Taunimanima Edia Bese Idauidau

Anina: Taunimanima edia bese idauidau mai edia kopidia idauidau bona mai edia toadia idauidau. Bese idauidau taudia idia headava heheni diba bona natudia idia havaradia diba; unai ese ia hahedinaraia, ena be idia be mai edia toadia idauidau to idia iboudiai be “bese” tamona bamona.

Bese idauidau be edena bamona idia vara?

Gen. 5:​1, 2; 1:28: “Dirava ese taunimanima ia karaia neganai, ia ese Dirava hegeregerena ia karaia. Tau ta bona hahine ta ia karaia neganai ia hanamodia bona edia ladana ia gwauraia Taunimanima.” “Dirava ese ia hanamodia, idia dekenai ia gwau, Emui bese umui havaraia, do umui hutuma. Tanobada ena gabu ibounai dekenai umui noho, bona umui biagua.” (Unai hegeregerena, taunimanima iboudiai be unai taunimanima ginigunadia ruaosi, Adam bona Eva, edia tubudia.)

Kara 17:26: “Rara tamona dekenai [Dirava] ese taunimanima bese ibounai ia karaia, bona tanobada ena kahana ibounai do idia noho.” (Unai dainai bese iboudiai be Adam ena bese taudia.)

Gen. 9:​18, 19: “Noa ena natuna memero, lagatoi dekena amo idia diho taudia, edia ladana be Sema, bona Hamo bona Iafeta. . . . Idia be tanobada ibounai edia tubudia.” (Noa ena nega lalonai Dirava ese abata badana amo tanobada taudia dikadia iboudiai ia hadikadia ore murinai, tanobada besedia matamatadia be Noa ena natuna toiosi mai edia adavadia edia amo idia vara. Hari inai negai idia noho besedia danu be unai dala amo idia vara.)

Adam bona Eva edia sivarai be gori sibona, a?

Baibel ese unai lalohadai ia hamomokania lasi; inai sinado badana “Adam bona Eva” itaia.

Bema matamana neganai idia be bese tamona sibona, Kain ese ena adavana edeseniai ia abia?

Gen. 3:20: “Tau ese adavana ena ladana ia hatoa Heva, badina ia be mauri taudia ibounai edia sinana.” (Anina be, taunimanima iboudiai be Adam bona Eva edia amo do idia vara.)

Gen. 5:​3, 4: “Adam ena mauri lagani be 130 neganai, iena natuna ta ia havaraia, iena toana bamona bona ia hegeregerena vadaeni, iena ladana ia hatoa Seta. Seta ia vara murinai, Adam be lagani 800 ma ia mauri noho, iena natuna tatau bona hahine ia havaraia.” (Kain be Adam ena natuna tataudia ta, bona ia ese Adam ena natuna hahinedia ta eiava sibona ena tadina ta ena natuna ta ia adavaia. Unai neganai taunimanima edia tauanina idia namo herea bona idia goada herea, edia mauri edia daudau ese ia hahedinaraia hegeregerena; unai dainai ta ese sibona ena taihuna bema ia adavaia, edia natudia idia dika lasi. To ma lagani 2,500 bamona murinai, taunimanima edia tauanina idia dika idia lao vadaeni neganai, Iehova ese Israel taudia taravatu ia henidia, ia gwau ta ese sibona ena taihuna do ia adavaia lasi.)

Gen. 4:​16, 17: “Kain ese Iehova dekena amo ia raka siri, bona tano ta ladana Loa Kava, Eden ena dina ia daekau kahana dekenai ia noho. Kain bona ena adavana idia mahuta hebou, bona hahine ia rogorogo. Ia mara, mero ia abia, ladana Enoka.” (Mani inai oi laloa, Kain ese ena adavana unai tano dekenai ia davaria lasi, hegeregere ia be idau bese hahinena ta bamona. Lasi, to unai tano dekenai ia ida idia mahuta hebou bena mero idia abia.)

Dahaka dainai bese idauidau edia kopidia edia toadia be idauidau?

“Hari inai negai idia mauri noho taudia iboudiai be bese badana tamona ladana Homo sapiens taudia . . . Taunimanima edia toadia be idauidau, badina be edia tamadia sinadia edia amo idia abia toadia be idauidau, bona edia mauri edia oromadia idauidau ese unai toa idia haidaua dainai. . . . Nega momo bese tamona taudia rua edia idau be bada, to unai bese bona bese idauna ta edia idau be maragi.” Saiens taudia haida, bese idauidau amo UNESCO ese ia haboudia taudia edia orea ena hereva unai.​—⁠Statement on Race (New York, 1972, third ed.), Ashley Montagu, pp. 149, 150.

