Nihi

Anina: Ta ia mahuta neganai ia laloa gaudia o ena lalona dekenai ia itaia gaudia. Baibel ese ia gwauraidia nihidia idauidau be inai: nihi kava, Dirava ese ia henia nihidia, bona babalau dainai idia vara nihidia.​—⁠Iobu 20:8; Num. 12:6; Sek. 10:2.

Taunimanima edia nihi hari inai negai be mai anina, a?

Nihi edia badina idia tahua taudia ese dahaka idia davaria?

The World Book Encyclopedia (1984, Vol. 5, p. 279) ia gwau: “Taunimanima iboudiai idia nihi.” “Taunimanima badadia momo be hora 8 lalodiai idia mahuta neganai, miniti 100 lalodiai idia nihi.” Unai dainai nihi be taunimanima edia kara korikori ta.

Doketa Allan Hobson, Harvard Medical School tauna, ia gwau: “Ta ese taunimanima edia nihi edia anina be dala idauidau amo ia gwauraidia diba. Ia nihi tauna ena lalohadai hegeregerena ena nihi ena anina ia gwauraia diba, to ena nihi be anina momokani lasi.” The New York Times magasin ese unai doketa ena hereva ia ripotilaia neganai, ma ia gwau: “Taunimanima edia nihi be mai anina korikori herevana be saiens taudia haida ese idia gorea mai edia goada ida.”​—⁠July 10, 1984, p. C12.

Taunimanima haida idia laloa nihi haida amo diba idauna idia abia; unai bamona nihi be Dirava ena amo eiava?

Ier. 29:​8, 9: “Iehova Sabaota . . . na ini e gwau tomamu: Emui peroveta taudia bona emui bagu-haoro taudia bogaragimui ai e nohomu ese basie koimui, bona edia nihi sivaraidia basio kamonai; badina be idia ese e hereva koikoi henimuimu lau ladagu ai; lau ese asina siaidia. Iehova na e herevamu.”

Harper’s Bible Dictionary ia gwau: “Babulono taudia ese nihi idia abidadama henidia bada dainai, mai anina bada gaudia idia lalohadailaia gwauraia neganai, dubu lalodiai idia mahuta, badina idia laloa unuseniai sisiba herevadia do idia kamonai. Greek taudia be gorere hanamoa daladia sisibalaia herevadia idia tahua neganai, edia dirava ta ladana Aesculapius [ena laulau be gaigai] ena dubu lalonai idia mahuta, bona Roma taudia be edia dirava ta ladana Serapis [nega haida gaigai amo idia laulaulaia] ena dubu lalonai idia mahuta. Aigupito taudia ese buka mai edia hereva idauidau momo idia toredia, nihi edia anina idia hahedinaraia totona.”​—⁠(New York, 1961), Madeleine Miller and J. Lane Miller, p. 141.

Gunaguna, nihi amo Dirava ese ena orea taudia ia sisiba henidia, ia hadibadia, bona gabeai do idia vara gaudia ia hahedinarai henidia, to hari inai negai unai dala amo iena orea taudia ia hakaudia noho, a?

Unai bamona nihi, Dirava ena amo idia mai gaudia, idia gwauraidia siridia be inai: Mataio 2:​13, 19, 20; 1 Hanua Pavapavadia 3:​5; Genese 40:​1-8.

Heb. 1:​1, 2: “Idaunegai Dirava ese dala idauidau momo [nihi danu] dekena amo iseda sene taudia dekenai ia hereva henidia, peroveta taudia dekena amo. To inai dina dokodia neganai ia ese iena Natuna dekena amo ita ia hereva henia.” (Ena Natuna Iesu Keriso ena hahediba herevadia be Baibel lalonai idia torea.)

1 Kor. 13:8: “Peroveta hereva be do idia ore.” Nega haida Dirava ese nihi amo peroveta herevadia iena hesiai taudia ia hadibalaidia.

2 Tim. 3:​16, 17: “Buka Helaga ena hereva ibounai be Dirava ena Lauma ese ia havaraia. Bona inai hereva be mai ena siahu, hereva momokani ita dekenai do ia hadibaia. . . . Unai hereva momokani dainai Dirava ena tau ena goada be hegeregere momokani, vadaeni kara namodia ibounai do ia karaia diba mai kwalimu danu.”

1 Tim. 4:1: “Lauma Helaga ese ia gwauraia hedinarai vadaeni, nega gabeai tau haida ese Iesu badinaia kara do idia rakatania, lauma koikoidia do idia kamonai henia [nega haida nihi amo idia kamonai henia], bona lauma dikadia edia hadibaia hereva do idia abia dae.”