Nihi ese Nega Vaira Idia Hahedinaraia Diba, A?

IDAUNEGA amo ema bona hari, taunimanima ese nihi idia laloa bada. Aigupito taudia ese buka idia toredia, nihi edia anina hahedinaraia totona, bona Babulonia taudia be mai edia nihi edia anina gwauraia hedinarai taudia. Greek taudia ese gorere taudia be Asclepius ena dubu lalonai idia atoa, unuseniai do idia mahuta neganai edia nihi lalodiai gorere sisibalaia herevadia do idia kamonai totona. Lagani 100 C.E. murinai ia noho tauna, Artemidorus, ese buka ta ia torea, ia lalonai nihi edia toana edia anina ia gwauraia hedinarai. Unai nega amo ema bona hari, unai bamona bukadia momo idia torea, iena buka ena hereva hegeregeredia. Ema bona hari, nihi edia anina idia gwauraia toho, to idia be momokani nega vaira gaudia idia hahedinaraia, a?

Nihi ese nega vaira ena anina idia hahedinaraia diba, badina tamona be atai siahuna ta ese ia havaradia. Dirava ese unai siahu ia henia sivaraidia momo be Baibel lalonai. Ia ese peroveta nihidia be ena hesiai taudia bona ia idia tomadiho henia lasi taudia danu ia henidia. Momokani, Iobu 33:​14-​16 ia gwau: “Hanuaboi neganai, taunimanima idia mahuta noho neganai, Dirava be nihi, bona mata hanai dekena amo ia hereva noho. . . . Iena hereva, be taunimanima dekenai ia gwauraia hedinarai noho.”

Dirava ese Aigupito ena Farao unai bamona ia kara henia. Unai be Iosepa ena negai, lagani 1,700 mai kahana idia do noho ela bona Iesu ia vara neganai. Farao ena nihi sivaraina be Genese 41:​1-7 ai, bona siri 25 ela bona 32 lalodiai, Iosepa ia gwau unai nihi ese ia hahedinaraia, lagani 7 lalodiai “Aigupito ena tano ibounai dekenai aniani momo do idia vara,” bena unai murinai hitolo bada laganidia 7 do idia ginidae. Iosepa ese Farao ia hamaoroa, ia gwau: “Dirava ia ura iena kara ta do ia karaia gwauraia. Vadaeni oi dekenai ia hamaoroa guna.” (Genese 41:28) Unai nihi ese gabeai idia vara momokani gaudia ia perovetalaia.

Babulonia taudia edia pavapava badana ta dekenai unai bamona ia vara. Nebukanesa ena nihi ta dainai ena lalona ia hekwarahi bada, to ia laloatao diba lasi. Unai dainai ena meamea taudia ia boiria, unai nihi bona ena anina do idia gwauraia hedinarai totona. To ia haganilaidia gauna be idia karaia diba lasi.​—⁠Daniela 2:​1-​11.

Dirava ese unai nihi be king ia henia dainai, Ia ese peroveta tauna Daniela ia hasiahua, unai nihi bona ena anina do ia gwauraia hedinarai. Daniela 2:​19 ia gwau: “Unai hanuaboi lalonai, mata hanai ta dekenai Dirava ese unai hunia gauna be Daniela dekenai ia hedinaraia.” Daniela ese ia hahedinaraia unai nihi be Dirava ena amo, ia gwau: “King badana e, oiemu nihi, hunia gauna, be aonega taudia bona hoa karaia taudia, bona meamea taudia ese idia hedinaraia diba lasi. To guba dekenai be Dirava ta ia noho, hunia gaudia ia hedinaraia diba. Ia ese vaira nega dekenai do idia vara gaudia be oi dekenai ia hedinaraia vadaeni.”​—⁠Daniela 2:​27, 28.

Nega haida Dirava ese ena bese taudia be nihi amo ia hagania, bona ma nega haida nihi amo ia hamaorodia ia lalo-namo henidia, eiava ia durudia dalana ia hadibaia. Iakobo dekenai, Dirava ese nihi amo ia hahedinaraia ia lalo-namo henia.​—⁠Genese 48:​3, 4.

Iosepa, gabeai Iesu ia ubua tauna, be ia diba Maria ia rogorogo neganai, ena lalona ia hadaia do ia negea. Bena nihi ta lalonai aneru ta ese ia hagania unai bamona do ia karaia lasi. Mataio 1:​20 ia gwau: “Unai bamona ia laloa noho neganai, Lohiabada ena aneru ta ese nihi dekenai ia hedinarai henia, ia gwau, ‘Iosepa Davida e, oiemu adavana Maria abia totona oi gari lasi, badina be inai mero, Maria ena bogana dekenai ia noho be, Lauma Helaga ese ia henia vadaeni.’ ” Gabeai, “Lohiabada ena aneru ese nihi dekenai Iosepa ma ia hedinarai henia, ia gwau, ‘Oi toreisi, mero maragina, iena sinana danu oi abia, Aigupito dekenai umui heau lao.’ ”​—⁠Mataio 2:​13.

