia ia sisibalaidia namonamo, (2) Iehova ese ena hesiai taudia ia henidia heduruna abia dalana ia gwauraia, bona (3) nega vaira namona, Dirava ese do ia havaraia ena hesiai idia lao henia taudia edia, be ia gwauraia hedinarai bona Iena gwauhamata abidadama henidia karana ena badina korikoridia ia gwauraidia.

7. (a) Futnout ai idia noho siridia amo, Baibel ena sisiba hari inai nega ena hekwakwanai badadia ta dekenai be oi gwauraia. (b) Baibel ese ita ia naria dalana o lalo-hekwarahi do ita haheaukalaia totona ita ia durua dalana be oi gwauraia.

⁷ Ena be lebulebu taudia momo ese Baibel ena sisiba idia moalelaia lasi, to gabeai idia momo idia lalo-parara edia kara amo moale korikori idia davaria lasi. (Galatia 6:​7, 8) Baibel ese natu be sinadia edia bogadia ai hamasedia karana, headava hadokoa karana, bona tatau ese tatau idia sihari henidia karana ia sisibalaidia goevagoeva. Ena sisiba ese idia badinaia taudia ia naridia, drag o kekero muramuradia do idia iusilaidia kerere lasi totona, bona AIDS be rara mirona amo o matabodaga karadia amo do idia abia lasi totona. Famili lalonai moale havaraia dalana ia gwauraia. Ena sisiba dainai, ta ese ena famili taudia edia hedadarai, gorere metaudia, bona ena lalokau tauna ena mase, bona lalo-hekwarahi unai bamodia ma haida ia haheaukalaidia diba. Ita ia durua, ita tahudia guna gaudia do ita lalo-pararalaidia totona; unai dainai eda mauri be do mai anina bada, lalohisihisi ai idia honu lasi.a

8, 9. (a) Dahaka peroveta herevana be oi laloa bada, badina be oi laloa ia hamomokania Dirava ese Baibel ia havaraia? (b) Baibel ena peroveta herevadia ese idia hamomokania idia be daika ena amo?

⁸ Peroveta herevadia: Baibel mo sibona ese nega vairai do idia vara gaudia ia gwauraidia goevagoeva. Turo hadikaia ore karana, Babulono ena moru, Ierusalem haginia lou karana, Media bona Parasa bona Greece edia pavapava edia toreisi bona edia moru be ia gwauraidia guna, bona Iesu Keriso ena mauri lalonai idia vara gaudia momo danu. Ia ese danu hari inai negai idia vara gaudia ia gwauraidia goevagoeva guna, bona edia anina danu. Taunimanima edia gavamani idia hadareredia hekwakwanaidia haoredia dalana be ia ese ia gwauraia, bona maino bona noho namo momokani do ia havaraia Lohiana ia duanaia danu.b​—Isaia 9:​6, 7; 11:​1-5, 9; 53:​4-6.

⁹ Baibel ia gwau idia do vara lasi gaudia gwauraidia guna siahuna be Dirava korikorina ena toana ta. (Isaia 41:1–46:13) Ia gwauraidia diba o haida ia rohedia diba do idia gwauraidia totona Tauna be mauri lasi kaivakukuna ta lasi. Ia be taunimanima namona ta mo lasi. Ia be Dirava momokanina, bona unai peroveta herevadia bukana be iena Hereva.​—1 Tesalonika 2:13.

Baibel Idia Gaukaralaia Taudia Iboudiai be Idia Maoro A?

¹⁰ Bema ta ia laloa tomadiho oreadia, Baibel idia gaukaralaia bona ena hereva idia gwauraidia oreadia, iboudiai be tomadiho momokani idia hahedibalaia bona idia badinaia, iena lalohadai be maoro bona Baibel ena hereva hegeregerena, eiava?

10, 11. Iesu ese ia hahedinaraia bamona, ena be haroro tauna ta be Baibel ia gaukaralaia reana, to dahaka ese ena tomadiho be anina lasi gauna ai ia halaoa reana?