“Gunaguna, tanobada taudia be gabu idauidau dekenai idia karoho neganai, idia be bese idauidau dekenai idia parara. Unai bese badadia ta ta be tano badadia 5 ta ta dekenai idia hedinarai bena idia bada idia lao. . . . Unai nega lalonai taunimanima edia bese ta ta idia idau idia lao, bona bema bese gunadia taudia oredia edia toadia ita tahua namonamo, idia idau idia lao dalana ita davaria. Ita hoalaia lasi gauna be inai: Ita davaria bese gunadia amo idia parara sisina besedia idia idau sisina, bona idia amo idia parara momokani besedia idia idau momokani. . . . Bese idauidau ta ta mai edia kopidia idauidau be tano badadia ta ta dekenai idia hedinarai neganai, idia lalodiai bese maragidia daha momo idia parara bona bese ta taudia ese bese idauna ta taudia idia adavadia lasi, unai dainai unai bese idauidau ta ta edia toadia be idauidau idia lao, hari inai negai idia idauidau hegeregerena. . . . Ena be taunimanima edia bese idauidau be mai edia toadia idauidau, to dala hehunina amo idia iboudiai idia hegeregere.” (Heredity and Human Life, New York, 1963, H. L. Carson, pp. 151, 154, 162, 163) (Anina be, gunaguna bese idauidau idia parara bona unai bese ta ta lalodiai taunimanima be sibodia edia bese taudia mo sibodia idia adavadia; unai dainai unai bese ena toa be edia natudia edia tauanina dekenai idia hedinarai goevagoeva.)

Baibel ia gwau Dirava ese kopi korema taudia ia hadikadia, a?

Haida ese unai lalohadai idia abia badina be Genese 9⁠:25 ena anina idia laloa kerere. Unai siri lalonai Noa ena hereva ia torea, ia gwau: “Dika do ia mai Kanana ena latana dekenai! Ena tadikakana dekenai hesiai gaukara momokani do ia karaia.” Mani oi duahia namonamo; iena kopina ena kala ia gwauraia lasi. Noa ese Ham ena natuna Kanana unai bamona ia hadikaia, badina be kara dika rohorohona ta ia karaia dainai, unai davana dikana do ia abia be maoro. To Kanana ena bese taudia be daidia? Kopi korema taudia lasi, to kopi mia kurokuro taudia, Davara Badana ena mairiveina tanona idia noholaia taudia, unai. Idia ese matabodaga karadia idia karaia, lauma dikadia bona kaivakuku idia tomadiho henidia, bona sibodia edia natudia idia bouboulaidia; unai dainai Dirava ese ia kota henidia bona edia tano be Israel taudia ia henidia. (Gen. 10⁠:​15-19) Idia ese Kanana taudia iboudiai idia hamasedia ore lasi; haida idia guidia bona edia hesiai taudia ai idia halaodia; unai dala amo unai hadikaia herevana idia hamomokania.​—⁠Ios. 17⁠:13.

Noa ena natuna be daika, kopi korema taudia be ia ena amo idia vara? Ham ena natuna ma ta be Kusu, bona “Kusu ena natuna be inai, Seba bona Havila bona Sabata bona Rama bona Sabateka.” (Gen. 10⁠:​6, 7) Baibel ena siri gabedia lalodiai, Etiopia be Kusu idia gwauraia, bona Africa ena mairiveina kahana dekenai Etiopia kahirakahira dekenai ia noho besena be Seba idia gwauraia.​—⁠Isa. 43⁠:⁠3.

Taunimanima iboudiai be Dirava ena natudia, a?

Ita taunimanima ita goevadae lasi dainai, ita vara neganai ita hegeregere lasi Dirava ese ita do ia gwauraia iena natudia. To ita ibounai be Adam ena bese taudia; Dirava ese ia havaraia neganai ia goevadae bona ia be Dirava ena natuna.​—⁠Luka 3⁠:38.

Kara 10:​34, 35: “Dirava ese taunimanima edia toana ia laloa lasi. To bese ibounai lalonai, Dirava dekenai ia gari bona kara maoromaoro ia karaia tauna, Dirava ese do ia abia dae.”

Ioane 3:16: “Dirava ese inai tanobada ia lalokau henia bada dainai, iena Natuna tamona sibona ia vara, ia henia vadaeni ita dekenai, do idia abidadama henia taudia ibounai be do idia mase lasi, to mauri hanaihanai do idia abia.” (Adam ese Dirava ena natuna dagina ia haboioa; unai dagi do ita abia lou dalana tamona be, Dirava ena Natuna do ita abidadama henia mai eda momokani ida. Dala ia kehoa bese idauidau iboudiai edia, unai bamona do idia karaia totona.)

