Daidia be Vara Lou Taudia?

TAUNIMANIMA namodia iboudiai be guba dekenai idia lao, a? Taunimanima momo be unai bamona idia laloa, to Iesu Keriso ese unai ia hamomokania lasi. Iuda edia lohia tauna Nikodemo be hanuaboi ai hehuni dalana ai Iesu dekenai ia lao, bona Iesu ese ia hereva henia, ia gwau: “Tau ta lasi guba dekenai ia daekau vadaeni.”​—Ioane 3:13.

To, Iesu be Nikodemo dekenai ia hahedinaraia nega do ia vara bena haida be guba Basileia dekenai do idia vareai diba. Iesu ese unai Basileia vareai dalana ia gwauraia hedinarai, ia gwau: “Lauma Helaga dekena amo bema ia vara lasi, ia be Dirava ena Basileia lalonai do ia vareai diba lasi. Tauanina dekena amo ia vara gauna be tauanina, Lauma Helaga dekena amo ia vara gauna be lauma. Lauegu hereva dekenai oi hoa lasi, lau gwau do oi vara lou.” To Nikodemo ia laloa edena bamona ta be do ia vara lou diba.​—Ioane 3:​1-9.

Reana oi danu Iesu ena hereva ena anina oi daradaralaia. Iena hereva ena anina be hari idia gwau edia mauri idia haidaua haraga bona idia laloa Dirava ena lauma helaga amo idia honu taudia ia gwauraidia, eiava?

Kudou Ena Ura bona Lalohadai

Haida idia gwau ta ia vara lou totona gau badana be lauma helaga ena siahu ia mamia guna. To iseda kudouna bona lalona ese ita idia hakaua kerere diba, hegeregere bema iseda kudou ena ura ia bada momokani neganai.​—Ieremia 17:9.

Kudou ena ura bona lalohadai ia tahua tauna, William Sargant, ia gwau, namona be “ita naria namonamo iseda kudou ena ura bada amo gau haida ita abidadama henia, to iseda harana ena lalohadai ese ita ia koia.” Sargant ia gwau, haheitalai ta be haroro goadagoada amo taunimanima idia hasiahua idia tomadiho totona bona hel ena lahi idia harorolaia taunimanima idia hagaridia totona. Bema hisihisi hanaihanai bona taunimanima be do idia vara lou bona guba dekenai idia lao daladia rua sibona idia noho, iboudiai do idia ura guba dekenai idia lao, ani? Sargant ia gwau lalo-hekwarahi ia bada dainai, “kara ta ena badina ia laloa namonamo lasi, harana ena lalohadai be ia hadikaia bamona, bona lalohadai idaudia bona matamatadia be ia abidia dae kava sibona.”​—The Mind Possessed.

Unai dainai, ta be edena bamona do ia diba vara lou ena hahediba ia “abia dae kava?” Dirava ena lauma helaga ese Bible idia torea taudia ia hasiahudia unai dainai aonega dalana momokani be gau ibounai Bible dekenai ita badinaia. Bible ese Keristen taudia ia hagoadadia ‘mai edia lalohadai siahuna namona amo’ Dirava do idia tomadiho henia totona, bona namona be idia diba idia abidadama henia gaudia be idia momokani.​—Roma 12:​1, 2; 1 Tesalonika 5:21.

Vara lou karana be hahenamo badana ta tanobada taudia dekenai. Unai be Dirava ena ura habadaia karana namona ta. Ena be unai ibounai ia momokani, to henanadai haida idia vara, hegeregere: Daidia be vara lou taudia? Edena bamona unai ia vara diba? Unai taudia dekenai dahaka do ia vara? Idia sibodia be do idia mauri, a?

[Picture on page 3]

Nikodemo ia laloa daradara edena bamona ta do ia vara lou diba