¹¹ Haroro taudia momo, ena be idia be mai edia Baibel, to tomadiho amo sibodia idia abia isi. Hereva momokanidia be taunimanima edia hereva amo idia hagagevadia. Dirava ese edia tomadiho ia abia dae a? Tomadiho gunalaia taudia, Iesu ena negai Ierusalem ai unai bamona idia karaia, be ia ese ia gwauraidia neganai, Dirava ese Isaia ena amo ia halasia herevana ia gwauraia, ia gwau: “Inai bese taudia edia uduna sibona idia hanamoa lau, to edia lalona be daudau masemase. Idia tomadiho lau dekenai, to anina lasi. Idia edia hadibaia hereva be taunimanima edia taravatu mo.” (Mataio 15:​8, 9; 23:​5-10) Momokani, unai bamona tomadihona be tomadiho momokanina lasi.

12, 13. (a) Tomadiho oreana ta taudia edia kara dainai edena bamona do ita diba edia tomadiho be maoro eiava lasi? (b) Dirava ese ia dadaraidia taudia bema ita bamodia, iseda tomadiho be edena bamona do ia laloa? (2 Sisiga 19:2)

¹² Bema tomadiho oreadia haida edia hahediba herevadia edia huahua, unai orea lalodiai idia be mai edia lada namodia taudia edia mauri lalodiai idia hedinarai gaudia, bema idia dika, be edena bamona? Iesu ia gwau: “Umui naria namonamo, peroveta koikoi taudia garina. . . . Edia kara toana dekena amo do umui diba. . . . Au namona ena huahua be ia namo, to au dikana ena huahua be ia dika.” (Mataio 7:​15-17) Momokani, orea taudia ta ta be reana do idia kara dika bena matahakani do idia abia be namo. To unai be idau, bona orea taudia, haroro taudia danu, bema idia heudahanai, o idia heatu, o idia inuinu kekero, o idia mataganigani, o idia koikoi, o babalau karadia idia karaia, o kaivakuku idia tomadiho henidia, to idia matahakani henidia lasi, bona unai kara bema idia karaia noho to kongregesen amo idia atodia siri lasi, unai be ma idau. Baibel ia hereva goevagoeva kongregesen amo do idia atodia siri be namo; Dirava ena Basileia do idia davaria lasi. (Galatia 5:​19-21) Dirava ese edia tomadiho ia moalelaia lasi, bona ia dadaraidia taudia bema ita bamodia, eda tomadiho danu do ia moalelaia lasi.​—1 Korinto 5:​11-13; 6:​9, 10; Apokalupo 21:8.

¹³ Ia hedinarai goevagoeva idia gwau Baibel idia gaukaralaia oreadia haida ese tomadiho momokanina, Baibel ese ia gwauraia gauna, be idia badinaia lasi. Vadaeni, ia gwau tomadiho momokani ena toana be dahaka dahaka?

Tomadiho Momokanina Ena Toana

¹⁴ Ena hahediba herevadia be Buka Helaga amo. “Buka Helaga ena hereva ibounai be Dirava ena Lauma ese ia havaraia. Bona inai hereva be mai ena siahu, hereva momokani ita dekenai do ia hadibaia.” (2 Timoteo 3:16) To edena Baibel siridia ese Kerisendom ena Toi Tamona Diravana eiava tauanina ena mase amo ia roho mauri laumana herevadia idia gwauraidia? Haroro tauna ta oi noia vadaeni unai hereva be emu Baibel lalonai oi do ia hahedinarai henia a? The New Encyclopædia Britannica ia gwau: “Inai hereva, Toi Tamona, . . . be Taravatu Matamatana lalonai idia hedinarai lasi.” Bona New Catholic Encyclopedia ia gwau: “Dubu oreana ena toretore taudia aposetolo edia nega murinai be unai bamona hahediba herevana idia lalohadailaia lasi.” Bona Kerisendom ena hereva, mase neganai tauanina ia rakatania laumana herevana, be ena tomadiho hahedibalaia taudia ese idia gwauraia, idia gwau unai be Greek taudia edia lalohadai amo idia abia. To tomadiho momokanina ese Baibel ena hereva momokani ia atoa siri lasi, taunimanima edia aonega herevadia abidia dae totona.​—Genese 2:7; Deuteronomi 6:4; Esekiel 18:4; Ioane 14:28.

