Baibel Oi Abidadama Henia Diba, A?

HARI inai negai danu, taunimanima momo ese Baibel idia abidadama henia. Hegeregere, vanegai sibona America taudia idia henanadai henidia neganai, idia davaria taunimanima 80 pesen idia abia dae Baibel be Dirava ena lauma amo ia vara. Herevana oiemu gabu dekenai unai idia abia dae taudia edia namba be bada eiava lasi, to oi lalo-parara diba unai bamona abidadama taudia idia ura dubu dekenai pris taudia ese idia dekenai Baibel idia hadibaia. To nega momo idia dekenai Baibel idia hadibaia lasi. Hegeregere, mase murinai souli ese panisi ia abia hahediba herevana mani oi laloa.

Baibel ena kahana ta dekenai pegatori eiava hel ena lahi herevadia ia hadibaia, a? Hari, Kerisendom ena diba bada taudia momo do idia haere, lasi. New Catholic Encyclopedia ia gwau: “Momokani, Katolik hahediba herevana, pegatori, be Buka Helaga amo idia abia lasi, to sene herevadia amo idia abia.” A Dictionary of Christian Theology ese hel ia herevalaia, ia gwau: “T[aravatu] M[atamatana] dekenai ita davaria, hel ena lahi be Keristani ginigunadia edia hahediba herevana lasi.”

Momokani, vanegai Church of England ena hahediba herevadia idia tahua komiti ena hereva be niuspepa momo ese idia halasia, badina ia gwau namona be dubu ese hel ena lahi hahediba herevana ia dadaraia. Dr. Tom Wright, Litchfield Cathedral ena haroro tauna badana, ia gwau, hel lalohadaina gunana “ese Dirava be kara dika bada ia karaia tauna bamona ia hahedinaraia bona unai dainai taunimanima momo edia lalona ia hisihisi.” Unai komiti ena ripoti ia gwau hel “ia noho momokani lasi.”a Unai hegeregerena, New Catholic Encyclopedia ese Katolik taudia edia lalohadai ia herevalaia, ia gwau: “Hari inai negai tomadiho idia hadibaia taudia idia gwau hel ena anina be ta be Dirava amo daudau dekenai ia noho.”

To, Baibel ese souli ia hadibalaia dalana bona dubu ese pegatori bona hel ena lahi idia hadibalaia dalana be idia hegeregere lasi. Nega momo Baibel ese souli edia mase ia herevalaia. “Ia kara dika soulina​—ia sibona do ia mase.” (Esekiela 18:4, NW; King James bona Katolik Douay Baibel mani oi itaia.) Baibel ia gwau, mase taudia ese gau ta idia diba lasi, hisihisi idia mamia diba lasi. “Mauri taudia idia diba do idia mase, to mase taudia be gau ta idia diba lasi.” (Hadibaia Tauna 9:5) Baibel ese mase taudia dekenai ia henia helarona be vaira negana ai do idia toreisi lou. Iesu ena turana Lasaro ia mase neganai, Iesu ia hahedinaraia mase be mahuta hegeregerena. Lasaro ena taihuna Mareta ese Baibel ia hadibaia helarona ia gwauraia, ia gwau: “Lau diba dina gabeai, toreisi lou dinana neganai, do ia toreisi lou.” Iesu ese mase amo Lasaro ia hatoreaisi lou neganai, unai helaro taunimanima totona ia hagoadaia momokani.​—Ioane 5:​28, 29; 11:11-​14, 24, 44.

Histori idia torea taudia idia hahedinaraia, taunimanima lalonai mase diba lasi soulina ia noho lalohadaina be Baibel amo lasi to Greek aonega herevadia amo ia mai. New Catholic Encyclopedia ia gwau idaunegai Heberu taudia idia laloa lasi taunimanima be mai ena tauanina bona lauma bamona soulina. Ia ese Heberu taudia idia abia dae gauna ia herevalaia, ia gwau: “Mauri ena laga be Dirava ese tano ena kahu amo ia karaia tau ginigunana lalonai ia vareai neganai, unai tau be ‘mauri tauna’ ai ia lao. (G[enese] 2.7). Idia laloa lasi mase dekenai tau ena kahana rua do idia parara, Greek aonega taudia idia laloa bamona; mauri ena laga be tauanina ia rakatania bona tau be ‘mase tauna’ ai ia lao (L[evitiko] 21.11; N[umera] 6.6; 19.13). Unuseniai ‘tauna’ ena anina be Heberu herevana [neʹphesh], nega momo idia hahanaia ‘souli,’ to ena anina be unai tau.”