Dirava Ena amo Idia Mai Lasi Nihidia

Gunaguna, Dirava ena bese lalonai idia noho lasi taudia momo ese nihi edia anina idia gwauraia hedinarai. Unai ese ia hahedinaraia ita gwau diba lasi nihi iboudiai ese nega vaira idia hahedinaraia momokani. Dirava ena peroveta tauna Ieremia ena negai, peroveta koikoi taudia ta ta idia gwau loulou: “Lau nihi vadaeni.” (Ieremia 23:25) Taunimanima idia koidia gwauraia, do idia laloa Dirava be idia edia amo ia hereva. Dirava ese Ieremia ia hasiahua, inai bamona do ia gwauraidia: “Lau, Lohiabada, Israela ena Dirava ese umui lau sisiba henia inai: Emui peroveta taudia bona emui meamea taudia, emui huanai idia noho taudia, idia gwau vaira neganai do idia vara gaudia idia diba, umui naria namonamo, idia ese umui do idia koia garina. Edia nihi edia sivarai do umui kamonai henia lasi. Idia ese egu ladana dekenai hereva koikoi umui dekenai idia gwauraia noho. . . . Lau inai Lohiabada, lau hereva vadaeni.”​—⁠Ieremia 29:​8, 9.

Unai peroveta koikoi taudia be “meamea taudia,” unai dainai lauma dikadia ese edia nihi idia havaraia diba, taunimanima koidia totona. Sekaraia 10:2 ena hereva ese unai ia hahedinaraia, ia gwau: “Meamea taudia . . . edia haere be koikoi bona kavakava sibona. . . . Nihi edia anina idia gwauraia noho, to idia ese taunimanima idia hakaua kerere.”

Diabolo be koikoi tauna badana, lagani tausen momo lalodiai tomadiho gunalaia taudia ia gaukaralaia, Ieremia bona Sekaraia edia negai idia noho peroveta taudia idia hereva bamona do idia hereva, do idia gwau Dirava ese mata hanai bona nihi amo ia hereva henidia. Dirava ena lauma amo Baibel ena hereva haida ia torea tauna, Iuda, ese Keristani taudia iena negai idia noho be ia tore henidia, ia gwau: “Haida ese umui emui orea dekenai hunia dala dekenai idia vareai vadaeni. Gunaguna Buka Helaga ia gwau unai bamona taudia be Dirava ena Kota dekenai edia kerere davana do idia davaria momokani. Idia ese Dirava idia negea. Idia ese Dirava ena hariharibada idia hadibaia kerere, edia lebulebu karadia do idia karaia diba totona. Inai taudia ese iseda Lohiabada Iesu Keriso, iseda Biaguna tamona, idia negea vadaeni.” Ma ia gwau unai taudia ese “nihi idia abia.”​—⁠Iuda 4, 8.

Edia Heagi Herevadia Tohoa

Reana tau ta ia gwau ena nihi ta lalonai Dirava ese ia hereva henia, eiava ena nihi, nega vairai do idia vara gaudia idia hahedinaraia nihidia, edia anina be gabeai idia vara, to unai sibona dainai unai tau do oi abidadama henia bona do oi badinaia kava be mai badina lasi. Inai hahegani, Mose ese Deuteronomi 13:​1-3, 5 ai Israela taudia ia torea henia, be mani oi laloa: “Sedira umui emui huanai, peroveta tauna o nihi tauna ta ia toreisi, bona toa ta o hoa karana, ia gwauraia gauna do ia vara momokani. Vadaeni sedira do ia gwau, ‘Dirava idau, umui do diba lasi diravadia, do ita tahua, bona edia hesiai gaukara do ita karaia.’ Unai bamona peroveta tauna o nihi tauna ena hereva do umui abia dae lasi. . . . To unai peroveta tauna o nihi tauna be do umui alaia mase.” Dirava ese unai bamona taudia edia hereva koikoidia ia koua lasi; unai amo ena bese taudia ia tohoa, do ia diba do idia badinaia eiava lasi.

Aonega dalana be inai: Edia nihi idaudia idia heagilaia taudia edia hereva do ita abia dae kava lasi, to do ita tohodia, ita itaia diba lasi koikoi tauna badana, “tanobada taudia ibounai ia koia noho gauna,” ese ita do ia koia garina. (Apokalupo 12:9) To edena bamona do ita tohodia namonamo diba?