15. (a) Ia mo sibona do ita tomadiho henia be maoro Tauna be Baibel ese edena bamona ia duanaia? (b) Tomadiho momokani taudia ese Dirava dekenai raka kahirakahira karana edena bamona idia laloa?

¹⁵ Tomadiho momokanina ese taunimanima ia haduadia, Dirava momokanina tamona, Iehova, mo do idia tomadiho henia. (Deuteronomi 4:35; Ioane 17:3) Iesu Keriso ese Deuteronomi 5:​9 bona 6:13 edia anina ia gwauraia, ia gwau: “Iehova, emu Dirava do oi tomadiho henia, ia mo sibona ena hesiai do oi lao henia.” (Mataio 4:​10, NW) Unai hegeregerena, Iesu ese ena Tamana ena ladana be ena hahediba taudia ia hadibalaidia. (Ioane 17:26) Emu tomadiho ese oi ia hadibaia Iehova do oi tomadiho henia, a? Ia bona ena palani bona ena gaukara bona ena kara be oi diba dainai, oi laloa ia dekenai oi raka kahirakahira lao diba a? Bema emu tomadiho be momokani, emu haere be oibe.​—Luka 10:22; 1 Ioane 5:14.

16. Keriso abidadama henia anina be dahaka, tomadiho momokani idia badinaia taudia dekediai?

¹⁶ Dirava ese ia moalelaia tomadihona ena kahana badana be Iena Natuna, Iesu Keriso, abidadama henia karana. (Ioane 3:36; Kara 4:12) Ta ia abia dae ia be guna ia noho o ia be tau hereadaena ta, be hegeregere lasi. Namona be ia ese danu Baibel ena hereva hegeregerena ia abia dae Iesu ese ena mauri goevadaena ia bouboulaia be mai anina bada bona hari ia be guba ai ia pavapava noho. (Salamo 2:​6-8; Ioane 3:16; Apokalupo 12:10) Bema hari oi ese tomadiho momokanina idia badinaia taudia oi bamodia, oi diba dina dina iboudiai Iesu idia kamonai henia toho, ena kara idia tohotohoa toho, bona ena hahediba taudia ia henidia gaukarana be idia karaia toho, mai edia goada ida. (Mataio 28:​19, 20; Ioane 15:14; 1 Petero 2:21) Idia ida umui tomadiho taudia bema idia be unai bamona lasi, idau gabu oi tahua be namo.

17. Dahaka dainai tomadiho momokani taudia idia naria namonamo, tanobada ese do ia hamirodia garina, bona unai edia kara anina be dahaka?

¹⁷ Tomadiho momokanina be politik bona tanobada ena hepapahuahu ese idia hamiroa lasi. (Iakobo 1:27) Badina be Iesu ese ena orea taudia ia gwauraidia, ia gwau: “Idia be tanobada ena lasi, lau hegeregerena, lau be tanobada ena lasi.” (Ioane 17:16) Iesu be politik ai ia vareai lasi, bona ena orea taudia ia koudia, tuari gaudia do idia gaukaralaidia lasi. (Mataio 26:52) Dirava ena Hereva idia abia dae taudia be ‘tuari daladia idia dibadia lou lasi.’ (Isaia 2:​2-4) Bema emu tomadiho be unai bamona lasi, hari do oi rakatania be namo.​—Iakobo 4:4; Apokalupo 18:​4, 5.

18. (a) Ioane 13:35 ese ia hahedinaraia tomadiho momokanina ena toana badana be dahaka? (b) Ta be edena bamona do oi durua diba bena do ia diba edena orea taudia ese Ioane 13:35 idia badinaia?

