Pegatori

Anina: “[Roman Katolik] Dubu Oreana ena hahediba herevana be inai: [Pegatori be] mauri gabena ena gabu ta . . . Dirava ena lalo-namo lalonai idia mase to idia do goevadae lasi taudia edia lauma be unuseni idia lao, edia kara dikadia maragidia, Dirava ese ia gwauatao lasi karadia unai, bona edia kara dikadia badadia, mase karadia, Dirava ese ia gwauatao vadaeni karadia unai, dainai panisi idia abia totona. Unai amo ia hagoevadia guna, guba dekenai idia do vareai lasi neganai.” (New Catholic Encyclopedia, 1967, Vol. XI, p. 1034) Unai hereva be Baibel ena hahediba herevana ta lasi.

Pegatori herevana be dahaka latanai idia haginia?

Katolik toretore taudia ese 2 Maccabees 12⁠:​39-45, Mataio 12⁠:​32, bona 1 Korinto 3⁠:​10-15 idia gwauraia herevadia be New Catholic Encyclopedia (1967, Vol. XI, p. 1034) ese ia gwauraia murinai, ia be ma ia gwau: “Unai hereva ibounai ai tahua namonamo neganai ai davaria gauna be inai: Katolik Dubu Oreana ena pegatori herevana be Buka Helaga ena hereva latanai idia haginia lasi, to sene herevadia latadiai idia haginia.”

“Dubu oreana be sene herevadia dekenai ia tabekau, guba bona hel padadiai ia noho gabuna herevana hamomokania totona.”​—⁠U.S. Catholic, March 1981, p. 7.

Katolik hahediba herevadia halasia taudia ese pegatori ena oromana edena bamona idia gwauraia?

“Momo idia laloa pegatori lalonai idia noho taudia idia ania hisihisina ibounai ena anina be, idia diba idia be maoromaoro Dirava ida do idia hedavari lasi, to unuseniai do idia naria guna. To momo herea edia lalohadai be, pegatori lalonai idia noho taudia ese unai idia lalohisihisilaia sibona lasi, to panisi korikori idia abia danu . . . Roman Katolik Dubu Oreana lalonai momo idia gwau unuseniai lahi korikori amo idia hahisidia. To unai lalohadai idia abia dae lasi taudia danu ese pegatori herevana idia abia dae. Ita diba momokani lasi. . . . Ena be East kahana ena tomadiho hadibalaia taudia hegeregeredia ta ese mase taudia lahi amo hahisidia karana herevana ia dadaraia, to namona be ia gwau lasi pegatori lalonai idia noho taudia ese hisihisi idia ania lasi. Lalohisihisi, lalo-metau, bona hemarai korikori ese edia lauma idia hahisidia momokani diba. . . . Namona be inai ita laloa, unai lauma be hisihisi idia ania noho lalonai idia moale bada danu, badina be idia diba momokani Dirava ese do ia hamauridia.”​—⁠New Catholic Encyclopedia (1967), Vol. XI, p. 1036, 1037.

“Dahaka be pegatori lalonai ia vara be tau ta ia diba lasi.”​—⁠U.S. Catholic, March 1981, p. 9.

Tauanina ia mase neganai souli ia mauri noho, a?

Esek. 18:​4: “Kara dika tauna laumana [soulina] na baine mase.”

Iak. 5:​20: “Bema tau ta ese kara dika tauna ia durua, vadaeni unai dika tauna ese iena dala dikana ia rakatania, unai durua tauna ese unai tau ena lauma [souli] mase dekenai amo do ia hamauria.” (Mani inai oi laloa, unai siri ese souli ena mase ia herevalaia.)

Ma anina haida tahua totona, inai sinado “Mase” bona “Souli” itaia.

Ta ia mase murinai Dirava ese ena kara dika dainai ma ia panisia lou, eiava?

Roma 6:​7: “Tau ta ia mase neganai be kara dika ese unai tau ia guia lou diba lasi.”

Mase taudia be moale ena mamina idia abia diba badina be idia diba momokani Dirava ese do ia hamauridia, a?

Koh. 9⁠:5: “Mauri taudia na dibadia do bae mase; a mase taudia na ḡau ta asi dibadia.”

Isa. 38:​18: “Mase Gabuna ese basine hanamomu diba, bona mase ese basine imodaimu diba; guri ai e dihomu taudia ese emu momokani basie laroa diba.” (Unai dainai idia ese Dirava ena hahemauri helarona idia moalelaia diba lasi, ani?)

Baibel ia gwau, Dirava ese taunimanima be edia kara dikadia amo edena bamona ia hagoevadia?

1 Ioane 1:​7, 9: “Bema diari lalonai ita raka noho, Dirava hegeregerena, ita be orea tamona taudia, bona iena Natuna Iesu ena rarana ese iseda dika ibounai do ia huria momokani. . . . Bema iseda kara dika Dirava dekenai ita gwauraia hedinarai, ia ese ita do ia negea lasi. Lasi momokani. Ia be kara maoromaoro dainai, iena gwauhamata do ia badinaia, bona iseda dika do ia gwauatao. Bona iseda kerere ibounai be do ia huria momokani.”

Apok. 1:​5: “Iesu Keriso . . . ese ita ia lalokau henia, bona iena rarana dekena amo iseda kara dika ia huria ore vadaeni.”