1 Ioane 3:10: “Dirava ena natuna taudia be idau, bona Satani ena natuna taudia be ma idau. Edia idau be inai: Kara maoromaoro ia karaia noho lasi tauna be Dirava ena natuna lasi, bona iena tadikakana ia lalokau henia lasi tauna be Dirava ena natuna lasi.” (Anina be, Dirava ese taunimanima iboudiai ia gwauraidia lasi iena natuna taudia. Dirava ese ia gwauraia dika karadia idia karaia mai edia ura ida taudia, edia tamana lauma dalanai be Satana. Ioane 8⁠:44 itaia. To Keristen momokani taudia ese Dirava ena kara idia tohotohoa. Dirava ese idia edia amo haida ia abidia hidi, guba dekenai Keriso ida do idia lohia hebou totona. Dirava ese ia gwauraidia iena “natuna taudia.” Anina ma haida tahua totona, inai sinado badana “Vara Lou” itaia.)

Roma 8:​19-21: “Dirava ese ia karaia gaudia ibounai idia ura bada Dirava ese iena natuna taudia korikori do ia hedinaraia . . . Dirava ese dina ta iena karaia gaudia be do ia ruhaidia dika ena bodaga dekena amo, vadaeni Dirava ena natuna edia hairai do idia abia, ma Dirava ese edia dala do ia kehoa, vadaeni kwalimu momokani do idia abia.” (‘Dirava ena natuna taudia korikori’ ese mauri guba dekenai do idia abia neganai, Dirava ese do ia ‘hahedinaraidia,’ anina be, do ia hahedinaraia tanobada taudia durudia totona idia be kara haida idia karaia noho, Keriso ese ia haganidia hegeregerena. Kamonai taudia tanobada dekenai be Paulo ese inai siri lalonai ia gwauraidia “Dirava ese ia karaia gaudia”; do idia goevadae bona do idia hahedinaraia guba bona tanobada edia Pavapava idia badinaia momokani, bena unai murinai idia danu be Dirava ese ena natuna ai do ia halaodia. Bese idauidau iboudiai ese unai hahenamo do idia abia.)

Gabeai bese iboudiai be tadikaka bona taihu hegeregeredia do idia lalo-tamona momokani, a?

Iesu ese ena hahediba taudia momokanidia ia hereva henidia, ia gwau: “Umui ibounai be tadikaka.” (Mat. 23⁠:⁠8) Gabeai ia gwau: “Taunimanima ibounai do idia diba umui be lauegu diba tahua taudia, ta ta dekenai do umui lalokau henia dainai.”​—⁠Ioane 13⁠:35.

Ena be Keristen taudia ginigunadia idia goevadae lasi, to unai lalo-tamona ena mamina idia abia momokani. Aposetolo Paulo ia gwau: “Unai dainai umui ta be idau lasi. Iuda taudia bona Iuda lasi taudia, idia guia hesiai taudia bona ura kwalimu taudia, tatau bona hahine, umui ibounai be tamona sibona. Keriso Iesu danu umui hakapua dainai umui ibounai be tamona.”​—⁠Gal. 3⁠:28.

Hari inai negai Iehova ena Witness taudia be Keristen tadikaka bamona idia noho, ta ena toana o ena bese idia laloa lasi. Toretore tauna William Whalen be magasin ta ladana U.S. Catholic lalonai ia gwau: “Lau laloa [Iehova ena Witness taudia edia orea] ena kara namo hereana be inai: Bese idauidau taudia idia abidia dae; ta ena toana idia laloa lasi.” Oxford Iunivesiti tauna Bryan Wilson ese Iehova ena Witness taudia Africa dekenai edia kara ia tahua namonamo murinai, ia gwau: “Edia orea lalonai idia vareai matamata taudia idia hadibadia bena idau bese taudia lalo-dika henidia karana idia negea haraga; unai dekenai idia ese orea idaudia iboudiai idia hereaia reana.” Witness taudia, bese idauidau taudia tano 123 amo, be hebouhebou ta idia abia murinai, The New York Times Magazine ia gwau: “Witness taudia ese New York taudia idia hahoadia, idia be momo herea dainai sibona lasi, to badina be idia be taunimanima idauidau (edia orea lalonai be dagi idauidau iboudiai taudia), taunimanima edia toadia idia laloa lasi (Witness taudia momo be Nigro taudia) bona idia kara namonamo dainai.”

Nega daudau lasi murinai Dirava ena Basileia ese inai tanobada ena oromana dikana do ia haorea neganai, Iehova bona edia dekena taudia idia lalokau henidia momokani lasi taudia be ia ese do ia hamasedia ore danu. (Dan. 2⁠:44; Luka 10⁠:​25-28) Dirava ena Hereva ia gwauhamata, taunimanima momo, “bese idauidau, iduhu idauidau, kopina idauidau, bona gado idauidau” amo, be unai hisihisi amo do idia roho mauri. (Apok. 7⁠:⁠9) Dirava momokanina idia tomadiho henia, Iesu Keriso idia abidadama henia, bona idia lalokau heheni, unai dainai idia be orea tamona lalonai idia hebou, bona tanobada besena badana mai edia lalo-tamona ai do idia lao.