¹⁸ Tomadiho momokanina ese sibona ena namo ia tahua lasi lalokauna ia hahedibalaia bona ia badinaia. (Ioane 13:35; 1 Ioane 3:​10-12) Unai lalokau be idia harorolaia sibona lasi, to ia ese bese idauidau taudia, gado idauidau taudia, taga taudia bona ogogami taudia danu, be edia orea lalonai ia hatamonadia momokani. (Apokalupo 7:​9, 10) Ia dainai Keristen momokani taudia be idau, tanobada hegeregerena lasi. Bema oi do lao lasi, mani edia Kingdom Hall ai edia hebou ai oi vareai, o edia hebouhebou badadia ai oi vareai. Edia Kingdom Hall ta haginia gaukarana ai idia gaukara hebou neganai oi itadia. Burukadia (vabu danu) bona memero kekeni (ihareha danu) idia kara henidia dalana oi itaia. (Iakobo 1:27) Edia kara bona idau tomadihodia ai oi itadia karadia edia idau oi laloa. Bena sibomu oi henanadai, ‘Daidia ese tomadiho momokanina idia badinaia?’

19. (a) Tomadiho momokanina ese ia hahedinaraia dahaka ese hekwakwanai do ia haoredia? (b) Tomadiho momokani oreana taudia be dahaka idia karaia noho be namo?

¹⁹ Tomadiho momokanina ese ia hahedinaraia Dirava ena Basileia ese taunimanima edia hekwakwanai do ia haoredia vaitani. (Daniel 2:44; 7:​13, 14; 2 Petero 3:13; Apokalupo 21:​4, 5) Kerisendom ena tomadiho oreadia haida be unai bamona idia karaia a? Edena negai haroro tauna ta oi kamonai, Dirava ena Basileia ese do ia karadia gaudia be Baibel amo ia harorolaidia? Emu tomadiho oreana ese oi ia hagoadaia Dirava ena Basileia do oi herevalaia totona a, bona orea taudia iboudiai be unai bamona idia karaia, a? Iesu bona ena hahediba taudia ginigunadia be unai bamona idia haroro. Oi danu be unai gaukara oi karaia diba. Ia be mai anina bada, taunimanima ese hari inai negai idia karadia gaukaradia iboudiai ia hereadia.​—Mataio 24:14.

20. Namona be tomadiho momokani ita diba mo sibona lasi, to dahaka danu do ita karaia be namo?

²⁰ Ena be tomadiho idauidau daha daha idia noho, to Baibel ese ita ia durua haraga, momokanina do ita diba totona. To ita diba sibona be hegeregere lasi. Namona be do ita badinaia danu. Unai ena anina be hereva gabena ai do ai herevalaia.

[Footnotes]

Edena Bamona Do Oi Haere?

◻ Tomadiho maorona dibaia neganai, daika ena lalohadai be mai anina bada?

◻ Dahaka gau hani ese idia hamomokania Baibel be Dirava ena Hereva?

◻ Dahaka dainai Baibel idia gaukaralaia tomadiho oreadia momo be Dirava ese ia dadaraidia?

◻ Tomadiho maorona tamona ena toana 6 be dahaka dahaka?

3. (a) Dirava ena lalohadai do ita dibaia totona, ia be dahaka ia karaia be namo? (b) Siboda eda lalohadai Baibel dekenai be edena bamona ita henanadailaia be namo?

14. (a) Tomadiho momokanina ena hereva iboudiai edia badina be dahaka? (b) Kerisendom ena hereva, Dirava bona lauma herevadia unai, be unai bamona herevadia a?

[Box on page 10]

Iehova ena Witness taudia . . .

◆ Edia hahediba herevadia iboudiai be Baibel amo.

◆ Dirava momokanina tamona, Iehova, idia tomadiho henia.

◆ Edia abidadama Iesu dekenai hegeregerena idia noho.

◆ Politik, heai, bona tuari ai idia vareai lasi.

◆ Dina iboudiai lalokau idia hahedinaraia toho.

◆ Idia gwau Dirava ena Basileia ese hekwakwanai do ia haoredia ela bona hanaihanai.

[Picture on page 9]

BAIBEL—dahaka ese ia hahedinaraia ia be Dirava ena hereva taunimanima iboudiai totona?