Vara Lou

Anina: Ta ia vara lou anina be ranu lalonai ia bapatiso (‘ranu amo ia vara’) bona Dirava ena lauma ese ia havaraia (‘Lauma Helaga amo ia vara’), unai amo Dirava ena natuna ta ai ia lao bona ena helaro be gabeai Dirava ena Basileia lalonai do ia vareai. (Ioane 3⁠:​3-5) Iesu ia vara lou, bona guba Basileiana lalonai ia ida do idia noho hebou taudia 144,000 danu idia vara lou.

Dahaka dainai Keristen taudia haida idia vara lou be mai anina?

Dirava ena palani be, taunimanima haida mai edia kamonai be Iesu Keriso ida guba Basileiana lalonai do idia noho hebou

Luka 12:32: “Orea maragi e, umui gari lasi, badina emui Tamana ese ia hereva vadaeni Basileia do ia henia umui dekenai.”

Apok. 14:​1-3: “Ma lau itaia, Mamoe ena Natuna be Siona ororo dekenai ia gini. Ia danu be taunimanima 144,000 idia gini . . . Dirava ese unai taudia tanobada dekena amo ia hamauria.” (Rau 151-2 itaia, inai sinado “Guba” henunai.)

Taunimanima mai edia hidio bona mai edia rara be guba dekenai idia lao diba lasi

1 Kor. 15:50: “Lauegu varavara taudia e, lauegu hereva ena anina be inai: tauanina bona rara ese Dirava ena Basileia do idia abia diba lasi. Bona mase tauna danu ese mase diba lasi taudia edia mauri ia abia diba lasi.”

Ioane 3:6: “Tauanina dekena amo ia vara gauna be tauanina, Lauma Helaga dekena amo ia vara gauna be lauma.”

Idia “vara lou” taudia, Dirava ena natudia ai idia lao taudia, sibodia be guba Basileiana lalonai idia vareai diba

Ioane 1:​12, 13: “To ia [Iesu Keriso] idia abia dae taudia dekenai siahu ia henia, idia be Dirava ena natudia totona. Badina be iena ladana idia abidadama henia taudia be unai. Dirava ena natuna idia vara, be headava ena kara dekena amo idia vara bamona lasi, idia be tanobada tamana dekena amo idia vara lasi. Dirava sibona be idia edia Tamana.” (“Ia idia abia dae taudia” be Keriso idia abidadama henia taudia iboudiai lasi. Joh 1Siri 11 ese ia hahedinaraia hegeregerena Ioane ese Iesu “ena bese taudia,” Iuda taudia, ia herevalaidia unai. Keriso ese dala ia kehoa idau bese taudia edia danu, unai dagi do idia abia diba totona, to unai dagi idia abia taudia be “orea maragi” sibona.)

Roma 8:​16, 17: “Dirava ena Lauma bona iseda laumadia danu idia hereva hebou, idia gwauraia ita be Dirava ena natuna. Ita be Dirava ena natuna dainai, ita ese iena bese taudia do idia abia hanamoa gauna be ita danu do ita abia, bona Dirava ese Keriso ia henia hanamoa gauna do ita abia danu. Badina bema Keriso danu ita hisihisi nega tamona, be ia danu iena hairaina do ita abia nega tamona.”

1 Pet. 1:​3, 4: “Dirava, iseda Lohiabada Iesu Keriso ena Tamana do ita hanamoa bada. Iena bogahisihisi ia bada herea. Ia ese Iesu Keriso mase dekena amo ia hatorea isi lou. Bona unai dainai ita be matamata vadaeni, ita vara lou. Vadaeni mauri korikori ena ura namona laloa ese iseda lalona ia hahonua. Dirava ese ita ia abia hidi, guba dekenai mauri do ita abia. Inai mauri ia noho hanaihanai, ia be goevagoeva, ia bodaga diba lasi. Inai mauri be guba dekenai umui totona ia noho hegaegae.”

Guba dekenai dahaka do idia karaia?

Apok. 20:6: “Idia be Dirava bona Keriso edia boubou helaga karaia taudia. Bona lagani 1,000 lalonai Keriso danu do idia lohia.”

1 Kor. 6:2: “Umui diba lasi, a, dina ta Keriso ena taudia ese inai tanobada do idia kota henia?”

Dirava ese idia “vara lou” lasi taudia do ia hamauridia, a?

Apok. 7:​9, 10, 17: “[“Vara lou” taudia, Roma 2⁠:​28, 29 bona Galatia 3⁠:​26-29 ese idia gwauraidia taudia, lauma Israel taudia ai do idia lao bona Keriso ida guba dekenai do idia noho taudia unai, edia momo be aposetolo Ioane ese ia kamonai murinai, ia gwau:] Inai murinai lauegu matana lau negea, hutuma bada herea lau itaia, duahia diba lasi. Idia be bese idauidau, iduhu idauidau, kopina idauidau, bona gado idauidau. Idia ibounai be helai gabuna badana vairanai bona Mamoe ena Natuna vairanai idia gini. Edia dabua be kurokuro, bona edia imana dekenai niu rauna idia dogoatao. Idia boiboi badabada, idia gwau, ‘Taunimanima hamauria siahuna be iseda Dirava ena, helai gabu badana dekenai ia helai Diravana. Inai siahu be Mamoe ena Natuna ena danu.’ . . . ‘Badina be Mamoe ena Natuna [Iesu Keriso], helai gabuna badana ena huanai ia noho, ese idia do ia naria. Ia ese mauri ranuna, ia lohilohi gauna, dekenai idia do ia hakaua lao.’ ”

Sal. 37:29: “Kara maoromaoro taudia ese tano bae abia, bae noholaia hanaihanai.”