Dirava ese ena Hereva, idia torea gauna, amo ita ia hakaua hereva momokani dekenai. Iesu Keriso ese ia gwauraia, ia gwau: “Oiemu hereva be hereva momokani.” (Ioane 17:17) Unai dainai 1 Ioane 4:1 dekenai Ioane ese ita be inai bamona ia sisiba henia: “Lauegu lalokau taudia e, peroveta koikoi taudia momo be tanobada kahana ibounai dekenai idia lao noho. Unai dainai, bema taunimanima idia gwau, ‘Lau be Lauma Helaga lau abia vadaeni,’ do umui naria namonamo. Idia ibounai do umui hamomokania lasi. To unai tau do umui tohoa guna, do umui davaria, Dirava ena Lauma ia abia momokani, o lasi.” Edia heagi herevadia, edia hahediba herevadia, bona edia kara be Baibel amo do ita tohoa neganai, do ita davaria idia be Baibel ena hereva hegeregeredia lasi. Dirava ena Hereva be hereva momokani hahedinaraia gauna korikorina.

Nihi tauna ia gwau ia be mai ena diba hereana, bona babalau o meamea ia gaukaralaia, a? Bema unai bamona, Dirava ena Hereva ese ia gwauraia dika. “Meamea kara do umui karaia lasi, puripuri bona vada danu do umui karaia lasi. Puripuri gaudia danu do umui gaukaralaia lasi, bona mase taudia edia laumadia dekenai do umui nanadaia lasi, bona idia danu do umui herevahereva lasi. Lohiabada, emui Dirava ese unai bamona kara bodaga idia karaia taudia ia badu henia noho.”​—⁠Deuteronomi 18:10-​12.

Bema nihi tauna ia gwau ia lalonai be soul ta, Dirava ena Hereva ia gorea unai, badina be ia gwau: “Itaia! Soul ibounai​—⁠idia be lauegu.” (Esekiela 18:​4, NW) Ia be sibona ena ladana ia abia isi bona haida ia veria ia do idia badinaia, a? Mataio 23:12 ia gwau: “Sibona ena ladana ia habadaia tauna ese ladana maragina do ia abia.” Bona Kara 20:30 ese Keristani taudia ia hadibaia, ia gwau: “Emui huanai tatau haida do idia toreisi, hereva koikoi do idia gwauraia, bona diba tahua taudia do idia hakaua kerere.”

Nihi tauna ia gwau dagedage karadia do ita karaia be namo, a? Iamesi 3:​17, 18 ese ia gwauraia dika, ia gwau: “Dirava dekena amo aonega ia abia tauna ena kara ginigunana be inai: Ia laloa goevagoeva. Ma iena kara haida be inai: Mai ena maino, laloa manada bona gado namo. Ia be mai ena bogahisihisi, bona kara namodia momo ia havaraia noho. Ia be maka tamona dekena amo taunimanima ibounai ia kara henidia, edia toana dekena amo lasi. Ma inai tau be Keristani koikoi tauna lasi. Bema maino ita karaia noho neganai, inai be uhe ita hadoa bamona. Vadaeni inai maino dekena amo, kara maoromaoro do ia vara, uhe ena anina ia tubu hegeregerena.” Politikol dagina o siahu idauna tanobada ai ia tahua, a? Dirava ena Hereva ese ia gwauraia dika momokani, ia gwau: “Bema umui ura tanobada danu umui turana karaia neganai, inai be umui ese Dirava umui tuari henia noho.” Unai amo Baibel ese koikoi gaudia ia hahedinaraia.​—⁠Iamesi 4:⁠4.

Bema ta ese ena varavara o ena turana ta ena mase ia nihilaia, reana badina be ia ese unai taunimanima ia laloa momo. Ena be ia nihilaia hanuaboina korikorina ai ia mase, to unai ese ia hamomokania lasi unai nihi be peroveta gauna. Unai bamona nihidia ta ta sibodia edia toana be edia anina idia vara momokani gaudia bamona; idia handred handred edia anina idia vara lasi.

Ena be gunaguna, Dirava ese ena Hereva, toretore gauna, ia havaraia noho lalonai, nihi ia gaukaralaidia, gabeai do idia vara gaudia hahedinaraia bona hahegani henidia totona, to hari inai negai unai bamona ia kara be mai badina lasi. Dirava ena hahegani, hari inai negai taunimanima ese idia abia be namo gaudia, iboudiai be unai Hereva lalonai idia torea vadaeni, bona ena peroveta herevadia ese nega vairai lagani tausen ta mai kahana murinai do idia vara gaudia be ia gwauraia. (2 Timoteo 3:16, 17) Unai dainai ita diba momokani, iseda nihi amo Dirava ese nega vairai do idia vara gaudia ia hahedinaraia lasi, to nihi be kwara harana ena gaukara korikorina ena anina ta, unai gaukara dainai iseda lalona idia namo noho.

[Picture on page 7]

Farao ena nihi ese gabeai do idia vara gaudia ia hahedinaraia bamona, Dirava ena Hereva ese iseda nega gabena ia hahedinaraia