Unai ensaiklopidia be ma ia gwau, Katolik dubu ena diba bada taudia be hari “idia gwau T[aravatu] M[atamatana] lalonai mase diba lasi soulina ena hahediba herevana be Helene [Greek] taudia edia lalohadai hegeregerena lasi.” Dokonai ia gwau: “Unai hekwakwanai ena haere be tanobada ena aonega herevadia dekenai do ita davaria lasi to Toreisi Lou ena hoa karana dekenai.”

Baibel Eiava Sene Herevadia?

To, edena dala ai Baibel amo idia mai lasi lalohadai be dubu dekenai idia hadibaia matamaia? Dubu momo idia gwau idia ese Baibel ena hereva idia badinaia. Hegeregere, vanegai sibona Pope John Paul II ia gwau, namona be “abidadama taudia idia abia dae [Baibel] be hereva momokani bona edia abidadama ena badina badana.” To, momo idia abia dae, hari inai negai Kerisendom ena hahediba herevadia be Keristani taudia ginigunadia edia hahediba herevadia hegeregeredia lasi. Dubu momo dekenai idia laloa hahediba herevadia idia idau idia lao neganai, sisina sisina idia namo idia lao. Ma danu, Katolik Dubu ena lalohadai be dubu ena sene herevadia edia siahu be Baibel ena siahu hegeregerena. New Catholic Encyclopedia ia gwau, dubu ena “hahediba herevana ta be Baibel sibona amo lasi, to sene herevadia amo danu, idia ta be sene herevadia sibona amo lasi, to Baibel amo danu.”

Histori ena sivarai hegeregerena, dubu ese Baibel ena hahediba herevadia idia negea bona sene herevadia idia abia dae. Momokani, hari dubu momo idia laloa Baibel ena hahediba herevadia be koikoi. Hegeregere, New Catholic Encyclopedia ia gwau: “Hari saiens bona histori dekenai idia davaria gaudia idia hahedinaraia goevagoeva Baibel ena hereva be momokani lasi.” Baibel ena hahediba herevana, mase taudia be gau ta idia diba lasi herevana unai, ia herevalaia neganai, ia gwau: “Tomadiho herevadia dekenai danu, T[aravatu] G[unana] ia hahedinaraia ena diba be hegeregere lasi . . . mase murinai mauri ena hereva dekenai.” Unai ensaiklopidia ese Salamo 6:5 (Baibel haida dekenai ia be siri 6) be haheitalai ta bamona ia hahedinaraia. Unai siri ia gwau: “Ia mase neganai, tau ta ese oi ia laloa diba lasi. Mase taudia edia gabu dekenai, daika ese oi do idia hanamoa?” Protestan dubu ena sikuli bona koledi haida dekenai idia gwau lasi Baibel ena hereva be mai ena kerere lasi. Bona Katolik Dubu ia laloa ia be mai ena siahu Baibel ena hahediba herevadia edia anina ia gwauraia hedinarai totona. To, reana oi laloa ‘Edena bamona bema idia hadibaia gaudia be Baibel hegeregerena lasi?’

Baibel Ena Anina Bada

Iesu ia hahedinaraia loulou Baibel ena siahu be bada, nega momo hereva ia hamatamaia neganai ia gwau: “Buka Helaga lalonai ia torea vadaeni.” (Mataio 4:​4, 7, 10; Luka 19:46) Oibe, Iesu ese headava tauna ena mauri ia herevalaia neganai, ia ese Greek aonega taudia edia lalohadai ia gwauraia lasi, to Genese dekenai Dirava ese gau ibounai ia havaraia sivaraina ia gwauraia. (Genese 1:​27; 2:​24; Mataio 19:​3-9) Ia hedinarai goevagoeva, Iesu ia laloa Baibel be Dirava ese ena lauma amo ia havaraia bona ia be momokani. Dirava ia guriguri henia neganai, ia gwau: “Oiemu hereva be hereva momokani.”​—Ioane 17:17.b

Baibel ese Iesu be ena nega lalonai idia noho tomadiho gunalaia taudia edia kara ia gwauraia dika, ia gwau: “Momokani umui ese Dirava ena taravatu umui negea, emui sene taravatu umui dogoatao totona. . . . Umui emui taravatu dekenai Dirava ena hereva umui hadikaia.” (Mareko 7:​6-​13) Unai hegeregerena, aposetolo Paulo ese Greek aonega herevadia eiava sene hereva koikoidia be ia hadibaia herevadia lalonai ia abia dae lasi. Ia gwau: “Naria namonamo: sedira ta ia noho, ia ese taunimanima edia sene herevadia hegeregerena lalohadai bona anina lasi koikoi herevadia amo iena vamu bamona umui do ia abia lao.” (Kolose 2:8, NW; 1 Korinto 1:​22, 23; 2:​1-​13) Paulo ese Keristani taudia ia hagoadaia sene herevadia, eiava hahediba herevadia haida idia badinaia totona, to unai hereva edia badina be Baibel dekenai bona idia be Baibel ena hereva hegeregeredia. (2 Tesalonika 2:​13-​15) Paulo ia gwau: “Buka Helaga ibounai be Dirava ena lauma amo ia vara bona ia be mai ena namo . . . Dirava ena tau be do ia hegeregere momokani, gau ibounai ia abia hegaegae gaukara namodia ibounai karaia totona.”​—2 Timoteo 3:​16, 17, NW.