Apok. 21:​3, 4: “Harihari Dirava ena noho gabuna be taunimanima edia huanai do ia noho, bona idia be iena bese taudia do idia lao. Dirava be idia danu do ia noho, bona ia be edia Dirava do ia lao. Ia ese matana ranu ibounai edia matana dekena amo do ia dahua. Mase bona lalohisihisi, bona taitai, bona hisihisi be do idia ore momokani. Badina be gau gunadia be idia ore vadaeni.”

Ena be ta ia “vara lou” lasi, to Dirava ena lauma ia abia diba, a?

Iehova ena aneru ese Ioane Bapatiso inai bamona ia herevalaia, ia gwau: “Ena sinana bogana dekenai ia noho neganai Lauma Helaga ese do ia abia.” (Luka 1⁠:15) Gabeai Iesu ia gwau: “Hahine edia bogana dekena amo idia vara taudia ibounai be ta ese Ioane ia hanaia lasi, to Guba Basileia lalonai, tau maragina ese Ioane ia hanaia.” (Mat. 11⁠:11) Badina be dahaka? Badina be Ioane be guba dekenai do ia lao lasi, unai dainai ia “vara lou” be anina lasi.

Iehova ena lauma ese David ia “rohea badabada,” bona ena ‘uduna amo ia hereva’ (1 Sam. 16⁠:13; 2 Sam. 23⁠:⁠2), to Baibel ena hereva ta ia gwau lasi David ia “vara lou.” Ia “vara lou” be anina lasi, badina Kara 2⁠:34 ia gwau: “Davida ia daekau lasi guba dekenai.”

Hari inai negai dahaka ese ia hahedinaraia ta ese Dirava ena lauma ia abia vadaeni?

Rau 258 itaia, inai sinado badana “Lauma” henunai.

Bema Ta Ia Gwau​—⁠

‘Lau vara lou vadaeni’

Reana inai bamona oi haere henia diba: ‘Oiemu helaro be gabeai Keriso ida guba dekenai do umui noho hebou, ani? . . . Guba dekenai idia lao taudia ese dahaka do idia karaia? Nega ta oiemu lalona dekenai unai bamona oi henanadai, a?’ Bena reana ma oi gwau: (1) ‘Idia be pavapava bona hahelaga taudia ai do idia lao bona Keriso ida do idia lohia hebou. (Apok. 20⁠:6; 5⁠:​9, 10) Iesu ia gwau idia be “orea maragi” sibona. (Luka 12⁠:32)’ (2) ‘Bema idia be pavapava ai do idia lao, idia ese daidia do idia lohiadia? . . . Inai Baibel siridia ese lau idia durua unai lau diba totona. (Sal. 37:11, 29; Her. 2⁠:​21, 22)’

‘Oi vara lou vadaeni a?’

Reana inai bamona oi haere henia diba: ‘Lau davaria taunimanima be mai edia lalohadai idauidau “vara lou” dekenai. Mani lau oi hamaoroa, “vara lou” ena anina oi dekenai be dahaka?’

Eiava inai bamona oi hereva diba: ‘Oi ura diba Iesu lau abia dae lauegu Hahemauri Tauna, bona lauma helaga lau abia eiava, ani? Lauegu haere be, Oibe; bema unai bamona lasi, hari lau be Iesu lau herevalaia lasi oi dekenai.’ Bena reana ma oi gwau: (1) ‘To lau itaia taunimanima momo idia gwau idia be Keristen taudia, to edia kara amo idia hamomokania lasi Dirava ena lauma helaga idia abia. (Gal. 5⁠:​22, 23)’ (2) ‘Bema taunimanima iboudiai ese unai kara namodia idia hahedinaraia, tanobada nohona do oi moalelaia, a? (Sal. 37⁠:​10, 11)’

Ma haere ta: ‘Bema oiemu henanadai ena anina be, “Lau ese Keriso lau abia dae lauegu Hahemauri Tauna eiava?” lauegu haere be, Oibe. Iehova ena Witness taudia iboudiai be unai bamona idia karaia vadaeni. To ai dekenai inai hereva “vara lou” be mai ena anina ma ta danu.’ Bena reana ma oi gwau: (1) ‘Iesu ese “vara lou” ia gwauraia neganai, ia gwau idia vara lou taudia sibodia be Dirava ena Basileia lalonai do idia vareai; anina be idia sibodia be iena guba gavamani taudia ai do idia lao. (Ioane 3⁠:⁠5)’ (2) ‘Baibel ese danu ia hahedinaraia, Dirava ena ura idia karaia taudia hutuma be tanobada ai do idia noho, unai Basileia ena siahu henunai. (Mat. 6⁠:10; Sal. 37⁠:29)’

Ma dala ta: Guba oreana taudia be inai bamona idia haere diba: ‘Oibe, lau vara lou. To Baibel ia gwau namona be ita ibounai ese iseda dagi ita heagilaia lasi, to ita laloa namonamo do ita moru garina. Namona be ita sibona eda lalohadai bona eda kara ita tahua namonamo, unai amo do ita diba ita ese Dirava bona Keriso edia ura ita dekenai ita badinaia eiava lasi. (1 Kor. 10⁠:12)’ Bena reana ma oi gwau: ‘Iesu ese dahaka gaukara iena hahediba taudia korikoridia ia henidia? (Mat. 28⁠:​19, 20; 1 Kor. 9⁠:16)’