Paulo ia diba gabeai taunimanima ese Baibel ena hereva do idia rakatania. Timoteo ia sisiba henia, ia gwau: “Negana do ia ginidae, taunimanima be hereva maoromaoro do idia ura lasi kamonai. . . . Hereva momokani do idia negea.” Timoteo ia hagoadaia: “To oi ese nega ibounai do oi laloa maoromaoro.” (2 Timoteo 4:​3-5) To edena dala ai? Dala ta be “namo” karana do ita badinaia. Greek buka ta ia gwau unai Baibel herevana ena anina be “mai ena ura ida ta ese gau idauidau ia dibaia bona ia laloa maoromaoro.” Luka ese ena negai Paulo ena hereva idia kamonai Berea taudia ia herevalaia neganai, unai hereva ia gaukaralaia. Paulo ena hahediba herevadia be guna idia diba lasi, bona idia ura lasi ta ese idia ia hakaua kerere. Luka ese ia hanamodia, ia gwau: “Berea taudia be namo, Tesalonika taudia bamona lasi. Paulo ena hereva idia kamonai, bona idia ura henia danu. Dina ibounai Buka Helaga idia tahua, inai hereva be ia momokani o lasi.” Ena be Berea taudia idia namo, to idia ese gau ibounai idia daradaralaia eiava idia dadaraia lasi. To idau, mai momokani ida hereva idia tahua bena “idia momo ese Iesu ena abidadama taudia idia halaoa.”​—Kara 17:11, 12.

Baibel Badinaia Karana Ena Namo

Taunimanima momo idia diba Keristani taudia ginigunadia ese Baibel idia abia dae momokani bona sibona ena ura ia dadaraia lalokauna idia hahedinaraia. To, hari inai negai, taunimanima momo edia “Dirava badinaia kara be toana sibona . . . to iena anina momokani do idia negea.” (2 Timoteo 3:5) Hari inai negai ia noho Keristani dalana ta ese Keristani dala ginigunana ia badinaia lasi neganai, ia ese taunimanima edia mauri lalonai namo korikorina ia havaraia diba lasi. Reana unai ese ia hahedinaraia dahaka dainai Kerisendom tanodia momo dekenai, dagedage, kara gageva, bona moni ura henia karadia idia vara momo bona ruma bese momo idia parara, ani? “Keristani” tanodia haida lalonai, tomadiho tamona taudia danu be edia iduhu idauna taudia idia tuari henidia mai dagedage bada ida.

Berea taudia ese idia hahedinaraia namo badinaia karana be ia mase ore vadaeni, a? Hari inai negai, Baibel idia abidadama henia bona idia badinaia oreana ta ia noho, a?

Encyclopedia Canadiana ia gwau: “Iehova ena Witness taudia ese idia karaia gaukarana lalonai, lagani 100 C.E. vairanai bona murinai Iesu bona ena hahediba taudia ese idia karaia Keristani gaukarana idia karaia lou.” New Catholic Encyclopedia ese Witness taudia ia herevalaia, ia gwau: “Idia laloa Baibel sibona be edia abidadama bona edia kara ena badina.”

Unai badina badana dainai tanobada hegegemadai Iehova ena Witness taudia be lauma dalanai idia noho namo, idia maino bona idia moale. Unai dainai inai magasin idia duahia taudia ai hagoadaia lauma dalanai Baibel ena hahediba hereva maoromaorodia idia tahua. Edia diba do idia habadaia neganai, Baibel bona Dirava do idia abidadama henia goadagoada diba. Unai bamona abidadama amo idia mai hanaihanai hahenamodia ita abia totona ita hekwarahi be hekwarahi kava lasi.

[Footnotes]

[Picture on page 6]

Aposetolo Paulo bona ma haida be maketi gabuna dekenai idia haroro

[Picture on page 7]

Iehova ena Witness taudia “idia laloa Baibel sibona be edia abidadama bona edia kara ena badina”